YOONAASI 1 - Qullaawa Maxaafa

YOONAASI KAALIIQIRA HAJAJAMA GIWI

¹ Mitto barra, Kaaliiqi Amiitayi beetti Yoonaasira,

² «Ka'e jawa katama Nennewe mari; hakko katami manni loosino bunshe afoommona, qoonqokki naggi assite lallawi» yii.

³ Yoonaasi kayinni Kaaliiqiwiinni miliqe, Terseesi ha'rate kai; Iyophe dirre Terseesi hadhanno markaawe afi'ri. Hasiisanno woxe baaxxe markaawete giddora ei; Kaaliiqiwiinni miliqe markaawete giddo noori ledo Terseesi ha'rate kai.

⁴ Kaaliiqi kayinni baaru aana jawaata bubbe kayisi; baaru aana wolqaataamu dambali kaino daafira, markaawe hiiqqamate gamba yitu.

⁵ Markaawete giddo noo manni waajjino daafira, baalunku umi umisi maganiwa hige raari; markaawete hogowi shotanno gede hogophitinore fushshite baaru giddo tuggu. Yoonaasi kayinni markaawete woriidi kifile dirre goxe bae no.

⁶ Markaawete hajajaanchino isiwa shiqqi yee, «Tenne yannara mayira goxootto? Miteekke marare gatisannonkeha ikkannona, ka'e maganokki huuccinke» yitu.

⁷ Markaawete giddo noori mimmitoho, «Kunni qarri giddo umbeemmo gede kaima ikkinonkehu ayetiro afate, amme hixa ga'ninona» yitu. Ga'nitino hixino Yoonaasi aana uwi.

⁸ Kunnira, «Hanni kulinke! Kunni iillinonke qarrira kaimu ayeti? Atehu loosikki maati? Maminni dayottoho? Gobbakki hiikkooti? Gosakki mamaati?» yite xa'mitusi.

⁹ Yoonaasino, «Ani Ibiraawichaho; baattonna baara kalaqinoha gordu Magano Kaaliiqa magansi'reemmo» yee dawari.

¹⁰ Balaxe kulinonsa garinni Yoonaasi Kaaliiqiwiinni miliqe ba"anni nooha ikkinota affe lowo geeshsha waajjitino daafira, «Konne busha coye mayira loositto?» yitusi.

¹¹ Dambalu lowo geeshsha wolqa lexxanni ha'rino daafira markaawete giddo noo manni, «Dambalu uurranno gede ate ma assinummoro woyyannoha lawannohe?» yee xa'misi.

¹² Yoonaasino, «Kuni dambali ki'ne aana dayinohu ane saonni ikkinota afoommona, ane fushshitine baaru giddo tugge; hakkunni gedensaanni dambalu uurranno» yiinsa.

¹³ Markaawete giddo noo manni kayinni, afi'rino wolqa baalatenni laaqi'ranni qacce fulate olami; ikkollana, dambalu wolqisinonsa daafira didandiitino.

¹⁴ Kunnira, «Kaaliiqa, kunni manchi lubbo hunnoommo daafira guddootinke; ati hasi'roottore assoottona, keeraancho mancho shinoommohu gede assite kiirtootinke» yite huuccidhu.

¹⁵ Hakkunni gedensaanni Yoonaasi fushshite baaru giddo tuggu. Dambaluno hakkawoyintenni sammi yii.

¹⁶ Markaawete giddo noo manni Kaaliiqa lowo geeshsha waajjino daafira kakkalo shiqishi'ri; xanono xa'ni.

¹⁷ Kaaliiqi, mittu jawu qulxu'michi Yoonaasi egemmanno gede hajaji; Yoonaasino qulxu'michu godowi giddo 3 barranna 3 hashsha keeshshi.