1 Reyes 15 - Tayta Diospa Wilakuynin

Judá nacioncho Abiam rey kashqan

¹ Nabatpa surin Jeroboam chunka puwaq wata Israel nacioncho rey kaykaptinmi Judá nacioncho Abiam rey kayman yaykurqan.

² Jerusaléncho rey karqan kimsa watami. Mamanmi karqan Abisalompa surin Maaca.

³ Rey Abiamqa manami unay ayllun Davidnösu Tayta Diosta lapan shonqunwan cäsukurqan, sinöqa papänin jusalikushqannömi jusalikurqan.

⁴ Sayno kaptinpis Davidta kuyash karmi Abiamta Tayta Dios qarqurqansu rey kashqanpita. Saynöpis Abiam wanuptin surintanami Tayta Dios churarqan Jerusaléncho rey kananpaq.

⁵ Rey Davidqa Tayta Dios munashqanno kawar lapan mandamientunkunatami cumplirqan. Isanqa Davidpa jusan karqan Betsabéwan kakur runan Uríasta wanusishqanmi.

⁶ Jeroboamwan Roboam chikinakur cadala guërrata rurayashqannömi Abiampis Jeroboamwan imaypis guërrata rurayaq.

⁷ Abiam imata rurashqanpis lapanmi qelqaraykan Judá nacionpa mandaqnin reykunapa acta libruncho.

⁸ Abiam wanuykuptinmi Davidpa Markanman pampayarqan. Paypa trukannami surin Asana rey karqan.

Judá nacioncho Asa rey kashqan

⁹ Jeroboam ishkay chunka (20) wata Israel nacioncho rey kaykaptinmi Judá nacioncho Asa rey kayman yaykurqan.

¹⁰ Asami Jerusaléncho rey karqan chusku chunka juk (41) wata. Paypa awilanmi karqan Abisalompa surin Maaca.

¹¹ Rey Asami isanqa unay ayllun Davidno Tayta Dios munashqanno kawarqan.

¹² Say wisanmi wakin runakuna y warmikuna diosninkunata adorar altarkuna kashqancho jukwan jukwan kakuyaq. Say runakunata y warmikunatami Judá nacionpita rey Asa qarqurqan. Saynölami taytan, awilun y awilunpa taytan rurasishqan ïdulukunatapis lapanta ushakäsirqan.

¹³ Asera diösapaq awilan Maaca jawisishqan qerutapis Cedrón raqraman apaykurmi rupasirqan. Nirkurmi say ïduluta rurasishqanpita Maacatapis reina kashqanpita qarqurqan.

¹⁴ Sayno rurarpis markakunacho kaq altarkunataqa Asa manami juchusirqansu. Asaqa wanushqanyaqmi Tayta Dios munashqanno kawarqan.

¹⁵ Saynölami papäninpis y kikinpis Tayta Diospaq rakishqankunata templuman aparqan qorita, qellayta y alhäjakunata.

Rey Ben-adadwan rey Asa parlakuyashqan

¹⁶ Israel runakunapa mandaqnin rey Baasawanmi rey Asa guërrata cadala rurayaq.

¹⁷ Saymi rey Baasa Judá nacioncho kaykaq Ramá markata vinciykur say markaman soldädunkunata churarqan Judápita sayman pipis mana yaykunanpaq ni saypita Judáman pipis mana yarqunanpaq.

¹⁸ Saymi Asaqa Tayta Diospa wayincho y palaciuncho churaraykaq qorita y qellayta jorqur Siria nacionpa mandaqnin rey Ben-adadman apasirqan. Ben-adadqa karqan Tabrimónpa surin y Heziónpa wilkanmi. Payqa Damascuchömi taykarqan. Apasirmi encargakurqan niyänanpaq:

¹⁹ < >>.

²⁰ Sayno manakuptinmi rey Ben-adad awnishpan soldädunkunata y capitanninkunata kacharqan Israel nacioncho kaykaq markakunata atacayänanpaq. Atacarmi acaparayarqan Ijón, Dan y Abel-bet-maaca markakunata, Cineret particho kaq markakunata y Neftalí particho kaq markakunatapis.

²¹ Say markakunata atacayashqanta musyaykurmi rey Baasaqa Ramá markacho cuartilta sharkasinanpaq shuntasishqankunata kachariykur Tirsaman kutikuyarqan.

²² Saymi rey Asaqa lapan Judá runakunata Ramáman qayasirqan. Chäyaptinmi Ramá markata corralaraq rumikunatapis qerukunatapis apayarqan Benjamíncho kaykaq Geba y Mizpa markakunaman. Saykunawanmi say markakunata alsasirqan.

Rey Asa wanushqan

²³ Rey Asa rurashqankuna, guërrakunacho vincishqankuna y markakunata sharkasishqankunapis lapanmi qelqaraykan Judá nacionpa mandaqnin reykunapa acta libruncho. Awkinna karmi chaki nanaywan Asa qeshyaykarqan.

²⁴ Asa wanuykuptinmi Davidpa Markancho unay ayllunkuna pamparaykäyashqan kaqman pampayarqan. Paypa trukannami surin Josafatna rey karqan.

Israel nacioncho Nadab rey kashqan

²⁵ Ishkay watana Judá nacioncho Asa rey kaykaptinmi Israel nacioncho Jeroboampa surin Nadab rey kayman yaykurqan. Nadabqa ishkay watalami rey karqan.

²⁶ Payqa Tayta Diosta mana cäsukur taytan Jeroboamnöla Israel runakunata jusalikasirqan.

²⁷ Juk kutimi lapan Israel soldädunkunata shuntaykur Nadab aywarqan Filistea nacioncho kaykaq Gibetón marka runakunata atacayänanpaq. Sayno atacar markata jiruruypa sapäyaptinmi Ahíaspa surin Baasa contran sharkur Nadabta wanurasirqan. Baasa karqan Isacar trïbu runami.

²⁸ Sayno wanusirqan Judá nacioncho kimsa wata Asa rey kaykaptinmi. Nirkur Baasanami Israel nacioncho rey karqan.

²⁹ Rey kaykarnami Jeroboampita miraqkunataqa lapanta wanusir usharqan. Lapanta sayno wanusirqan Tayta Dios nishqanta profëta Ahías Silucho wilakushqannölami.

³⁰ Sayno päsarqan Israel runakunata kuyaq Tayta Diosta Jeroboam rabyanäsishqanpitami. Sayno rabyanäsirqan jusalikur y Israel runakunatapis jusalikasirmi.

³¹ Rey Nadab wakin rurashqankuna qelqaraykan Israel nacionpa mandaqnin reykunapa acta librunchömi.

³² Israel runakunapa mandaqnin rey Asami rey Baasawan guërrata cadala rurayaq.

Israel nacioncho Baasa rey kashqan

³³ Judá nacioncho Asa kimsa watana rey kaykaptinmi Israel nacioncho Ahíaspa surin Baasa rey kayman yaykurqan. Paymi Tirsa markapita Israel runakunata mandarqan ishkay chunka chusku (24) wata.

³⁴ Baasaqa Tayta Diosta mana cäsukurmi Jeroboamnöla Israel runakunata jusalikasirqan.