2 Timoteo 4 - Tayta Diospa Wilakuynin

Imaypis wilakunanpaq nishqan

¹ Tayta Diospa jutincho y kawaqkunata y wanuqkunata juzgaq [Señor] Jesucristupa jutinchömi qamta nï:

² Chaskikuyänan o mana chaskikuyänan kaptinpis Tayta Diospa palabranta imaypis wilakuy. Mana ajayaypa shumaq tantiyasiy, anyapay y shakyäsiy.

³ Shamuq watakunacho Jesucristupa wilakuyninta manami wiyayta munayanqanasu. Saypa trukanqa lutan yachasikuqkunata ashirmi paykuna yachasiyashlanta chaskikuyta munayanqa.

⁴ Manakaqkunalata wiyayta munarmi rasun kaq yachasikuyta chaskikuyanqasu.

⁵ Qamqa Tayta Dios munashqanno kawanaykipaq shumaq tantiyakuy. Imano nakarpis payman yärakuy. Wilakuyninta pïmaytapis wilapay. Mana qelanaypa Tayta Diosta sirviy.

⁶ Wanuy janächönami kaykan. Sacrificiuman jichashqan vïnu altarcho ushakashqannömi noqapis ushakänäpaqna kaykä.

⁷ Ali soldädunömi lapanta cumplishkä. Yalinakuqnömi chänäpaq kaqman chashkä. Yärakushqänölami mana kachaypa imaypis yärakushkä.

⁸ Kananqa shuyaraykä ali juzgaq juez Señor Jesucristo kutimunan junaq corönata entregamänanpaq kashqantami. Say coröna kaykan paypa nawpancho jusaynaqta chaskimashqanmi. Manami noqalasu corönata chaskishaq, sinöqa Jesucristuta shuyakuqkuna lapanmi chaskiyanqa.

Carcilcho kashqanta wilapashqan

⁹ Timoteo, tinkunansipaq jukla shamuykulay.

¹⁰ Wawqinsi Demasmi kikin munashqanno kawayta munashpan kacharimar Tesalónica markaman aywakush. Crescentita kachashkä Galacia provinciaman, Titutanami Dalmacia markaman.

¹¹ Lucaslanami noqawan kaykan. Shamurqa Marcusta pushakarkamunki. Payqa Tayta Diospa wilakuyninta wilakuptï alimi yanapämanqa.

¹² Wawqinsi Tíquicutanami Éfesuman kachaykämü.

¹³ Troaschömi Carpupa wayincho capötïta kachaykamurqä. Shamurqa capötïtapis librükunatapis apakarkalämunki. Mana qonqaylapa pergamïnükunatapis apakarkalämunki.

¹⁴ Fiërru takaq Alejandrumi pasaypa conträ rikakush. Sayno kashqanpita Señor Jesucristumi juzganqa.

¹⁵ Alejandrupitaqa alcäbu qampis kakunki. Wilakushqansi lutan kashqantami pitapis nikan.

¹⁶ Autoridäkunapa nawpancho puntata declarar sapakuptï manami pipis favornï sharkushsu. Lapanmi japaläta kachariykayämash. Sayno rurayämashqanpita Tayta Dios perdonaykuläsun.

¹⁷ Paykuna kachariyämaptinpis Tayta Diosqa noqawan karmi shakyäsimash. Saymi mana Israel autoridäkunapa nawpanchöpis ali wilakuyninta wilakunäpaq yanapämash. Wanusiyämänanpaq kaykaptinpis leonpa shiminpitanöpis Tayta Diosmi salvamash.

¹⁸ Saynölami lapan mana alikunapitapis salvamanqa. Nirkurmi mandaykashqancho imayyaqpis kawanäpaq pushakamanqa. ¡Tayta Dios imaypis alabash kaykuläsun! Amén.

Carta ushanan

¹⁹ Salüdüta qoykulanki Priscilatawan Aquilata. Onesíforupa aylluntapis salüdüta qoykulanki.

²⁰ Corintuchömi Erasto quëdakamush. Trófimutanami Miletucho qeshyaykaqta kachaykamurqä.

²¹ Tamya killa manaraq chämushqanyaq imaykatapis kachaykur shamunki. Eubulo, Pudente, Lino, Claudia y wakin wawqi panikunapis salüduntami apasikayämun.

²² Señor Jesucristo imachöpis yanapaykuläshunki. Saycho kaqkunata lapaykita kuyapaykuyäläshunki. [Amén.]