1 Pedro 3 - Tayta Diospa Wilakuynin

Majayuqkunata yäsishqan

¹ Warmikuna, runaykita cäsukuyay Jesucristupa wilakuyninta mana chaskikush kayaptinpis. Sayno cäsukuyaptikimi mana parlapäyaptikipis tantiyakur Jesucristuta chaskikuyanqa.

² Kuyayashqaykita y respitayashqaykita rikarmi tantiyakuyanqa.

³ Kuyaylapaq kayqa manami aqsaykikunata qoshpayäsiysu, qori adornakunata jatikuysu ni chanin mödanakunata jatikuysu kaykan. Saykunaqa janalaykikunatami kamaräsin.

⁴ Saypa trukanqa ali shonqu kayashqayki y pïmaywanpis ali kawayashqaykimi kuyaylapaqqa kaykan. Sayno kawayashqaykimi Tayta Diospa shonqunpaqno kaykan.

⁵ Tayta Diosman yärakuq unay santa warmikunapis manami adornakuyänalanpaqsu yarpachakuyaq, saypa trukanqa runanta respitayänanpaqmi.

⁶ Saynömi Sarapis runan Abrahamta cäsukushpan <> nir shumaq respëtuwan rikarqan. Runakuna chikiyäshuptikipis alilata rurarqa Saranömi kaykäyanki.

⁷ Runakuna, warmikita imano kuyayänaykipaqpis shumaq tantiyakuyay. Warmikitapis qamtapis Tayta Dios kuyayäshushpaykimi salvayäshushkanki. Warmikiqa delicädu väsunömi kaykan. Sayno kaykaptinqa respitar kuyayay. Warmikiwan mana ali kawayaptikiqa manakuyashqaykitapis Tayta Dios manami wiyayäshunkisu.

Kuyanakur kawanansipaq yäsishqan

⁸ Lapaykipis juk shonqula kuyapänakur y say ayllunöla kuyanakur pïmaywanpis yachanänakur kawayay.

⁹ Runa mayiki chikiyäshuptikipis ama chikiyankisu. Ashliyäshuptikipis ama ashliyankisu. Bendicionta chaskiyänaykipaq Tayta Dios akrayäshushqaykita musyaykarqa chikiyäshuqnikikunapis bendicionta chaskiyänanpaq Tayta Diosta manakuyanki.

¹⁰ Tayta Diospa palabrancho kaynömi nikan: <

¹¹ Lutankunata rurayänaykipa trukanqa alilata rurayay. Rimanakuyänaykipa trukanqa piwanpis ali kawayay.

¹² Alilata ruraqkunataqa Tayta Dios imaypis rikanmi. Manakuyashqantapis wiyanmi. Mana ali ruraqkunatami isanqa rikaytapis munansu>>.

Nakarpis mana lakikunansipaq yäsishqan

¹³ Alilata rurayaptikiqa manami pipis nakasiyäshunkimansu.

¹⁴ Alita ruraykäyaptiki nakasiyäshuptikiqa Tayta Dios yanapäyäshunkimi. Saymi pipitapis mansariyankinasu ni chikiyäshuptikipis lakikuyankinasu.

¹⁵ Lakikuyänaykipa trukanqa Jesucristo ämuyki kashqanta tantiyar pay munashqanno kawayay. Jesucristuman imanir yärakuyashqaykita pipis tapuyäshuptiki tantiyasiyänaykipaq imaypis kamarikushla kaykäyay.

¹⁶ Tantiyasirqa ali shimilaykipa parlapäyanki. Saynöpis runa mayikiwan imaypis ali kawayanki. Sayno kawayashqaykita rikarmi washaykita rimaqkuna penqakuyanqa.

¹⁷ Lutanta rurayashqaykipita nakayänaykipa trukanqa mas alimi kanman Tayta Dios munaptinqa alita rurayashqaykipita nakayaptikipis.

¹⁸ Jesucristupis jusaynaq kaykarmi jusasapakuna rayku nakarqan. Tayta Diosman pushamänansipaqmi jusalikushqansipita juk kutila wanurqan. Wanuptinpis Espíritu Santumi kawarisimurqan.

¹⁹ Espíritu Santupa munayninwanmi prësu wichqaraykaq espïritukunaman wilaq aywarqan.

²⁰ Say espïritukunaqa Noé kawashqan wisan Diosta mana wiyakuqmi kayarqan. Say wisan runakuna jusalikuyaptinpis Tayta Dios manami juklasu castigarqan, sinöqa shuyararqan arca rurayta Noé ushashqanyaqmi. Say arcaman puwaq runakunalami yaykuyarqan. Paykunalami yaku aynasiptin diluviupita salvakuyarqan.

²¹ Say yakuqa bautizakushqansi yakunömi kaykan. Bautizakushqansiqa manami cuerpunsi limpiu kananpaqsu kaykan, sinöqa jusalikuykunata kacharir Tayta Dios munashqanno kawanansipaqmi. Saymi Jesucristo kawarimush kaptin salvakunsi.

²² Paymi jana pasaman kutikushna kar Tayta Diospa aluq kaq nawpanchöna kaykan. Saymi angilkunapis munayyuqkunapis paypa munaynincho kaykäyan.