1 Juan 5 - Tayta Diospa Wilakuynin

Tayta Diospa Surinman yärakunansipaq nishqan

¹ Jesús salvamaqninsi Cristo kashqanta criyiqkunaqa lapanpis Tayta Diospa wamranmi kaykäyan. Tayta Diosta kuyarqa wamrankunatapis kuyansimi.

² Wamrankunata kuyashqansita musyansi Tayta Diosta kuyar mandamientunkunata cumplirmi.

³ Tayta Diosta kuyarqa mandamientunkunata cumplinsimi. Mandamientunkunata cumpliyqa manami ajasu kaykan.

⁴ Sayno ajasu kaykan Tayta Diospa wamrankuna Satanásta vincish kayaptinmi. Payta vincinsi Tayta Diosman yärakurmi.

⁵ ¿Pitaq Satanásta vincin? Jesucristo Tayta Diospa Surin kashqanta criyiqkunalami vincin.

Jesucristo salvamaqninsi kashqan

⁶ Jesucristo Diospa Surin kashqanta musyansi bautizakushqan höra wamran kashqanta Tayta Dios nimush kaptin y yawarninta jichar wanush kaptinmi. Manami bautizakuptin Tayta Dios nimush kalaptinsu musyansi, saypa trukanqa yawarninta jichar wanush kaptinmi. Saynöpis Diospa Surin kashqanta musyansi Espíritu Santu tantiyasimashqami. Espíritu Santu tantiyasimashqansiqa rasun kaqmi kaykan.

⁷ Jesucristo Diospa Surin kashqanta musyasimansi [jana pasacho kaykaq] kimsa testïgukunami. [Say testïgukuna kaykäyan Tayta Dios, Surin Jesucristo y Espíritu Santumi. Paykuna kimsaq karpis juklaylami kaykan.

⁸ Saynölami kay pasachöpis kimsa testïgukuna musyasimansi.] Say testïgukuna kaykäyan Espíritu Santu, Jesucristo bautizakushqan y wanur yawarninta jichashqanmi. Say kimsa testïgukuna saylatami musyasimansi.

⁹ Runa wilapämashqansita criyiykarqa Tayta Dios nimashqansitaqa masraq criyishun. Surin Jesucristupita Tayta Dios nimashqansiqa masmi välin runakuna wilapämashqansipitapis.

¹⁰ Jesucristo Diospa Surin kashqanta criyiq kaqqa Tayta Dios tantiyasishqanta criyinmi. Jesucristo Diospa Surin kashqanta mana criyiq kaqmi isanqa Tayta Dios tantiyasishqantapis criyinsu. Mana criyirmi Tayta Diosta manakaqman churan.

¹¹ Mana ushakaq kawayta qomashqansitami Tayta Dios tantiyasimashkansi. Say kawaytaqa tarinsi Surin Jesucristuta chaskikurmi.

¹² Tayta Diospa Surinta chaskikuq kaqqa mana ushakaq kawaytami tarin. Mana chaskikuq kaqmi isanqa say kawayta tarinqasu.

Carta ushanan

¹³ Tayta Diospa Surinman yärakuyaptikimi kay cartata apaykäsimü mana ushakaq kawayta tariyashqaykita musyayänaykipaq.

¹⁴ Tayta Dios munashqanno kananpaq imatapis manakushqaqa wiyamashqansitami musyansi.

¹⁵ Wiyamashqansita musyarmi manakushqansino yanapämänansipaq kashqantapis musyansi.

¹⁶ Mayqaykipis wawqi panikuna jusalikushqanta musyarqa paykunapaq Tayta Diosta manakuyay. Perdonananpaq kaq jusa kaptinqa Tayta Dios perdonanqami. Mana perdonananpaq kaq jusa kaptinqa Tayta Diosta ama manakuyaysu.

¹⁷ Mana ali rurayqa lapanpis jusalami. Sayno kaptinpis Tayta Dios mana perdonananpaq kaq jusa kaykanmi.

¹⁸ Musyansimi Tayta Diospa wamran kashpansi manana jusalikushqansita. Saynöpis Tayta Diospa Surin Jesucristumi Satanáspita sapaykämansi.

¹⁹ Musyansimi Tayta Diospa wamranna kashqansita. Saynöpis musyansimi intëru kay pasa Satanáspa munaynincho kaykashqanta.

²⁰ Musyansimi Tayta Diospa Surin Jesucristo kay pasaman shamur Tayta Diosta reqinansipaq tantiyasimashqansita. Saymi Tayta Diospa y Surin Jesucristupa makincho kawaykansi. Jesucristuqa kikin Diosmi kaykan. Paymi mana ushakaq kawayta qomansi.

²¹ Kuyay wamräkuna, ima ïdulukunamanpis ama yärakuyaysu. [Amén.]