YOONAASI 3 - Qullaawa Maxaafa

YOONAASI NENNEWE HA'RI

¹ Kaaliiqi layinkimeeshsho Yoonaasira,

² «Ka'e hakkonne jawa katama Nennewe marte, ani kuloommohe coye lallabbe kuli» yiisi.

³ Yoonaasino Kaaliiqira hajajame kae Nennewe ha'ri. Nennewe Katami lowo geeshsha hala'lado ikkino daafira, qaccetenni qaccete geeshsha iillate 3 barra adhanno.

⁴ Yoonaasi mitto wo'ma barra ha're mare katama iille, «Nennewe 40 barri giddo ba"anno» yii.

⁵ Nennewe mannino Maganu yiino coye ammani. Ita agano agure, cubbinsara gaabbinota egensiisate aja akkala yinikkinni baalunku xiddu uddano uddi'ri.

⁶ Nennewe moote konne coye macciishshe, ayirradu barcimisi aaninni dirre, mootimmate uddanosi fushshe xiddu uddano uddi're buluulu aana ofolli.

⁷ Nennewe mannirano, «Mootenna gashshaano yitino garinni, mannuno ikko saada, laluno ge'reewuno mittoreno itoonke; agoonke.

⁸ Mannuno saadano baalunku xiddite, Maganunniwa higge raarto. Mannu baalunku bunshesinna xagarrosi aguro.

⁹ Baotenni ganteemmo gede, miteekke Maganu marare waajjishannoha hanqosi agurannoha ikkanno» yii.

¹⁰ Maganu, Nennewe manni assinorenna bunshe agure higinota lai; kunnira, marare abbara hedino bao aguri.