YOHAANNIS AJUUJA 6 - Qullaawa Maxaafa

LAMALUNKU SUMUDI TIDHAMI

¹ Hakkunni gedensaanni Ge'rechu lamalu sumudi giddonni umi sumuda tiranna afummo. Hatte yannara shoolunku kalaqami giddonni mittu banqote gede xadhitanno qoonqonni, «Dagge lai!» yaanna macciishshummo.

² Laeemmo woyite alba'yaanni waajju farashshi no! Gulufe noohu anga digaana adhe no. Ba'lattono uyinisi; qeelle adhe hee're, wole qeelle adhate fuli.

³ Maganu Ge'rechi layinki sumuda tiri woyite, layinki kalaqami, «Amo!» yaanna macciishshummo.

⁴ Wolu duumu farashshino fuli. Farashsho gulufe noohura gobbate aaninni keere hunanno gedenna mannu mimmito gudanno gede assara roorre uyinisi; lowo biseno uyinisi.

⁵ Sayikki sumuda tiri yannara, sayikki kalaqami, «Amo!» yaanna macciishshummo. Hakkiicho kolishsho farashsho afummo; farashsho gulufe noohu keenaasincho anga haa're no.

⁶ Shoolunku kalaqami mereerinni, «Mittu barri loosi kirira, kiilote darate ikkitanno qamadenna mitte kiilonna darate ikkanno hayixe calla uyinona. Ikkirono, zayite fulanno ejersanna woyinete haqqicho gawajjitooti!» yaanna macciishshummo.

⁷ Shoolki sumuda tiri woyite shoolki kalaqami, «Amo!» yaanna macciishshummo.

⁸ Hakkunni gedensaanni boora farashsho afummo; gulufinohu su'ma Reyo yinanni; Jeennaatu hoodesi ha'ranni no. Reyotenna jeennaateho baattote aana noo manni giddonni shoolki anga bagadu, hude, dhibbunna moyichu guddanno gede roorre uyininsa.

⁹ Ontikki sumuda tiri yannara, Maganu qaale kultinohuranna farcidhino daafira shinoonni manni lubbo kakkalote dargira woroonni afummo.

¹⁰ Tini lubbuwa qoonqonsa naggi assite, «Qullaawunna halaalaanchu, Wo'manka Dandaatto Mootichi, baattote aana hee'ranno manna qorichishattokkihunna mundeenke daafira rabbisattokkihu mamooti geeshshaati?» yitanni raartu.

¹¹ Mittu mittunkura waajjo uddano uyininsa; shinanniri, insa gedee soqqamaanotinna roduuwinsa kiiro wo'mita geeshsha, shiima yanna fooliishshidhe agartanno gede kullinsa.

¹² Leelki sumuda tiri woyiteno laummo. Hatte yannara baatto milli yitu; arrishshono xitu gede kolishshidhu; aganuno co'o yee mundeete gede duu'mi.

¹³ Beeddaheno, lowo bubbe bubbisse balase shashshaffeenna, le'inokki laalo giggiltannohu gede ikkite giggiltu.

¹⁴ Gorduno xaanxoonni gogi gede ikke xaaxame bai. Ilaallanna giddichuwa noo darginni ka'e ba'u.

¹⁵ Baattote aani mootoolla, gashshaano, gaadaannuwa, dureeyye, wolqaataammu, mannu baalu borojjunna biilla goddate giddonna ilaallate aana noo kinna qarra maaxantu.

¹⁶ Ilaallatenna kinnate, «Ayirradu barcimira ofolle noohu albinninna Ge'rechu hanqinni aananke ubbine maaxxenke!

¹⁷ Rooriidihu hanqinsa barri dayinona, gate afannohu nooni?» yitu.