1 Timoteo 4 - Tayta Diospa Wilakuynin

Lutan yachasikuqkuna yuriyämunanpaq kashqan

¹ Espíritu Santumi tantiyasimansi shamuq watakunacho wakin runakuna Jesucristuman yärakuyashqanpita qepaman kutikur supaykuna munashqanno lutanta yachasiyänanpaq kashqanta.

² Ishkay cära karmi lutankunata yachasirpis penqakuyanqasu.

³ Say lutan yachasikuqkunaqa majayuq kay mana ali kashqantami niyanqa. Saynöpis wakin mikuykunata mana mikunansipaq kashqantami niyanqa. Mana ali kashqanta niyaptinpis Jesucristuman yärakuqkuna agradëcikur mikuyänanpaqmi Tayta Dios kamash.

⁴ Tayta Dios kamashqankunaqa lapanpis alimi kaykan. Majayuq kaypis Tayta Diospitami kaykan. Sayno kaykaptinqa payta agradëcikur mikuytapis y majayuq kaytapis manakaqman ama churashunsu.

⁵ Tayta Diospa palabranta tantiyakur y payta manakur agradëcikuptinsiqa mikuykunapis y majayuq kaypis alimi kaykan.

Jesucristupa ali sirviqnin kananpaq yachasishqan

⁶ Kay cartacho qelqashqäkunata wawqi panikunata shumaq yachasirqa Jesucristupa ali sirviqninmi kanki. Tayta Diospa wilakuyninta yachakurqa y pay munashqanno kawarqa ali alimentakushnömi kanki.

⁷ Runakuna lutanta yachasishqankunata ama chaskipaysu. Puklaqkuna fïsicata rurayashqanno qampis Tayta Dios munashqanno kawanaykipaq yachakuy.

⁸ Física rurayqa kay pasacho kawashqansiyaqlami ali kaykan. Tayta Dios munashqanno kawaymi isanqa kay pasacho y gloriachöpis ali kawanansipaq kaykan.

⁹ Kay nishqäqa rasun kaqmi kaykan. Saytaqa lapan runakuna chaskikuyäsun.

¹⁰ Sayta tantiyarmi imayyaqpis kawaq Tayta Diosman yärakur imano nakarpis wilakuyninta wilakuykansi. Paymi Jesucristuta chaskikuq kaqtaqa pïmaytapis salvan.

¹¹ Kay cartacho qelqamushqäkunata wiyakuyänanpaq yachasiy.

¹² <> niyaptinpis ama cäsupaysu. Saypa trukanqa wawqi panikuna rikakuyänanpaq ali shimilaykipa pïmaywanpis parlay, mana jusalikuypa kaway, runa mayikita kuyapay, Tayta Diosman imaypis yärakuy y pay munashqanno kaway.

¹³ Chämushqäyaq Tayta Diospa palabranta wawqi panikunata liyipanki, yachasinki y shakyäsinki.

¹⁴ Jesucristuta sirvinaykipaq Espíritu Santu churaykäshuptikiqa lapan shonquykiwan imaypis sirviy. Sayno churashushkanki profëtakuna qampaq wilakuyaptin y mayor wawqikuna umaykiman makinta churaykur Tayta Diosta manakuyaptinmi.

¹⁵ Kay yäsishqäkunata mana qonqaypa imaypis ruray. Ali kawashqaykita rikayäshushpaykimi tantiyayanqa Tayta Dios munashqanno kawaykashqaykita.

¹⁶ Cuidä jusalikunkiman. Saynöpis cuidä lutanta yachasinkiman. Rasun kaqlata yachasir Tayta Dios munashqannöla imaypis kaway. Sayno kawashpaykimi kikikipis salvakunki y yachasishqaykita chaskikuqkunapis salvakuyanqa.