YOHAANNIS AJUUJA 3 - Qullaawa Maxaafa

SERDEESI BEETEKIRISTAANERA SONKOONNI SOKKA

¹ «Serdeesi Katamira noo beetekiristaane sokkaasinchira, «Lamala Maganu ayyaannanna lamala beeddahe noosihu: Loosokki afoommo; su'ma lubbotenni nootto; kayinni reyottoho.

² Loosikki Magani'ya albaanni guuta di"ikkinona, baqqi yii! Reyara rahe noo coyeno gatisse kaajjishi'ri.

³ Kunni albaanni rosiinsoonniherenna kulloonnihere qaagi. Agadhi; aagintaawi. Baqqi yite agadha hoogittoro kayinni, mooraanchimma dayemmohe. Ma yannara dayemmohero horonta diafatto.

⁴ Ikkollana, uddanonsa xursiisidhinokkiri Serdeesi shiimu manni ate ledo no. Insa ane ledo ha'ra maltinonsare ikkitino daafira, waajjo uddano uddidhe ledo'ya hadhanno.

⁵ Qeelinohu hattonni waajjo uddano tuulatanno; su'masino heeshshote maxaafi giddonni dihuneemmo. Anni'yanna sokkaasinesi albaanni farci'reemmosi.

⁶ « ‹Qullaawu Ayyaani beetekiristaannate yaannore macca noohu macciishsho› yiino» yite borreessite soyi.

FILIDELFIYU BEETEKIRISTAANERA SONKOONNI SOKKA

⁷ «Filidelfiyu Katamira noo beetekiristaane sokkaasinchira, « ‹Waalcho fannanniti Daawiti qulfe noosihu qullaawunna halaalaanchu coyi'rino coyeti. Isi faninoha ayino dicufanno; isi cufinohano ayino difananno:

⁸ Loosokki afoommo; kune ayino cufa dandaannokkiha fa'namino waalcho albakkiinni woroommo. Wolqakki shiima ikkitinota afoommo; ikkirono qaale'ya agadhootto; su'ma'yano dikaadootto.

⁹ Ayihude ikkitukkinni, «Ninke Ayihudete» yitannori, Sheexaanu gaamo miilla ikkitino kaphaasine, albakkiinni dagge lekkakki hunda ubbe, ani baxoommoheta affanno gede asseemmo.

¹⁰ Cincatto gede kuloommohe coye agadhootto daafira, anino tenne baatto aana noo manna baala jifate kalqe baalate aana daara noohu qarru barrinni gatiseemmohe.

¹¹ Kuneeti rahe dayemmo; ayino ba'lattokki adhannohekki gede nooheha seekkite cu'mi'ri!

¹² « ‹Qeelinoha Qullaawa Mine Magani'yahura tuuqo asseemmosi. Hakkunni ka'a hakkiinni horo difulanno. Magani'ya su'ma, Magani'yawiinni gordunni daannohunniha, haaru Magani'ya Katami Yerusaalamennihu su'manna aneha haaro su'ma aanasi borreesseemmo.

¹³ « ‹Qullaawu Ayyaani beetekiristaannate yaannore macca noohu macciishsho› yiino» yite borreessite soyi.

LODOOQIYU BEETEKIRISTAANERA SONKOONNI SOKKA

¹⁴ «Lodooqiyu Katamira noo sokkaasinchira, « ‹Hamii'ni ikkinohu ammanaminohunna halaalaanchu naqaashshichi Maganu kalaqino kalaqamira kaima ikkinohu:

¹⁵ Loosokki afoommo. Woy diqiidootto woy di"iibbootto. Qiidoottoro woy iibboottoro woyyate.

¹⁶ Iibbittokkinni woy qiidittokkinni mulla gammuutte nootto daafira afii'yanni tufe hunammoheraati.

¹⁷ «Ani dureessaho; lowo jiro nooe; xeinoeri mitturino dino» yaatto. Gadadaamo, hawaaxama, buxicho, illiweelonna mullicho ikkoottota kayinni diafootto.

¹⁸ Dureessa ikkatto gede giiratenni daashshinoonni culka, teedakki diphate waajjo uddanonna la"a dandaatto gede illete xagichono anewiinni hidhattora seejjeemmohe.

¹⁹ « ‹Ani baxeemmoha baala seejjeemmo; qorichisheemmono. Kunni daafira diinaggaawoottoha ikki! Cubbokkino aagintaawi!

²⁰ Kuneeti ani nafara uurre woshsheemmo; ayino huuro'ya macciishshe cufana faniero isiwa e"eemmo; sagaleno lamunku mitteenni inteemmo.

²¹ « ‹Ani qeelle adhe Anni'ya ledo ayirradu barcimisira ofollummonte gede, qeelinohu ane ledo ayirradu barcimi'yara ofollanno gede asseemmosi.

²² « ‹Qullaawu Ayyaani beetekiristaannate yaannore macca noohu macciishsho› yiino» yite borreessite soyi.