1 Timoteo 5 - Tayta Diospa Wilakuynin

Yärakuq mayinkunata respitananpaq yäsishqan

¹ Awkinkunata ama olqutupaysu. Saypa trukanqa taytaykitano respitashpayki ali shimilaykipa tantiyasiy. Maqtakunatapis wawqikitano ali shimilaykipa tantiyasiy.

² Chakwankunatapis mamaykitano respitashpayki ali shimilaykipa tantiyasiy. Saynöla jipashkunatapis panikitano respitay.

Viüdakunata yanapänanpaq yäsishqan

³ Aylluynaq viüdakunata imalawanpis yanapäyay.

⁴ Isanqa mayqan viüdapapis wawankuna o wilkankuna karqa paykuna yanapäyäsun. Kuyar ashmashqanta ama qonqäyäsunsu. Sayno yanapaptinmi Tayta Dios kushikun.

⁵ Aylluynaq kaq viüdakunaqa Tayta Diosman yärakurmi paqasta junaqta payta manakuyan.

⁶ Jusalikuyman churakash viüdakunami isanqa wanush japuy kaykäyan.

⁷ Ayllunkuna viüda kaptinqa yanapäyänanpaq wawqi panikunata yachasiy. Yanapäyaptinqa manami pipis jamuräyanqasu.

⁸ Mamanta, awilanta y wayincho taqkunata mana kamaripaptinqa Tayta Diosman yärakushqanpis manakaqlapaqmi kaykan. Tayta Diosta mana cäsukuq runapitapis peormi kaykan.

⁹ Viüdakunapa jutinkunata listaman churanki soqta chunka (60) watayuq kayaptinraq. Saynöpis kayanman juk runalawan tash,

¹⁰ alita rurayashqanpita shumaq respitash, wamrankunata shumaq ashmaq, wayinman chaqkunata posädasiq, Diosman yärakuqkunata ali shonqunwan yanapaq, muchuqkunata kuyapaq y alita ruraq.

¹¹ Manaraq soqta chunka (60) watayuq kaq viüdakunataqa listanman manami churankimansu. Paykunaqa mana yapapakuypa Jesucristuta sirviyänanpaq promitirkurpis runayuq kaytami yapay munayan.

¹² Yapapakurmi Jesucristuta promitishqantapis mana cumplir jusayuq rikakuyan.

¹³ Qelan waqaptinmi rurayninkunata kachaykur wayin wayin purikuyan. Saynöpis tulu shimi y rayan wishla kayashpanmi manakaqkunata parlar purikuyan.

¹⁴ Sayno mana kayänanpa jipashlaraq viüdakunaqa runawan yapay majasakäyäsun, wawankunata ashmayäsun y wayincho rurayninkunata rurayäsun. Sayno kawayaptinqa contransi kaqkuna manami jamurämäshunsu.

¹⁵ Wakin viüdakunaqa Jesucristuman yärakuykäyashqanta kacharirmi Satanás munashqannöna kawaykäyan.

¹⁶ Mayqan [wawqipapis o] mayqan panipapis aylluncho viüda kaptin paykuna ashmayäsun. Saynöpami wawqi panikuna shuntayashqan aypanqa aylluynaq viüdakunata yanapäyänanpaq.

Mayor wawqikuna shumaq rikash kayänanpaq yäsishqan

¹⁷ Diospa wilakuyninta wilakuq y yachasiq mayor wawqikunata shumaq respitar ali pägayäsun. Saynöla shumaq mandaq mayor wawqikunata respitar pägayäsun.

¹⁸ Tayta Diospa palabranpis kaynömi nikan: <<Ëracho trillaptin töruta ama shinqalwayankisu>>. Saynöpis kaynömi nikan: <>.

¹⁹ Mayor wawqi jusalikuykashqanta ishkaq o kimsaq nishuptikiraq cäsupanki. Juk runala niptinqa ama cäsupankisu.

²⁰ Jusalikuyta mana kachariptinqa lapanpa nawpancho payta rimanki. Sayno rimaptikimi wakinpis mansapakur mana jusalikuyänanpaq tantiyakuyanqa.

²¹ Tayta Diospa, Señor Jesucristupa y payta sirviq angilkunapa nawpanchömi qamta nï: Pipapis favornin mana sharkuylapa kay nishqäkunata cumplinki.

²² Mayor wawqi kananpaq churayta munar pipa umanmanpis makikita lutalaqa ama churankisu. Jusalikuq runaman makikita churarqa qampis jusayuqmi kanki. Kikikipis Tayta Dios munashqannöla kaway.

²³ Pacha nanaywan saynöla qeshyarqa yakulata upunaykipa trukan vïnuta ichik upurkunki.

²⁴ Wakin runakuna jusalikuyashqanqa manaraq tapuptikipis juklami musyakan. Wakin runakuna jusalikuyashqanmi isanqa nirkurraq musyakan.

²⁵ Saynölami wakin runakuna alita rurayashqanpis jukla musyakan. Wakinpanami isanqa nirkurraq musyakan.