1 Corintios 1 - Tayta Diospa Wilakuynin

Carta qalaykunan

¹ Jesucristupa apostolnin kanäpaq Tayta Dios qayamash kaptinmi noqa Pablo wawqinsi Sósteneswan cartakaykäyämü.

² Corinto markacho Tayta Dios kuyashqan yärakuq mayikuna: Qamkunapaqmi Tayta Dios kayno nirqan: <>. Sayno kayaptikimi qayayäshushkanki pay munashqanno santu kawayänaykipaq. Saynölami maycho täyaptinpis payman lapan yärakuqkunata qayash. Saymi Jesucristuqa paykunapapis y noqansipapis Señorninsi kaykan.

³ Papäninsi Tayta Dios y Señor Jesucristo kuyapäyäshushpayki ali kawayänaykipaq yanapaykuyäläshunki.

Tayta Diosta Pablo agradëcikushqan

⁴ Tayta Diostami qamkunapaq imaypis agradëcikü. Jesucristuwan juklaylano kayaptikimi kuyapäyäshushpayki imaypis yanapaykäyäshunki.

⁵ Lapanchöpis yanapäyäshuptikimi tantiyaykäyanki y ali wilakuykäyanki.

⁶ Jesucristupa wilakuyninta chaskikuyänaykipaq yanapäyäshushqaykinölami kananpis yanapaykäyäshunki.

⁷ Saymi Señor Jesucristo kutimushqanyaq shuyakuyaptiki ima yachaynikikunapis pishïyäshunkisu.

⁸ Paymi yanapaykäyäshunki kutimur pay munashqanno kawaykaqta tariyäshunaykipaq.

⁹ Tayta Diosqa promitishqanta imaypis cumplinmi. Paymi Surin Señorninsi Jesucristuwan juklaylano kawayänaykipaq qayayäshushkanki.

Juk shonqula kawayänanpaq yachasishqan

¹⁰ Wawqi panikuna, Señor Jesucristupa jutinchömi qamkunata ruwä mana chikinakuypa juk shonqula y say yarpayla kawayänaykipaq.

¹¹ Paninsi Cloé ayllukuna shamurmi wilayämash kikikikunapura chikinakur rimanakur kawaykäyashqaykita.

¹² Wakinnikishi noqata qatiräyämashqaykita nikäyanki, wakinnikishi Apolusta qatiräyashqaykita nikäyanki, wakinnikishi Cefasta qatiräyashqaykita nikäyanki y wakinnikinashi Jesucristuta qatiräyashqaykita nikäyanki.

¹³ Sayno nirqa lutantami nikäyanki. ¿Jesucristuqa askaman rakikashsuraq kaykan? ¿Noqasuraq qamkuna rayku cruzcho wanushkä? ¿Noqapa jutïchösuraq bautizakuyashkanki?

¹⁴ Tayta Diostami agradëcikü qamkuna kaqcho kar Crisputawan Gayulata bautizashqäpita.

¹⁵ Sayno kaptin manami mayqaykipis niyankimansu noqapa jutïcho bautizakuyashqaykita.

¹⁶ Saynöpis Estéfanaspa ayllulantami bautizashkä. Saypita mastaqa manami pitapis bautizashqäta yarpaqsu.

¹⁷ Manami runakunata bautizar purinäpaqsu Jesucristo kachamash, saypa trukanqa ali wilakuyninta wilakur purinäpaqmi. Wilakuyninta wilakurqa manami yachaq kashqäta runakuna yarpäyänanpaqsu wilakü. Yachaq tukur wilakurqa Jesucristo cruzcho wanushqantami manakaqman churäman.

Jesucristupa wilakuyninta chaskikuqkunata Tayta Dios salvashqan

¹⁸ Jesucristo cruzcho wanushqanta wilakuptïmi infiernuman qaykush kayänanpaq kaqkunaqa niyan manakaqkunata wilakushqäta. Sayno niyaptinpis salvash kaqkunapaqqa say wilakuy Tayta Diospa poderninmi kaykan.

¹⁹ Tayta Diospa palabranchöpis kaynömi qelqaraykan: <>.

²⁰ Sayno kaptinqa yachaqkuna yachayashqanpis ¿imapaqtaq välin? Ley yachasiqkuna yachayashqanpis ¿imapaqtaq välin? Kay pasacho yachaqkuna apänakushqanpis ¿imapaqtaq välin? Jesucristuta mana chaskikuq runakuna yachayashqanpis Tayta Diospaq manakaqlami kaykan.

²¹ Paymi yachaq kar kamakäsirqan runakuna yachaq kayninwan payta mana reqiyänanpaq. Saymi wilakuynin manakaq kashqanta yarpäyaptinpis wilakuyninta chaskikuqkunataraq salvan.

²² Israel runakunaqa Jesucristuta chaskikuyänanpaq milagrukunataraqmi rikayta munayan. Griego runakunanami yachaqkuna niyashqanno Diospa wilakuynin kananta munayan.

²³ Sayno munayaptinpis noqakunaqa Jesucristo noqansi rayku cruzcho wanushqantami wilakuyä. Sayno wilakuyaptïmi Israel runakuna rabyakuyan. Mana Israel runakunanami manakaqkunata wilakuyashqäta yarpäyan.

²⁴ Tayta Dios qayashqan kaqkunami isanqa Israel runa karpis mana Israel runa karpis tantiyakuyan Jesucristo Tayta Diospa podernin y yachaynin kashqanta.

²⁵ Saymi wilakuyashqä upa runakunalapaq kashqanta yarpäyaptinpis yachaq runakunapa yarpayninpita mas ali kaykan. Saynömi Jesucristo cruzcho wanushqanta manakaqman churayaptinpis payman yärakuqkunataqa Tayta Dios munayninwan salvaykan.

²⁶ Wawqi panikuna, Tayta Dios qayashushqayki wisan imano kayashqaykitapis yarpäyay. Qamkunaqa juk ishkaylami yachaq kayarqayki, juk ishkaylami munayyuq kayarqayki y juk ishkaylami rïcu kayarqayki.

²⁷ Mana yachaq kayashqaykita runakuna yarpäyaptinpis qamkunatami Tayta Dios akrayäshushkanki yachaqkuna tantiyakur penqakuyänanpaq. Saynölami munayniynaq kayashqaykita yarpäyaptinpis Tayta Dios akrayäshushkanki munayyuq runakuna tantiyakur penqakuyänanpaq.

²⁸ Manakaqman churayashqan runakunata salvananpaq Tayta Dios sayno akraptinmi musyansi pipis yachaq kayninpaqa ni munayyuq kayninpaqa mana salvakunanpaq kashqanta.

²⁹ Sayno kaptinqa Tayta Diospa nawpancho manami pipis alabakunqasu.

³⁰ Qamkunataqa Jesucristucho kayänaykipaqmi Tayta Dios salvayäshushkanki. Noqansi raykumi Jesucristuta Tayta Dios churarqan yachayninsi kananpaq, salvamaqninsi kananpaq, perdonamaqninsi kananpaq y rantimaqninsi kananpaqpis.

³¹ Sayno kaykaptinqa ama alabakushunsu. Tayta Diospa palabranchöpis kaynömi qelqaraykan: <>.