YOHAANNIS AJUUJA 2 - Qullaawa Maxaafa

EFESOONI BEETEKIRISTAANERA SONKOONNI SOKKA

¹ Hakkunni gedensaanni, «Efesooni Katamira noo beetekiristaane sokkaasinchira, « ‹Qiniiticho angara lamala beeddahe haa're noohu lamalunku caabbiyye worranni uduunni mereero ha'ramannohu:

² Loosokkinna daafurokki cincakkino afoommo. Bushuulle sammi yite la"attokkita, soqqamaasine ikkitukkinni, «Ninke soqqamaasinete» yitannore fonqolte la'e, kaphaasine ikkansa badoottota afoommo.

³ Cincootto; su'mi'ya daafira hifatittokkinni qarra adhootto.

⁴ Ikkollana, mittu misheemmohe coyi no; albiha baxillekki agurootto.

⁵ Kunni albaanni hiikko noottohu uwoottoro qaagi; aagintaabbe higge aguroottoha albi loosokki loosi. Hatto ikka hoogittoro kayinni dayemmohe. Aagintaawa giwittoro caabbicho worranniha darginni haa're hooleemmo.

⁶ Ikkirono, mittu galantannihe coyi no. Hakkuno ani giweemmoha Niqolootu looso giwootto.

⁷ « ‹Qullaawu Ayyaani beetekiristaannate yaannore macca noohu macciishsho. Qeelinohura Maganu qixxeessino gannatera noota heeshshote haqqicho laalo itara fajjeemmosi› yiino» yite borreessite soyi.

SEMIRINEESI BEETEKIRISTAANERA SONKOONNI SOKKA

⁸ «Semirineesi Katamira noo beetekiristaane sokkaasinchira, « ‹Ree kae heeshshonniha ikkinohu, albihunna gedensihu:

⁹ Qarrakkinna buximakki afoommo; ikkollana ati dureessaho. Ayihude ikkitukkinni, «Ninke Ayihudete» yitannori, Sheexaanu gaamora miilla ikkitinori xontannohe xono afoommo.

¹⁰ Amadahera noo qarra waajjitooti. Kuneeti, jifantinanni gede ki'ne giddonni mito mito Sheexaanu usuru minira eessa'neraati. Tonne barra qarra adhitinanni; reyote geeshsha ammanantinoonnire ikke; heeshshote ba'latto eemmo'ne.

¹¹ Qullaawu Ayyaani beetekiristaannate yaannore macca noohu macciishsho. Qeelinoha layinkimeeshshi reyo digawajjitannosi› yiino» yite borreessite soyi.

PHERGAMOONI BEETEKIRISTAANERA SONKOONNI SOKKA

¹² «Phergamooni Katamira noo beetekiristaane sokkaasinchira, « ‹Lamenka afoo iibbitino bise noosihu:

¹³ Sheexaanu gashshe noo gobbara hee'rattota afoommo. Anera ammanaminoha Antiphaasi Sheexaanu hee'rannowa ki'ne katamira shini woyite nafa, su'ma'ya seekkite cu'mi'rootto; amma'nakki facci assite diagurootto.

¹⁴ Ikkollana misheemmohehu mitu mitu coyi no. Hakkuno, Beleaami roso adhinohu shiimu manni mereero'ne no. Beleaami, Israeelete manni kaphu magannara kakkalloonniha itannonna fooranno gede Baalaaqira mala uyino manchooti.

¹⁵ Niqolootu roso adhino mannino mereero'ne no.

¹⁶ Kunni daafira aagintaabbe higi. Hatto ikka hoogittoro, rahe atewa daye afii'yanni fultanno bisenni insa qaseemmo.

¹⁷ Qullaawu Ayyaani beetekiristaannate yaannore macca noohu macciishsho. Qeelinohura maanxeenna heedhannota menna yinanni sagale eemmosi. Haaro su'ma aanaho borreessinoonniha waajjo kincho eemmosi. Adhannohu ka'a, konne wolu ayino diafanno› yiino» yite borreessite soyi.

TIYAXIROOSI BEETEKIRISTAANE SOKKAASINCHIRA SONKOONNI SOKKA

¹⁸ «Tiyaxiroosi Katamira noo beetekiristaane sokkaasinchira, « ‹Giirate buwano labbanno ille noosihu, giiratenni daashshinihu gedensaanni fiinoonni camo labbanno lekkahu Maganu Beetti:

¹⁹ Loosokkinna baxillekki, amma'nakkinna soqqanshokki, cincakkinna albinni roore loosootto looso afoommo.

²⁰ Ikkollana mittu misheemmohe coyi no. Hakkuno, «Ani himanaanchote» yitannota Eelzaabeeli sammi yite agurootto; ise soqqamaano'ya foortannonna kaphu magannara kakkalloonni sagale ittanno gede assite so'risiissanno manchooti.

²¹ Isera cubbose aagintaabbe higganno gede yanna oommose; ise kayinni foorre agurte higa dihasidhino.

²² Kunnira qarru ma'na aanira qoleemmose; ise ledo foortannorino ise ikkitowiinni aagintaabbe higa gibburo, lowo qarri giddo tugeemmonsa.

²³ Oososeno reyotenni qorichisheemmo; beetekiristaanna baala, mulenna mudukko laeemmo Magano ikkoommota affanno. Mittu mittunkura loosi'ne garinni eemmo'ne.

²⁴ Ikkollana, Tiyaxiroosi heedhinanniri gamisu konne roso diadhitinoonni; wolootu, «Sheexaanunniha go'le noo coye» yite rosiissinoha adhitinoonnikki daafira wole duha diduhisiiseemmo'ne.

²⁵ Ikkollana, ani daammo geeshsha noo'neha seekkitine cu'midhe.

²⁶ Qeelannohanna ani hedoommore gawalote geeshsha iillishannoha dagate aana moohiseemmosi.

²⁷ Isi, siwiilu siqqonni gashshannonsa; doru uduunni gede asse cancanannonsa. Tini roorre ani Anni'yawiinni adhoommote gedeete.

²⁸ Soodimari bakkalchono eemmosi.

²⁹ Qullaawu Ayyaani beetekiristaanete yaannore macca noohu macciishsho› yiino» yite borreessite soyi.