2 Timoteo 1 - Tayta Diospa Wilakuynin

Carta qalaykunan

¹ Noqa Pablutami Jesucristupa apostolnin kanäpaq Tayta Dios churamash. Jesucristuta chaskikurmi Tayta Dios promitishqanno mana ushakaq kawayta tarishkä.

² Timoteo, kuyay surïno kaptikimi kay cartata cartakaykämü. Papäninsi Tayta Dios y Señorninsi Jesucristo kuyapäshushpayki ali kawanaykipaq yanapaykuläshunki.

Mana penqakuypa wilakunanpaq yäsishqan

³ Unay ayllükuna sirviyashqan y noqapis sirvishqä Tayta Diosta manakurmi sakaypapis junaqpapis qampaq agradëcikü.

⁴ Waqaykar quëdamushqaykita yarparmi kushikunansipaq kutimuyta munaykä.

⁵ Noqa musyämi Tayta Diosman yärakur pay munashqanno kawashqaykita. Sayno kawaykanki awilayki Loida y mamayki Eunicipis Tayta Diosman yärakur kawayashqannömi.

⁶ Sayno kawaykarqa mana mansariypa Tayta Diosta imaypis sirviy. Makïta umaykiman churaykur qampaq manakushqä hörami payta sirvinaykipaq Tayta Dios churashushkanki.

⁷ Manami jaka shonqu kanansipaqsu Tayta Dios churamashkansi, saypa trukanqa mana mansariypa wilakunansipaq, pïmaytapis kuyanansipaq y shumaq tantiyakuykur imatapis ruranansipaqmi.

⁸ Sayno kaykaptinqa mana penqakuypa Jesucristupa wilakuyninta wilakuy. Saynöpis ama penqakuysu ali wilakuyninta wilakushqäpita prësu wichqaräsiyämaptinpis. Imano nakarpis ali wilakuyninta wilakuy. Sayno wilakunaykipaqmi Tayta Dios yanapaykäshunki.

Tayta Dios salvamashqansita Pablo wilakushqan

⁹ Tayta Diosmi salvamashpansi qayamashkansi pay munashqanno santu kanansipaq. Manami imatapis alita rurashqansipitasu salvamashkansi, saypa trukanqa jusayuq kashqapis kuyapämashpansimi salvamashkansi. Sayno kuyapämashkansi kay pasata manaraq kamar Jesucristuman churamashpansimi.

¹⁰ Kuyapämashqansita musyasimashkansi salvamaqninsi Jesucristuta kay pasaman kachamurmi. Paymi wilakuynincho nishqanno wanuyta vinciskir mana ushakaq kawayta qomashkansi.

¹¹ Ali wilakuyninta [mana Israel runakunata] wilapänäpaq Tayta Dios churamaptinmi apostolnin kar yachaykäsï.

¹² Sayno wilakushqäpita carcilcho nakarpis Jesucristumanmi yärakuykä. Paymi shuntakamänan junaqyaq munayninwan yanapämanqa. Saymi carcilcho wichqararpis penqaküsu.

¹³ Timoteo, Jesucristupa wilakuyninta yachasishqänöla qampis yachasiy. Jesucristo kuyashushqaykinöla payman yärakur pïmaywanpis kuyanakur kaway.

¹⁴ Jesucristupa wilakuyninta pipis lutanta yachasiptinqa wawqi panikunata tantiyasiy mana chaskipäyänanpaq. Tantiyasinaykipaq Espíritu Santumi yanapäshunki. Paymi noqansiwan imaypis kaykan yanapämänansipaq.

Pabluta Onesíforo ali yanapashqan

¹⁵ Musyashqaykinöpis Asia provinciacho taq wawqi panikuna lapanmi kachariykamar aywakuyash. Saynölami Figeluwan Hermógenespis aywakuyash.

¹⁶ Onesíforuta y ayllunkunatapis Señor Jesucristo yanapaykuläsun. Carcilcho prësu kaykaptïpis mana penqakuypami imaypis yanapämash.

¹⁷ Saynöpis Romaman chaykamur tarimashqanyaqmi ashimash.

¹⁸ Musyashqaykinöpis Éfeso markacho shumaqmi yanapämashkansi. Runakunata juzganan junaq Señor Jesucristo payta kuyapaykuläsun.