1 Juan 1 - Tayta Diospa Wilakuynin

¹ Kawasikuq Palabrapitami qamkunaman qelqamü. Paymi imapis manaraq kaptin mayna kaykarqan. Paytami rikayashkä, yatayashkä y wiyayashkä.

² Say Kawasikuqta Tayta Dios kachamuptinmi payta rikayarqä. Saymi qamkunata wilayä mana ushakaq kawayta qaramaqninsi kashqanta. Paymi Tayta Dioswan kaykashqanpita noqansiman shamush.

³ Rikayashqäta y wiyayashqätami qamkunata musyaykäsiyä. Saynöpami Tayta Diospa y Surin Jesucristupa nawpancho kawayashqäno qamkunapis paypa nawpancho kawayankipaq.

⁴ Saykunata qelqaykämü kushish kawanansipaqmi.

Mana jusalikuypa kawanansipaq nishqan

⁵ Jesucristo yachasiyämashlantami wilayä: Tayta Diosqa aksimi. Paycho manami ima sakaypis kansu.

⁶ Saymi mayqansipis <> nikar sakäpakushno purirqa lulakuykansi. Sayno kawarqa manami rasunpaypasu Tayta Dios munashqanno kawaykansi.

⁷ Tayta Dios asikyaycho kashqanno noqansipis asikyaycho kawarmi jukninsi jukninsi kuyanakuykansi. Saynöpis Surin Jesucristumi yawarninwan lapan jusansita maylamansi.

⁸ Mayqansipis jusaynaq tukurqa manami rasun kaqtasu parlaykansi, sinöqa lulakuykansimi.

⁹ Jusalikushqansipita perdonta manakushqami isanqa promitimashqansita cumplir Tayta Dios perdonamäshun. Payqa alilata ruraq karmi lapan jusansita maylamäshun.

¹⁰ Jusaynaq tukurqa pay nishqankunata manakaqmanmi churaykansi. Sayno karqa manaraqmi wilakuyninta chaskikushkansiraqsu.