YOONAASI 2 - Qullaawa Maxaafa

YOONAASI HUUCCATTO

¹ Yoonaasi qulxu'michu godowi giddo hee're Kaaliiqa Maganosi,

² «Kaaliiqa'ya, qarrame hee're ate woshshi'roommo; atino yee yoottoe. Kaa'lo afi'rate yee, jeennaatu giddo raaroommo; atino raare'ya macciishshoottoe.

³ Baaru giddo tugge, diimete woroonni sayisoottoe. Wayino egemminoe; wolqaataamu dambalikkino aana'yaanni hige sai.

⁴ Ani atewiinni horo baoommohanna, Qullaawu Minikkirano galagale higeemmokkiha lawinoe.

⁵ Wayi beeshshe amadinoe; baaruno gudise egemmie. Wayi giddo fultannoti, seeddaanna hayisso umoho xaaxantue.

⁶ Ilaallate hundi geeshsha lixummo; hegere geeshsha cufante heedhanno baatto dirrummo. «Ati Kaaliiqi Magani'ya kayinni, ane diimete giddonni fushshite, lubbo'ya gatisoottoe.

⁷ Lubbo'ya daaqqu yannara, ate Kaaliiqa'ya qaage huucci'roommo; atino Qullaawa Minekki heedhe macciishshoottoe.

⁸ «Kaphu maganna hoode hadhannori baalu, ate hexxa agurtino.

⁹ Ani kayinni galatu faarsonni, atera kakkalo shiqishi'reemmohe; xa'noommo xanono uyi'reemmohe. Gato ate Kaaliiqiwiinniiti» yee huucci'ri.

¹⁰ Hakkunni gedensaanni Kaaliiqi qulxu'micho hajajeenna, Yoonaasi masse baaru qaccera tufisi.