1 Pedro 5 - Tayta Diospa Wilakuynin

Mayor wawqikunapaq yäsishqan

¹ Mayor wawqikuna, noqapis qamkunano mayor wawqimi kaykä. Saynöpis Jesucristo nakashqankunata kikïmi rikashkä. Jesucristo kutimur lapansitami shuntamäshun. Saymi qamkunata kayno yäsï:

² Tayta Diosman yärakuqkunata rikayänaykipaq churash kaykarqa uysha misiqkuna uyshankunata rikayashqanno shumaq rikayay. Mana niraykälar rikayänaykipa trukanqa lapan voluntänikiwan rikayay. Ama qellay raykula rikayankisu, sinöqa Tayta Dios munashqanno ashak ashakla rikayanki.

³ Yaqa patronnöqa wawqi panikunata mana aliqa ama rikayankisu. Saypa trukanqa rikakur yachakuyänanpaq ali kawayanki.

⁴ Sayno kawarmi pastorkunapa pastornin Jesucristo kutimuptin imayyaqpis mana ushakaq corönata chaskiyankipaq.

Tayta Diospa makincho imano kawanansipaqpis yäsishqan

⁵ Mözukuna y jipashkuna, mayor wawqikunata cäsukuyay. Lapaykipis mana yachaq tukuylapa respitanakuyay. Yachaq tukuqkunataqa Tayta Dios manami yanapansu. Humildi kaqkunatami isanqa kuyapar yanapan.

⁶ Sayno kaykaptinqa munayyuq Tayta Diosta cäsukur mana yachaq tukuypa kawayay. Paymi tiempun chämuptin respitash kayänaykipaq churayäshunki.

⁷ Tayta Dios yanapaykäyäshuptikiqa lapan lakikuynikikunatapis paypa makinman kachaykuyay.

⁸ Shumaq tantiyakuyashpayki alcäbula kawayay. Chikimaqninsi diablu imayka malaqash leonnömi pitapis jusalikasinanpaq qaparar puriykan.

⁹ Yärakuq mayinsikuna maysaychöpis qamkunano nakaykäyashqanta musyaykarqa Tayta Diosman yärakur diabluta ichipäyay.

¹⁰ Noqansi rayku Jesucristo wanush kaptinmi kuyapäkuq Tayta Dios qayamashkansi gloriacho imayyaqpis kawanansipaq. Saymi kay pasacho nakashqapis Tayta Dios yanapämäshun mana jusalikunansipaq, pay munashqanno kawanansipaq y payman shumaq yärakunansipaqpis.

¹¹ ¡Tayta Dios lapanpaq munayyuq kashqanpita imaypis alabash kaykuläsun! Amén.

Carta ushanan

¹² Wawqinsi Silvanumi kay cartata qelqäsimash. Tayta Dios munashqannömi imaypis pay kawaykan. Kay cartata qamkunapaq qelqaykämü Tayta Dios kuyapaykäyäshushqaykita tantiyakuyänaykipaqmi. Mana ajayaypa imaypis payman yärakuyay.

¹³ Babiloniacho kaykaq wawqi panikunami salüdunkunata apasikayämun. Paykunatapis qamkunatapis Tayta Diosmi akrayäshushkanki. Saynömi kuyashqä wawqi Marcuspis salüdunta apasikamun.

¹⁴ Jukniki juknikipis wamayänakur qaqlaykikunacho musashpayki winchinakuyanki. Jesucristucho kaqkunapaqqa lapaykipaq ali kaway kaykuläsun. [Amén.]