YOHAANNIS AJUUJA 9 - Qullaawa Maxaafa

¹ Ontikki sokkaasinchi xurumba ufuufita, albaanni gordunni ubbinota mitte beeddakko afummo. Isera qile bale fannanni qulfe uyinise.

² Qile bale fantuta, lowo dubbo dolle giirreenna fultanno gedee wiliile qilete giddonni fultu. Baletenni fultino wiliilenni kainohunni gordunna arrishsho tunsitu.

³ Wiliilete giddonni kanchafaru baattote aanira fuli; kanchafareho iddunnite gedee wolqa uyinisi.

⁴ Baattote aana noo hayisso woy aye mu'runo ikkito woy haqqa gawajjitannokki gede kullinsa; Maganu sumudi albinsara nookki manna calla shetissanno gede kulloonninsa.

⁵ Ikkirono, kanchafareho onte agana qarrisanno gede ikkinnina shaate difajjinoonni. Kanchafaru qasa, iddu qaseenna dhiwammannite gedeete.

⁶ Hatte yannara mannu reyo halchanno; kayinni diafi'ranno. Reyara baxanno; reyo kayinni albinni xooqqanno.

⁷ Kanchafaru olaho qixxeessinoonni farado lawanno; uminsa aana noori culkunni seekkinoonni worraaqqa lawanno. Albinsa mannunniha lawanno.

⁸ Uminsa dananchi meyate goodayya lawanno; hinkonsa doobbiichunnite gedeete.

⁹ Gagasinsara, siwiilu uddano labbannoti gagasu uddano noonsa. Qoolinsa giddonni fulanno luuli, lowo faradinna faradi gaare olunniwa hadhanna macciishshinannihu gedeeho.

¹⁰ Farrinsanna iddaanchinsa iddunnihu gedeeho. Farrinsa giddo manna onte agana gawajjitanno wolqa no.

¹¹ Insara moote noonsa; isino qile bale sokkaasinchooti. Su'masi Ibiraawootu afiinni, «Abadooni» Giriikete afiinni, «Apholiyoni» yinanni.

¹² Albiidi aanne'e sa'ino; kuneeti, kunni gedensaanni lame aanne'e dagganno.

¹³ Leelki sokkaasinchino xurumba ufuufi. Maganu albaanni noohunni culkunni seekkinoonni uduunnichi kakkalonnihu aana noo buudda shoolete giddonni fultanno qoonqo macciishshummo.

¹⁴ Hatti qoonqo xurumba anga haa're nooha leelki sokkaasincho, «Lowohu Efiraaxisi Wayi giddo usurante noore shoolenka sokkaasine tiri!» yitu.

¹⁵ Mannu giddonni sayikki anga shitanno gede, kunni woyitira, hakko barrira, hakko aganiranna hakko dirira qixxaabbe noori shoolenti sokkaasine tidhantu.

¹⁶ Faradunni olantanno olanto lame xibbe tunso ikkitinota macciishshummo.

¹⁷ Ajuujatenni afummori faradunna faradaasine kunninni aante noo garireeti: Faradaasine gagasoho uddidhannohu olu uduunnichi giirate gedee duumooti; gordu gedee kuulaatinna arrishshote gedee baqqalaati. Faradu umi doobbiyunniha lawanno; afiinsanni giira, wiliilenna ruqanu fulanno.

¹⁸ Afiinsanni fulannohunni giirate, wiliiletenna ruqanu qoomaminni mannu giddonni sayikki anga shite guddu.

¹⁹ Hakko faradi afoohonna farroho wolqa afi'rino; farrinsa hamashshunniha lawanno. Hamashshu umi noonsa; manna gawajjitannohuno hakkunninniiti.

²⁰ Kunni qoomaminni reyitukkinni gattinori busha looso agurte diaagintaabbino. Durriisahonna culkunni, birrunni, camotenni, kinchunninna haqqetenni seekkinoonnirira la"a, woy macciishsha, woy ha'ra dandiitannokki maganna kaphunnitera soqqama diagurtino.

²¹ Manna shaa, bita, foorrenna moora agurte diaagintaabbino.