YOHAANNIS AJUUJA 7 - Qullaawa Maxaafa

XIBBUNNA SHOYILLIINA SHOOLU KUMI MANNI SUMUDA

¹ Hakkunni gedensaanni shoole sokkaasine baattote aana shoolunku ragira uurrite, shoolente bubbe giddonni mitteno baattote woy baaru woy hiitte haqqe aanano bubbissannokki gede amadde hooltu.

² Heeshshote Magani sumuda anga haa'rinoha wole sokkaasincho soojjaatinni daanna afummo. Isi, baattonna baara gawajjitara roorre uyinoonninsariwa shoolente sokkaasinewa mare qoonqosi naggi asse,

³ «Maganinke soqqamaano albira sumuda worrammo geeshsha baatto woy baara woy haqqe gawajjitinoonte» yee raare kuli.

⁴ Hakkunni gedensaanni, sumundoonni manni kiiro macciishshummo; Israeelete ga're baalante giddonni sumundoonni manni kiiro mitto xibbeetinna shoyilliina shoole kumeeti.

⁵ Yihudu ga'renni 12,000, Robeeli ga'renni 12,000, Gaadi ga'renni 12,000,

⁶ Aseeri ga'renni 12,000, Nifitaalemi ga'renni 12,000, Minaase ga'renni 12,000,

⁷ Simiooni ga'renni 12,000, Leewi ga'renni 12,000, Yisaakoori ga'renni 12,000,

⁸ Zaabilooni ga'renni 12,000, Yooseefi ga'renni 12,000, Biiniyaami ga'renni 12,000 manna sumundoonni.

GOSA BAALANTENNI GAMBA YIINO MANNA

⁹ Hakkunni gedensaanni kuneeti ayino kiire dandaannokkiha lowo manna afummo. Kuni manni gosa baalatenni, ga're baalatenni, fiixu fiixunkunninna addi addi afoo coyi'ranno manni giddonni gamba yiinoho. Insa waajjo uddano uddidhe, saattu daro anga amadde ayirradu barcimiranna Ge'rechu albaanni uurrite,

¹⁰ Qoonqonsa naggi assite, «Gato ayirradu barcimira ofollino Maganitenna, Ge'rechunnite» yitu.

¹¹ Maganu sokkaasine baalanti ayirrado barcima, geerranna shoolenka kalaqama doyissite uurrite no; ayirradu barcimira albaanni guluphite umonsa heeshshi assite Magano magansidhanni,

¹² «Hamii'ni! Guweenyu, ayirrinyunna hayyo, galatu, gaamaarre, wolqanna jawaante, hegerenni hegere geeshsha Maganinkera ikkito! Hamii'ni!» yitu.

¹³ Geerru giddonni mittu ane, «Kuri waajjo uddano uddidhinori ayeooti? Hiikkiinni dagginoreeti?» yee xa'mie.

¹⁴ Anino, «Mooticha'ya, ati afootto!» yuummo. Isino, «Kuri lowo qarra qeelte fulte dagginoreeti; uddanonsano Ge'rechu mundeenni hayishshidhe waajjo assidhino.

¹⁵ Kunnira ayirradu Maganu barcimira albaanni uurrite, hashshanna barra Qullaambesi Mine soqqantannosi. Ayirradu barcimira ofollinohu dukkana guggushshannonsa.

¹⁶ Kunni ka'a dihudidhanno; digoodhanno; arrishshono digantannonsa; iibbilluno diqarrisannonsa.

¹⁷ Ayirradu barcimi mereero noo Ge'rechi, allaalaanchonsa ikkanno. Heeshshote buichowa haa're massannonsa. Maganuno hindiiddo baala illensanni feyannonsa» yiie.