2 Pedro 1 - Tayta Diospa Wilakuynin

Carta qalaykunan

¹ Yärakuq mayïkuna: Noqa Simón Pedro, Jesucristupa sirviqnin y apostolnin karmi, qamkunapaq kay cartata cartakaykämü. Qamkunatapis Jesucristo kuyapäyäshushpaykimi noqakunatano salvayäshushkanki. Payqa Diosninsimi y salvamaqninsimi.

² Tayta Diosta y Señorninsi Jesucristuta reqiyaptikimi kuyapäyäshunaykipaq y waran waran ali kawayta qoykuyäläshunaykipaq qamkunapaq manakü.

Tayta Dios munashqanno kawanansipaq nishqan

³ Payta reqiptinsimi munashqanno kawanansipaq Tayta Dios munayninwan tukuynöpa yanapaykämansi. Kuyapäkuq y alilata ruraq karmi sayno kawanansipaq qayamashkansi.

⁴ Saynölami imaypis yanapämänansipaq promitimashkansi. Sayno yanapämäshun jusaynaq kashqanno noqansipis jusalikuyta kacharir jusaynaqna kanansipaqmi.

⁵ Sayno kaykaptinqa Tayta Diosman imaypis yärakuyay. Payman yärakur alilata rurayay. Alilata rurar palabranta yachakuyay.

⁶ Palabranta yachakur mana ali yarpayta vinciyay. Mana ali yarpayta vincir wanuyashqaykiyaq cäsukuyay. Cäsukur Tayta Dios munashqanno imaypis kawayay.

⁷ Tayta Dios munashqanno kawar say ayllunöla ali rikanakuyay. Ali rikanakur pïmaywanpis kuyanakur kawayay.

⁸ Waran waran sayno kawayaptikiqa Señorninsi Jesucristuta reqiyashqayki manami manakaqlapaqsu kanqa.

⁹ Sayno mana kawarqa qapra runa rikayta mana puëdishqannömi kaykäyanki. Tayta Dios perdonayäshushqaykitapis qonqaykuyashkankimi.

¹⁰ Wawqi panikuna, Tayta Dios qayayäshushqaykita y akrayäshushqaykita shumaq tantiyayänaykipaq imaykanöpapis pay munashqanno kawayay. Saynöpami jusalikuyman imaypis ishkiyankisu.

¹¹ Saymi mandaykashqanman chäyaptiki salvamaqninsi Señor Jesucristo kushish chaskiyäshunki.

¹² Saymi mayna musyaykäyaptikipis y Diospa wilakuyninta shumaq yachakush kayaptikipis saykunata imaypis yarpaykäsiyäshayki.

¹³ Kawashqäyaqqa saykunata imaypis yarpäsiyäshaykimi.

¹⁴ Wanukunäpaqna kaykashqäta Señor Jesucristo musyasimash kaptinmi

¹⁵ qamkunata yarpaykäsï wanukuptïpis yäsishqäkunata imaypis yarparäyänaykipaq.

Jesucristo kutimunanpaq nishqan

¹⁶ Señor Jesucristo munayyuq kashqanta y kutimunanpaq kashqanta manami yarpayläpitasu yachaykäsï, saypa trukanqa chipipiykaqta kikï rikash karmi sayno yachaykäsï.

¹⁷ Chipipiykaqman tikraptinmi Tayta Dios gloriapita nimurqan: <>.

¹⁸ Sayno nimushqanta kikïmi wiyashkä sagrädu jirka puntacho Jesucristuwan kaykar.

¹⁹ Saymi masraq tantiyansi profëtakuna wilakuyashqan rasunpaypa kashqanta. Sayno kaykaptinqa profëtakuna qelqayashqankunata shumaq cäsukuyay. Saykunaqa sakaycho aksi asikyapämashqansinömi kaykan. Sayno cäsukuyay pasa waraptin waraq qoyllar shonquykikunacho asikyashqanyaq.

²⁰ Shumaq tantiyakuyay. Ama yarpäyaysu Tayta Diospa palabranta runakuna jamuylanpita qelqayashqanta.

²¹ Tayta Diospa profëtankuna manami imaypis kikinkunapa yarpaylanpitasu qelqayarqan, sinöqa Espíritu Santu tantiyasiptinmi Tayta Diospa yarpayninta qelqayarqan.