1 Timoteo 3 - Tayta Diospa Wilakuynin

Mayor wawqikuna imano kayänanpaq nishqan

¹ Mayor wawqi kayta munaqkuna alitami yarpaykäyan. Say nishqäqa rasun kaqmi kaykan.

² Mayor wawqikuna kayanman pipitapis mana jamurash, juk warmiyuqla, shumaq tantiyakuq, shumaq yarpachakuskir imatapis ruraq, pïmaypitapis respitash, posädasikuq y shumaq yachasikuq.

³ Saynöpis kayanman mana upyaq, pitapis mana wajupaq, kuyapäkuq, qellaylapaq mana wachakash

⁴ y warminta y surinkunata shumaq ashmaq. Saynöpis surinkunata yachasiyanman cäsukuq y respitakuq kayänanpaq.

⁵ Wayincho taqkunata shumaq mana yachasirqa ¿imanöparaq Tayta Diosman yärakuqkunata yachasiyanman?

⁶ Jesucristuman sayraq yärakuykaqkunaqa manami mayor wawqi kayanmansu. Yachaq tukurqa diablu maldicionash kashqannömi paykunapis maldicionash kayanqa.

⁷ Jesucristuta mana chaskikuq runakunapis rikakuyänanpaq mayor wawqikuna ali kawayäsun. Ali kawayaptinqa paykunapa contran manami pipis parlayanqasu y diablupis toqlanman ishkisinqasu.

Diäcunukuna imano kayänanpaq kashqanpis

⁸ Saynöpis diäcunukuna kayanman respitash, imatapis awnishqanta cumpliq, mana upyaq y rïcu kayta munar mana sakyapakuq.

⁹ Jesucristupa wilakuyninta yachakuyashqannöla mana jusalikuypa kawayanman.

¹⁰ Diäcunu kananpaq manaraq churar imano kawayashqantapis shumaqraq musyayanman. Ali kawayashqanta musyaykurraq diäcunu kayänanpaq churayanman.

¹¹ Diäcunupa warminpis kanman respitash, pitapis mana tumpaq, shumaq tantiyakuq y awnishqanta imaypis cumpliq.

¹² Diäcunukunaqa juk warmiyuqla kayanman. Warminta y surinkunata shumaq ashmayanman.

¹³ Diäcunu kayninta shumaq cumplirqa pïmaypitapis ali rikashqami kayanqa. Mana mansariypami Jesucristuman yärakuyashqanta wilakuyanqa.

Pablo imapaq cartakushqanpis

¹⁴ Timoteo, shamuyta yarparpis puntataqa cartakaykämülaraqmi.

¹⁵ Jukla mana shamuptïpis kay cartata liyirnami tantiyanki wawqi panikunata imano rikanaykipaqpis. Noqansiqa imayyaqpis kawaq Diospa iglesian karmi wilakuyninta wilakunsi y lutan yachasikuqkunata corriginsi.

¹⁶ Tayta Dios musyasimashqansi wilakuynin shumaqmi kaykan. Say wilakuynin kaynömi nikan: Jesucristumi runanöla yurirqan. Wanushqanpita Espíritu Santumi kawarisimurqan. Angilkunapis payta rikayarqanmi. Mana Israel runakunatami wilakuyninta wilakuqkuna wilapäyarqan. Maysaychöpis paymanmi yärakuykäyan. Gloriaman kutiykur Tayta Diospa nawpanchönami kaykan.