1 Timoteo 2 - Tayta Diospa Wilakuynin

Tayta Diosta manakunansipaq yäsishqan

¹ Timoteo, wawqi panikunata shakyäsiy Tayta Diosta agradëcikur lapan runakunapaq imaypis manakuyänanpaq.

² Saynöpis Tayta Diosta manakuyäsun reykunapaq y wakin autoridäkunapaqpis. Ali mandayänanpaq Tayta Dios yanapaptinmi noqansipis jawkala Tayta Dios munashqanno kawashun.

³ Lapan runakunapaq manakurqa salvamaqninsi Tayta Dios munashqannömi manakuykansi.

⁴ Pay munan lapan runakuna ali wilakuyninta chaskikur salvash kayänantami.

⁵ Juklaylami Tayta Diosqa. Tayta Dioswan ali kawanansipaq juk runalami amistasimansi. Say runaqa Jesucristumi.

⁶ Paymi wanush lapan runakunata salvananpaq. Sayno salvakuq kashqantaqa tiempun chämuptinmi Tayta Dios musyasimashkansi.

⁷ Say ali wilakuyta mana Israel runakunata wilapar apostolnin kanäpaqmi Tayta Dios churamash. Saymi yachaykäsï Diospa ali wilakuyninta chaskikur Jesucristuman yärakuyänanpaq. Mana lulakuypami [Jesucristupa jutincho] rasun kaqta nï.

⁸ Noqa munä maycho shuntakarpis mana rimanakuypa ni pitapis mana nanaparaypa wawqikuna makinkunata joqarkur Tayta Diosta manakuyänantami.

Warmikunapaq nishqan

⁹ Warmikunapis kamaraqlata jatikuyäsun. Jamurpaypaq mödanakunata ama jatikuyäsunsu. Saynöpis ama yarpachakuyäsunsu aqsanta aläpa alsakuyänalanpaq ni qoriwanpis ni perlaswanpis adornakuyänalanpaqqa. Aläpa chanin mödanakunatapis ama jatikuyäsunsu.

¹⁰ Saypa trukanqa Tayta Dios munashqanno kawaq warmikunano alikunata rurar kawayäsun.

¹¹ Shuntakäyashqaykicho yachasiyashqanta warmikuna upälala yachakuyäsun.

¹² Noqa manami munäsu warmikuna olqukunata yachasiyänanta ni mandayänanta. Saypa trukanqa upälakuyäsun.

¹³ Sayno nï Adánta kamarkurraq Evata kamash kaptinmi.

¹⁴ Saynöpis manami Adántasu Satanás engañarqan, sinöqa Evatami. Engañaptinmi jusalikuyman ishkirqan.

¹⁵ Sayno kaptinpis warmikuna salvakuyanqa wawankunata shumaq ashmar, Tayta Diosman yärakur, pïmaytapis kuyar, shumaq tantiyakur y Tayta Dios munashqanno kawarmi.