2 Timoteo 2 - Tayta Diospa Wilakuynin

Mana ajayaypa wilakunanpaq yäsishqan

¹ Timoteo, kuyay surïno kaptikimi qamta nï: Jesucristo yanapaykäshuptikiqa mana ajayaypa pay munashqanno kaway.

² Runakunapa nawpancho yachasishqäta yärakuypaq kaq wawqikunata yachasiy paykunapis wakinta yachasiyänanpaq.

³ Jesucristupa ali soldädun kaykarqa imano nakarpis pay munashqanno kaway.

⁴ Manami pï soldädupis soldädu kaykashqanta kachariykur juk rurayman aywakunsu. Saypa trukanqa mandaqnin nishqantami ruran.

⁵ Saynölami yalinakuypa cörriqkunapis premiuta chaskiyänanpaq reglamentu nishqanno cörriyan. Sayno mana cörrirqa manami ima premiutapis chaskiyansu.

⁶ Chakra muruq runapis murushqan mikuy wayuptin puntatami yawan.

⁷ Kay nishqäkunata shumaq yarpachakuptikiqa Señor Jesucristumi yanapäshunki shumaq tantiyakunaykipaq.

⁸ Timoteo, rey Davidpa ayllunpita Jesucristo yurishqanta y wanurkurpis kawarimushqanta mana qonqaypa wilakuy. Saytami noqapis wilakuykä.

⁹ Sayta wilakushqäpitami fiyupa nakaykä. Kananpis imayka wanusikuq japuymi carcilcho wichqaraykä. Wichqaraptïpis Jesucristupa wilakuynintaqa imapis manami sapansu.

¹⁰ Saymi imano nakarpis mana ajayaypa Jesucristupa wilakuyninta wilakuykä. Saynöpami akrashqan kaqkuna Jesucristuta chaskikuyaptin Tayta Dios salvanqa gloriacho imayyaqpis kawayänanpaq.

¹¹ Kay wilakuyqa rasun kaqmi kaykan: Jesucristuwan wanushna kaykarqa paywanmi kawashun.

¹² Nakayta awantarqa paywanmi mandashun. Ñëgashqaqa paypis ñëgamäshunmi.

¹³ Promitishqansita mana cumplishqapis payqa cumplinmi. Payqa promitishqanta manami imaypis upa tukunsu.

Dios munashqanno wilakunanpaq yäsishqan

¹⁴ Kay nishqäkunata wawqi panikunata imaypis yarpäsiy. Tayta Diospa jutincho tantiyasiy manakaq yachasikuykunata mana chaskipäyänanpaq. Saykunata chaskiparqa manami Tayta Dios munashqannösu kawayan. Saynöpis wawqi panikunata pasaypami jaqayäsiyan.

¹⁵ Tayta Diospa shonqunpaqno wilakuyninta shumaq yachasiy. Ali yachasirqa ali arupakuq mana penqakushqannömi qampis penqakunkisu.

¹⁶ Lutan yachasikuqkunawan ama rimanakuysu. Paykunawan rimanakuptikiqa wawqi panikunapa shonqun waranlan waranlanmi chukruyanqa.

¹⁷ Lutan yachasikuyqa imayka cáncer qeshyanömi maysaymanpis chaykan. Himeneuwan Filetumi lutankunata yachasir puriykäyan.

¹⁸ Paykuna nikäyan mayna kawarimushnöna kaykar wanurqa manana kawarimunansipaq kashqantami. Sayno yachasir pantakäsiyaptinmi wakin wawqi panikuna Jesucristuman yärakuyannasu.

¹⁹ Wakinkuna mana yärakuyaptinpis Tayta Dios akrashqan kaqkunaqa ali cimientush wayinömi kaykäyan. Saymi Diospa palabrancho kayno qelqaraykan: <>. Saynöpis kaynömi nikan: <>.

²⁰ Rïcu runapa wayincho manami qorilapitasu ni qellaylapitasu plätukuna kaykan, sinöqa kaykanmi qerupitapis mitupitapis. Qoripita qellaypita kaq plätukunaqa manami luta manijanansipaqsu kaykan. Qerupita mitupita kaqkunami isanqa waran waran manijanansipaq kaykan.

²¹ Pipis qori plätuno kananpaqqa mana jusalikuypa kawasun y lutan yachasikuytapis ama chaskisunsu. Saynöpami qoripita rurash manëjuta rïcu runa utilizashqanno paytapis alita rurananpaq Tayta Dios utilizanqa.

Timoteo imano kawananpaqpis nishqan

²² Wakin maqtakuna lutanta rurayaptinpis qamqa ama ruraysu. Saypa trukanqa Tayta Dios munashqanno kaway, payman yärakuy, pïmaytapis kuyay y lapan runakunawanpis ali kaway. Saynöpis Señor Jesucristuta alabar Tayta Dios munashqanno kawaqkunawan imaypis shuntakay.

²³ Lutan yachasikuykunapita wakin runakuna rimanakuyaptinpis sayman ama jatikaysu. Sayno rimanakurqa jaqayäsinakuyanmi.

²⁴ Señor Jesucristupa sirviqnin kaykarqa piwanpis mana rimanakuylapa kaway. Saynöpis lapan runakunawan ali kaway, shumaq yachasiy y pacienciaykipis kasun.

²⁵ Contrayki sharkuqkunata ali shimilaykipa tantiyasiy. Sayno tantiyasiptiki capazchir Tayta Dios tantiyasinqa jusalikushqanta wanakur pay munashqannöna kawayänanpaq.

²⁶ Sayno kawarqa diablupa makincho kaykäyashqanpita yarqur Tayta Diospa makinchönami kawayanqa.