3 Juan 1 - Tayta Diospa Wilakuynin

Carta qalaykunan

¹ Kuyay wawqi Gayo: Noqa mayor wawqi karmi qamta rasunpaypa kuyar kay cartata cartakamü.

² Kuyay wawqi, Tayta Diostami manakuykä ali kawashqaykiman tupu lapanchöpis alila kanaykipaq y mana qeshyaypa kawanaykipaq.

³ Jesucristo yachasishqannöla kawaykashqaykita wawqikuna chämur wilayämaptinmi selläma kushikushkä.

⁴ Tayta Dios munashqanno wamräkuna kawaykäyashqanta musyarmi selläma kushikü.

Gayo yanapäkuq kashqanpita Juan kushikushqan

⁵ Kuyay wawqi Gayo, jukläpita shamuq wawqikunata yanapar alitami ruraykanki.

⁶ Paykuna chämurmi kuyapäkuq kashqaykita shuntakäyashqächo wilayämash. Yapay kutimuptin juk markaman aywayänanpaqpis yanapaykulanki. Sayno ruraptiki Tayta Diospis kushikunqami.

⁷ Jesucristupa ali wilakuyninta wilakur purirmi Tayta Diosta mana cäsukuq runakunata imatapis manakuyansu.

⁸ Saymi Tayta Diospa wilakuqninkunataqa noqansi yanapänansi. Saynöpami paykunawan wilakuykaqno kashun.

Diótrefes mana cäsukuq kashqan

⁹ Wilakuqkunata yanapänansipaq tantiyasirmi juk cartata qamkunaman cartakamushkä. Sayno kaptinpis Diótrefes manashi yäsishqäkunata cäsukunsu. Payqa mandaq kayninman atiënikuykurshi munashqanta rurakun.

¹⁰ Sayshi noqakunapa washätapis rimar puriykan. Karupita shamuq wawqikunatapis manashi chaskikunsu. Posädasiqkunatapis mana posädasiyänanpaqshi michan. Michaykaptinpis posädasiyaptinqa shuntakäyashqaykipitashi qarqun. Sayno rurashqanpita chämurnami olqutupäshaq.

Demetrio cäsukuq kashqan

¹¹ Kuyay wawqi Gayo, ama Diótrefesno kaysu, saypa trukanqa alilata ruray. Alita ruraq kaqqa Diospa wamranmi. Mana alita ruraq kaqmi isanqa Diosta reqinsu.

¹² Demetriupaqmi isanqa Tayta Diospa wilakuynin nishqanno kawashqanta lapan runakunapis parlayan. Noqakunapis rikayashkämi sayno kawashqanta. Musyankimi rasun kaqta niyashqäta.

Carta ushanan

¹³ Yäsinäpaq maspis kaykanraqmi. Isanqa cartalacho manami qelqamushaqsu.

¹⁴ Kikï shamurnami mastaqa yäsishayki.

¹⁵ Tayta Dios yanapaykuläshunki makincho ali kawanaykipaq. Kaycho reqinakuyashqaykikunapis lapanmi salüdunta apasikayämun. Saycho reqinakushqäkunata cada ünunta salüdüta qoykulanki.