YOHAANNIS AJUUJA 4 - Qullaawa Maxaafa

GORDU MAGANSI'RA

¹ Hakkunni gedensaanni kune gordoho fa'namino waalcho afummo. Umo macciishshummo huuro xurumbunnite gedeeti, «Amo kawa fuli! Kunni ka'ira ikkara noo coye leellisheemmohena» yitue.

² Hakkawoyintenni Qullaawu Ayyaani aana'ya hee'reenna, kune iima gordoho mittu ofolle nooha ayirrado barcima afummo.

³ Ayirradu barcimi aana ofollinohu, dana duumunna haanju dilqi gede xawannoho. Ayirrado barcima, wara'a yite xabbanno magani-seemo doyissite no.

⁴ Ayirrado barcima 24 wole ayirradda barcimma doyissite no. Tenne barcimmara, waajjo uddano uddidhinorinna umoho culku ba'latto wodhitinori 24 geerri ofolte no.

⁵ Ayirradu barcimiwiinni belequ, banqonna gugatto fultu. Ayirradu barcimi albaanni lamalu caabbichi buwanni no; hakkuri lamala Maganu ayyaannaati.

⁶ Ayirradu barcimi albaanni, co'o yee xalalinohu hincilaallotenni seekkinoonni baara lawannorichi no. Mereeroho ayirrado barcima doyissite albaanninna badheenni batinye illuwa noonsari shoolu kalaqami no.

⁷ Umi kalaqami doobbiicho lawanno. Layinkihu booto lawanno. Sayikkihu alba manna lawanno. Shoolkihu buuwanni noo allamurcho lawanno.

⁸ Shoolunku kalaqami mittu mittunku lee qoolla afidhino; qoolu giddoyidi nafa gatikkinni illuwa wo'mitinoho. Hashshano barrano fooliishshidhukkinni, «Qullaawu, qullaawu, qullaawu; Hee'rinohu, noohunna daannohu, Wo'manka Dandaannohu Mootichu Maganu» yite faarsitanno.

⁹ Kuri kalaqami ayirradu barcimira ofollinohuranna hegere geeshsha hee'rannohura ayirrinye, guweenyanna galata uyitu yannara,

¹⁰ lemiina shoolunku geerri ayirradu barcimira ofollinohura albaanni kumbuulte hegere geeshsha hee'rannoha guwissu; ba'lattuwansano ayirradu barcimi albaanni worte,

¹¹ «Mootichankenna Maganonke! Baalanka kalaqoottona, kalaqamanno gede assoottohunna, heeshsho oottohu ateetina, atera ayirrinyu, guweenyunna wolqa ikkitohe!» yitanno.