ZAKKAARIYAASI 1 - Qullaawa Maxaafa

MAGANU MANNASI ISIWA HIGANNO GEDE WOSHSHI

¹ Daariyoosi Faarisi gobbara moohihunni layinki diro settikki aganira, Maganu Iddora beettu beetti Berakiya ilinohu himanaanchu Zakkaariyaasi widoonni qole coyi'rino himani aane nooho:

² Olantote Mootichi Kaaliiqi Zakkaariyaasi mannaho, «Ani Kaaliiqi akaakka'nera lowo geeshsha hanqoommo;

³ xa kayinni ki'nera yeemmo'neti: Ani ki'newa higeemmona, ki'neno anewa higge.

⁴ Akaakka'ne ha'ruma hadhinoonte; insa albi himanaano, busha doogonsanninna bushu loosinsanni higganno gede qorophisiissinonsa; insa kayinni, qaale'ya dimacciishshitino; hajajo'yano diwonshitino.

⁵ Akaakka'neno ikkito insa yannara noo himanaano kune xa lubbotenni dino.

⁶ Soqqamaano'ya ikkitino himanaano widoonni qole akaakka'nera hajajonna qorophishiishsha oommonsa; insa kayinni lashshi assitino daafira, shettote qarri amadinonsa; hakkunni gedensaanni aagintaabbe, ‹Olantote Mootichi Kaaliiqi qaafonkenna loosinke garinni, ninkera malino qoricha isi hedinoha uyinonketa huwantoommo› yitino» yii.

FARADU DANINNI LEELTINO AJUUJA

⁷ Daariyoosi moohihunni layinki diro, Shabaaxi yinannihu tonaa mitikki agani eihunni lemiina shoolki barra, Maganu hashsha ajuujatenni kulinoe coyi konneeti:

⁸ Mittu sokkaasinchi duumo farashsho gulufe nooha afoommo; isino lagichu giddo uddote haqqe mereero uurre no; isira badheenni duumu, hamarunna waajju faradi uurre no.

⁹ Anino, «Mooticha'ya, kuni faradinna faradaasine mayinnite?» yee xa'mummo. Isino, «Mayinnitero leellisheemmohena agari;

¹⁰ insa Kaaliiqi baatto dooyyitara soyinoreeti» yiie.

¹¹ Faradaasineno uddote haqqe mereero uurre noohura Kaaliiqi sokkaasinchira, «Baatto baalanta gaangaambe la'noommo; kuneeti baattote aana noo manni baalu kadame sammi yee no» yite kultusi.

¹² Sokkaasinchuno, «Olantote Mooticha Kaaliiqa'ya! Yerusaalametenna Yihudu katamma baalantera hanqittonkunni kuneeti xa 70 dirooti; maarattonsara kunni ka'a mageeshshi yanna gattino?» yee xa'mi.

¹³ Kaaliiqino ane ledo hasaawanni noo sokkaasinchira, hagiirsiisannonna jawaachishanno qaalinni coyi'risi.

¹⁴ Kunnira, ane ledo hasaawanni noo sokkaasinchi, «Olantote Mootichi Kaaliiqi, ‹Qullaawu Katami'yara Yerusaalamete lowo baxillinna lowo laala nooe.

¹⁵ Boonaleeyyete wole gobba dagara, lowo geeshsha hanqoommo; kaimuno, ani manna'ya shiima geeshsha calla qorichishate hede hee'reenna, insa kayinni quwa sayisse gawajjitinonsahuraati.

¹⁶ Kunnira, Yerusaalamete Katama maarammora galagale dayemmo; Qullaawu Mini'yanna katamu gatamaramanno› yiino yite lallawi» yiie.

¹⁷ Sokkaasinchu layinkimeeshshono, «Olantote Mootichi Kaaliiqi, ‹Katamma'ya galagalte lowo geeshsha qawaaxxidhanno; Yerusaalamete mannano galagale jawaachisheemmo; qoleno umi'yare assi'reemmonsa› yiino» yii.

BUUDDATE DANINNI LEELTINO AJUUJA

¹⁸ Wole ajuujanni, 4 handu buudda afummo.

¹⁹ Ledo'ya hasaawanni noo sokkaasincho, «Tini buudda mayinnite?» yee xa'mummo. Isino, «Tini buudda Yihudu, Israeeletenna Yerusaalamete manni billaallanno gede assituri wolqaataamma gosaati» yiie.

²⁰ Hakkunni gedensaanni, Kaaliiqi siwiilu meencho amaddinore siwiila tuntannore 4 manna leellishie.

²¹ Anino, «Kuni manni ma assara dayinoho?» yee xa'mummo. Isino daware, «Insa Yihuda co'o assite huntara, mannu billaalle ba"anno gede assitara dagate gashshaano masissaranna cancantara dagginoreeti» yiie.