1 Timoteo 6 - Tayta Diospa Wilakuynin

Patronninta ashmaykuna respitayänanpaq yäsishqan

¹ Ashmaykuna patronninta shumaq respitayäsun. Saynöpami Tayta Diosta ni wilakuyninta pipis manakaqman churaykanqasu.

² Patronnin yärakuq mayin kaptinpis ama yarpäyäsunsu mana respitayänanpaq kashqanta, saypa trukanqa yärakuq mayin kaptin masraq respitayäsun. Ashmaykuna sayno kayänanpaq shumaq yachasiy.

Tarishlansiwan kushish kawanansipaq yäsishqan

³ Pipis Señorninsi Jesucristupa ali wilakuyninta yachasinanpa trukan y Tayta Dios munashqanno kawanansipaq yachasinanpa trukan lutanta yachasirqa

⁴ yachaq tukunmi. Say runakunaqa senqan maycho kashqantapis mana musyarmi manakaq yachasikuykunapita rimanakuykäyan. Sayta rikakurmi runakuna chikinakur, rimanakur, qayapänakur y jaqayäsinakur kawayan.

⁵ Lutan yachasikuqkunaqa kikinpurapis manakaqkunalapitami rimanakuyan. Lutan yarpaykunaman uman churakash karmi Jesucristupa wilakuynin ima kashqantapis tantiyayansu. Saynöpis yarpäyan Diosta sirvir rïcuyäyänanpaq kashqantami. [Paykunawanqa ama shuntakäyaysu.]

⁶ Tarishlansiwan contentakur y Tayta Dios munashqanno kawarqa rïcu runapitapis mas alimi kawansi.

⁷ Jinaylami yurishkansi. Wanurpis jinaylami aywakushun.

⁸ Sayno kaptinqa mikunansipaq y jatikunansipaq kashlanwan kushish kawakushun.

⁹ Rïcu kayta munaqkunaqa toqlaman jeqaqnömi imayka lutan ruraykunaman jatikar yarquyta kamäpakuyannasu. Sayno kar fiyupami nakayan.

¹⁰ Qellaylapaq wachakash kaqkunaqa imaykaläya jusatami jusalikuyan. Wakin wawqi panikunapis rïcuyaylapaq yarpachakurmi Jesucristuman yärakuyannasu. Nirkurmi imayka tuksikushnöraq fiyupa nakaykäyan.

Tayta Dios munashqanno kawananpaq yäsishqan

¹¹ Timoteo, Tayta Diosta sirviq kaykarqa ama qellaypaq wachakash kaysu. Saypa trukanqa Tayta Dios munashqanno imaypis kaway, payman yärakuy, runa mayikita kuyapay, pacienciakuy y pitapis ali shimilaykipa parlapay.

¹² Guërracho soldädukuna mana ajayaypa pelyayashqanno qampis mana ajayaypa Jesucristuman yärakuy. Mana ushakaq kawayta chaskikunaykipaq Tayta Dios qayaykäshuptikiqa imaykanöpapis pay munashqanno kaway. Sayta tantiyakurmi Jesucristuman yärakushqaykita wawqi panikunapa nawpancho wilakushkanki.

¹³ Musyankimi Poncio Pilatupa nawpancho Jesucristo mana mansariypa wilakushqanta. Saymi Jesucristupa jutincho y lapantapis kamaq Tayta Diospa jutincho qamta nï:

¹⁴ Señor Jesucristo kutimushqanyaq kay cartacho nishqäkunata lapantapis mana qonqaypa cumpliy.

¹⁵ Tiempun chämuptinnami Jesucristuta kay pasaman Tayta Dios kachamunqa. Tayta Diosqa lapan reykunapa y mandaqkunapa mandaqninmi kaykan.

¹⁶ Pay japalanmi imayyaqpis kawaq kaykan y seqaypa chipipiykaqchömi kaykanpis. Payta manami pipis rikashsu ni rikaytapis kamäpakunsu. ¡Lapan runakuna imayyaqpis payta alabaykuyäläsun! ¡Paypa makincho imayyaqpis kaykuyäläsun! Amén.

¹⁷ Rïcu kaq wawqi panikunata niy mana runa tukuyänanpaq y riquëzankunaman mana atiënikuyänanpaq. Riquëzakunaqa ushakaqlami kaykan. Riquëzankunaman atiënikuyänanpa trukan [imayyaqpis kawaq] Tayta Dioslaman yärakuyäsun. Paymi imaykatapis kamaripämansi kushish kawanansipaq.

¹⁸ Saynöpis rïcukunata yachasiy alikunata imaypis rurayänanpaq y wakin runakunata riquëzankunawan yanapäyänanpaq.

¹⁹ Tayta Diosman yärakur alikunata rurarqa mana ushakaq kawaytami tariyanqa. Saynöparaqmi rasunpaypa ali kawayta tariyanqa.

Carta ushanan

²⁰ Timoteo, wilakuyninta wilakunaykipaq Tayta Dios churaykäshuptikiqa lapan nishqäkunata shumaq cumpliy. Lutan yachasikuqkunataqa ama chaskipaysu. Say runakunaqa yachaq kayashqanta yarparpis manakaqkunalatami yachaykäsiyan.

²¹ Wakinqa lutan yachasikuqkunata chaskiparmi Tayta Diosman yärakuykäyashqanpita witikuyash. Qamta y qamwan kaykaqkunata Tayta Dios imaypis yanapaykuyäläshunki. [Amén.]