1 Corintios 8 - Tayta Diospa Wilakuynin

Ïdulukunapaq pishtayashqan aysapita yachasishqan

¹ Ïdulukunapaq pishtayashqan aysakunapita tapukayämashqaykita kanan tantiyasiyäshayki. Musyämi <> niyashqaykita. Sayno niyaptikipis wakin yachaqkunaqa orgullösumi rikakuyan. Kuyapäkuq kaqkunami isanqa runa mayinta ali yanapäyan.

² Yachaq kayashqaykita yarparpis manami rasunpaypaqa yachaqsu kaykäyanki.

³ Rasunpaypa yachaq runaqa Tayta Diostami kuyan. Sayno runataqa Tayta Diospis reqinmi.

⁴ Ïdulukunapa jutincho pishtayashqan uywakunata mikunansipaq o mana mikunansipaq kashqantapis kanan tantiyasiyäshayki. Musyashqansinöpis ïdulukunaqa manami kawayansu ni munayyuqsu kayan. Saynöpis musyansimi Tayta Dios juklayla kashqanta.

⁵ Sayno kaptinpis wakin runakuna yarpäyan jana pasachöpis y kay pasachöpis saysika dioskuna kayashqantami.

⁶ Sayno yarpäyaptinpis noqansipaqmi isanqa juklayla Dios kaykan. Payqa Tayta Diosmi kaykan. Lapantapis paymi kamash. Noqansipis payta sirvinansipaqmi kawansi. Señor Jesucristupis juklaylami kaykan. Paywanmi Tayta Dios lapantapis kamarqan. Paymi kawaytapis qomansi.

⁷ Sayno kaptinpis manami lapan wawqi panikunasu saykunata tantiyayan. Wakinkunaqa ïdulukunata nawpata adorash karmi ïdulukunapaq pishtayashqan aysata mikuyta munayannasu. Say aysata mikurqa jusalikuyashqantami yarpäyan.

⁸ Manami aysata mikushqansipitasu Tayta Dios mas kuyamansi y aysata mana mikushqansipitasu mënus kuyamansi, sinöqa mikushqapis mana mikushqapis iwal-lami kuyamansi.

⁹ Ïdulupaq pishtayashqan aysata mikuyänaykipaq libri kaykarpis cuidä mikuyashpayki manaraq shumaq tantiyaq wawqi panikunata jusalikasiyankiman.

¹⁰ Yachaq kayashqaykita yarparmi wakinnikiqa ïdulukunapa templuncho aysata mikuykäyanki. Say aysata mikuykaqta rikayäshushpayki ¿manasuraq shumaq manaraq tantiyaq wawqi panikunapis say aysata mikuyta munayanqa?

¹¹ Saynöpami yachaq kayashqaykita yarparpis say wawqi panikunata jusalikasiyanki. Sayno jusalikasiyanki paykuna rayku Jesucristo wanush kaykaptinpis.

¹² Mana tantiyaq wawqi panikunata sayno jusalikasirqa Jesucristupa contranmi ruraykäyanki.

¹³ Aysata mikushqansipita yärakuq mayinsi ïduluta yapay adoraptinqa aysata imaypis ama mikushunnasu.