YOHAANNIS AJUUJA 16 - Qullaawa Maxaafa

MAGANU HANQITA LAMALA GABATTA

¹ Hakkunni gedensaanni lamalante sokkaasinera, «Hadhine gabattate giddo nooha Maganu hanqo baattote aana dunne!» yitannoti lowo huuro Qullaawu Mininni fultanna macciishshummo.

² Umi sokkaasinchi mare angasi noo gabate giddo nooha baattote aana duni. Moyichu malaate wodhitinoriranna misilesi magansidhinorira shetissannoti busha mada kalaqantunsa.

³ Layinki sokkaasinchino angasi noo gabate giddo nooha baaru aana duni. Baaru reyino manni mundee gedeeha ikki; baaru giddo noori lubbo afi'rinori baalu reyi.

⁴ Sayikki sokkaasinchino angasi noo gabate giddo nooha daaddanno wayibbanna bu'ate giddo duni; kurino mundeete soorrami.

⁵ Wayi aana roorre afi'rino sokkaasinchi, «Hee'roottohunna noottohu Qullaawu Magani, ati yootto yoo taalote.

⁶ Qullaawu mannitanna himanaanote mundee duntino daafira mundee hayikkisoottonsa; kuni insara malinoho» yaanna macciishshummo.

⁷ Kakkalote dargano, «Ee! Wo'manka Dandaattohu Mooticha Magano! Yookki halaalehonna taalote» yitanno huuro macciishshummo.

⁸ Shoolki sokkaasinchino gabatete giddo nooha arrishshote aana duni; arrishshono iibbillisenni manna giirtanno gede wolqa uyinise.

⁹ Mannano iibbillu giiri. Tenne qoomamma aana roorre afi'rino Magani su'ma xontu. Cubbinsanni gaabbite higanna Maganoho ayirrinye aano gibbu.

¹⁰ Ontikki sokkaasinchino angasi noo gabate giddo nooha ayirrinyu barcimi moyichunnihu aana duni; moyichu gashshootino tunsicho ikki. Mannuno shettotenni kainohunni arrawosi iti.

¹¹ Shettonna mada qarrisseenna gordu Magano xontu. Bunshensawiinnino aagintaabbe dihiggino.

¹² Leelki sokkaasinchino angasi noo gabate giddo nooha Efiraaxisi Wayi giddo duni. Soojjaatinni dagganno mootoollara doogo qixxaabbannonsa gede wayi xoe bai.

¹³ Dhudhuufu afiinni, moyichu afiinninna kaphaanchu himanaanchi afiinni beche'naama labbannori sasu battete ayyaanna fultanna afummo.

¹⁴ Insa maalale loossanno ayyaanna durriisunnite. Kuri sasunku battete ayyaanna Wo'manka Dandaanno Maganihura bati'ru barri olira gosa baalate mootoolla gamba assate hadhanno.

¹⁵ Mootichu, «Kuneeti, ani mooraanchu gede hedeweelcho dayemmo. Mullichu ha'ranni mannu albaanni saalfatannokki gede, baqqi yee uddanosi agadhannohu ba'raa'rinoho» yii.

¹⁶ Battete ayyaannano mootoolla gamba assite Ibiraawootu afiinni, «Armagedooni» yinanni darga xaadissu.

¹⁷ Lamalki sokkaasinchino angasi noo gabate giddo nooha diilallote giddo duni. Qullaawu Mini giddo noohunni ayirradu barcimiwiinni, «Coyi goofino» yitannoti naggi yitino huuro fultu.

¹⁸ Belequ, banqonna gugatto fultu. Baatto jaddote garinni huxidhu. Mannu baattote aana kalaqamihunni kayise anfe egenninoonnikki garinni huxidhu.

¹⁹ Jawu Baabilooni katami sasewa beehami; gobba baalate katamma diigantu. Maganu bati'ru Baabiloonire hawinokki daafira, hanqisi woyine wonshinoonni finiinchira aganno gede assi.

²⁰ Giddichuwa baala ba'u; ilaallano noo darginni hoongi.

²¹ Mitte mittenti 45 kiilo ikkitanno kaade, iiminni mannu aana dirritu. Kaadete qoomami lowo geeshsha shetisino daafira, mannu Magano xoni.