ZAKKAARIYAASI 12 - Qullaawa Maxaafa

YERUSAALAME GATTANNO GEDE UYINOONNI HEXXO

¹ Gordo diriirsinohu, baatto kalaqinohu, mannahono heeshshote foole uyino Kaaliiqi Israeelete soyino sokka,

² «Yerusaalame gaangaawisera noo manni age gaggawanno gede, moola woyinete xajje anganni finiincho asseemmose; Yerusaalamenniha kinchu huxxa doyissitanno yannara Yihudu katammano gaangeessitanno.

³ Ikkollana kayinni hakku barri iillanno woyite, Yerusaalame daga baala dukke kayissannokki kinchi gedeeta asseemmose. Ise kayisara wo'naalannohu baalu umosi gawajjanno; gosa baala ise miiccara mimmitoho garo ikkite dagganno.

⁴ Hatte yannara, faraddansa dammasseemmo; faradaasinensano macharaarseemmo; diinnansa faradono balliseemmo; Yihudu manna kayinni seekke agareemmo.

⁵ Hakka waro, Yihudu gashshaano wodaninsanni, ‹Olantote Mootichi Kaaliiqi Maganonsa ikkinohura, Yerusaalamete hee'ranno manni wolqa afi'rino› yitanno.

⁶ «Hatte yannara, Yihudu gashshaano dubboho qansoonnitenna iillino gide ittanno giira gedeere asseemmonsa; gaangaawinsara noo gashshoote baala guddanno; Yerusaalamete manni kayinni, katamu giddo keere hee'ranno.

⁷ «Ani Kaaliiqi balaxe Yihudu olantora qeelle eemmonsa; kunni garinni Daawiti sirchinna Yerusaalamete manni afi'rino ayirrinyi, Yihudu manni afi'rino ayirrinyinni dirooranno.

⁸ Hatte yannara, Kaaliiqi Yerusaalamete heedhannorira go'linanni wonqo ikkannonsa; insa giddonni lowo geeshsha wolqiweeloho yinoonnihu nafa Daawiti gedee jawaata ikkanno. Daawiti sirchi Maganu gede woy Kaaliiqi sokkaasinchi gede ikke albisannonsa.

⁹ Hatte yannara, Yerusaalamete aana diinoomunni ka'anno gashshootuwa baala nookkihu gede assammora kaeemmo.

QASAMINOHU DAAFIRA DADILLINOONNI DADILLE

¹⁰ «Daawiti sirchiranna gattinorira Yerusaalamete mannira mararrotenna huuccattote wodana qoleemmonsa; kunnira, qassinoha illetenni la'e, afi'rino mitto shii'rino manchi gede ikkite wi'litannosi; bayiru beetti reyinosi manchi gede hururante wi'litannosi.

¹¹ Hatte yannara, Yerusaalamete macciishshinanni wi'la Megido Xawira Hadaadiremoonira wi'lini wi'la gedeeta ikkitanno.

¹² Gobbate aana noo manni maate maatentenni wi'lanno; kunni garinni Daawiti sirchi meentunna labballu addinni, Naataani sirchino meentunna labballu addinni wi'lanno.

¹³ Leewi sirchi meentunna labballu addinni, Shimi"i sirchino meentunna labballu addinni wi'lanno.

¹⁴ Gatino mannino maate maatensanni beehame wi'lanno; meentunna labballuno addinni wi'lanno» yitannote.