2 Juan 1 - Tayta Diospa Wilakuynin

Carta qalaykunan

¹ Tayta Dios akrashqan warmi y wawankuna: Mayor wawqi karmi kay cartata apaykäsimü. Qamkunata lapan shonqüwanmi kuyä. Manami noqalasu kuyä, saypa trukanqa Tayta Diospa wilakuyninta wakin chaskikuqkunapis kuyayäshunkimi.

² Qamkunata kuyayä Tayta Diospa wilakuyninta noqakunano chaskikush kayaptikimi. Paypa wilakuynintaqa manami imaypis qonqäshunsu.

³ Tayta Dios y Surin Jesucristo kuyapäyäshushpayki ali kawayänaykipaq yanapaykuyäläshunki. Saynöpis ali wilakuynin nishqanno kawar kuyanakuyänaykipaq yanapaykuyäläshunki.

Kuyanakur kawanansipaq nishqan

⁴ Wakin wamraykikuna Tayta Diospa mandamientun nishqanno kawaykäyashqanta rikarmi fiyupa kushikushkä.

⁵ Saymi kanan qamta ruwakü jukniki juknikipis kuyanakuyänaykipaq. Kay mandamientu manami mushuqsu kaykan, sinöqa nawpapitanami musyashkansi.

⁶ Rasunpaypa kuyakuq karqa Tayta Diospa mandamientunkunata cäsukushun. Paypa mandamientunqa kuyanakunansipaqmi nimansi. Kuyanakunansipaq kashqanta nawpapita pasanami musyashkansi.

Lutan yachasikuqkuna puriykäyashqan

⁷ Kay pasacho askaqmi lutan yachasikuqkuna puriykäyan. Paykuna niyan: <>. Runakunata sayno criyisirmi anticristo kaykäyan.

⁸ Cuidä say runakuna qamkunatapis criyisiyäshunkiman. Criyisiyäshuptikiqa Jesucristupa wilakuyninta chaskikuyashqaykipis manakaqpaqmi kanqa. Paykunata mana chaskiparmi isanqa gloriacho premiuta chaskiyanki.

⁹ Pipis Jesucristupa wilakuyninta kacharir lutan yachasikuyta chaskikurqa manami rasunpaypasu Tayta Diosta chaskikush. Jesucristupa wilakuyninta mana kachariqkunami isanqa Jesucristuta y Tayta Diostapis rasunpaypa chaskikuyash.

¹⁰ Sayno kaykaptinqa lutan yachasikuqkuna chäyämuptin ama chaskipäyaysu ni wayikimanpis posädasiyaysu.

¹¹ Lutan yachasikuqkunata chaskipaq kaqqa paykunanömi lutanta ruraykäyan.

Carta ushanan

¹² Yäsinäpaq maspis kaykanraqmi. Isanqa cartalacho manami qelqamushaqsu. Kikï shamurnami mastaqa yäsishayki. Saychömi shumaq kushikushun.

¹³ Tayta Dios akrashqan nanaykipa wawankunapis salüdunkunata apasikayämunmi. [Amén.]