YOHAANNIS AJUUJA 8 - Qullaawa Maxaafa

LAMALKI SUMUDI TIDHAMI

¹ Ge'rechu lamalki sumuda tiri woyite, saatete darate wo'ma gordu sammi yii.

² Maganu albaanni uurritannore lamala sokkaasine afummo; insara lamala xurumba uyininsa.

³ Hakkunni gedensaanni wolu sokkaasinchi daye culkunni seekkinoonniha hixaana giirranni uduunnicho haa're daye, kakkalote dargi mule uurri. Qullaawu manni baalu huuccatto ledo shiqishanno gede, ayirradu barcimira albaanni noohu culkunni seekkinoonni uduunnichi aaninni haa'ne lowo hixaana uyinisi.

⁴ Hixaanu wiliile qullaawu manni huuccatto ledo sokkaasinchu anganni Maganu albira fultu.

⁵ Hakkunni gedensaanni sokkaasinchu hixaana giirranni uduunnicho haa're kakkalote darga noo giira giddo wonshe uulla tugi. Banqo, belequ, gugattonna baattote shafama ikki.

LAMALA XURUMBA

⁶ Lamala xurumba anga adhitinori lamala sokkaasine xurumbuwa ufuuffara qixxaabbu.

⁷ Umi sokkaasinchi xurumba ufuufi. Mundee giddo karsantino giiranna kaade baattote aana ubbu; baattonniti sayikki anga giirantu. Haqqeno sayikki anga giirantu; daffitino hayisso baala giirantu.

⁸ Layinki sokkaasinchino xurumba ufuufi. Buwanni noohu lowo ilaali baaru giddo uwi. Hakka woyite baarunniti sayikki anga mundee ikkitu.

⁹ Baaru giddo noorihu lubbo afi'rino kalaqami giddonni sayikki anga ikkannohu reyi. Baaru aana noo markabba giddonni sayikki anga ba'u.

¹⁰ Sayikki sokkaasinchino xurumba ufuufi. Caabbichu gede bubbannoti lowo beeddakko gordu aaninni ubbu. Ubbinohu daaddanno wayibbara sayikki anga aanaatinna bu'a anga sayikkite aanaati.

¹¹ Beeddakkote su'mano Qaraaro yinanni. Wayino sayikki anga qaraarannoha ikki. Qaraarotenni kainohunni lowo manni reyi.

¹² Shoolki sokkaasinchino xurumba ufuufi. Arrishsho sayikki anga, aganu sayikki anga, beeddaheno sayikki anga ganantu. Kunnira, insatino sayikki anga tunsitu. Kunni garinni barru giddonni sayikki anga, hashshuno sayikki anga tunsi.

¹³ Hakkunni gedensaanni, mittu allamurchi iima buuwanna afummo. Qoonqosi naggi asse raaranni, «Gattinori sase sokkaasine xurumba ufuuffanno woyite, xurumbu giddonni fulanno luuli baattote aana noo manna aanne'e, aanne'e, aanne'e!» yaanna macciishshummo.