YOHAANNIS AJUUJA 13 - Qullaawa Maxaafa

LAME MOYICHO

¹ Hakkunni gedensaanni mittu moyichi baaru giddonni fulanna afummo. Isira tonnu buudinna lamalu umi noosi. Mittu mittunku buudi aana worraaqu no; mittu mittunku umi aana Magano xonate su'mi no.

² Afummo moyichi daguncho lawanno; lekkasi dibi yinanni moyichita labbanno; afiisino doobbiichunniha lawanno. Dhudhuufu wolqasi, ayirrado barcimasinna lowo roorre moyichoho uyisi.

³ Kunni moyichi umma giddonni mittu aana reyote iillishshanno mada noota afummo; ikkollana hatti reyote iillishshanno mada hurtino; baattote aana noohu baalu maala'lanni hoodesi ha'ri.

⁴ Moyichoho roorre uyino daafira mannu baalu hakkonne dhudhuufa magansi'ri. Moyichono, «Kunni moyichi gedeehu nooni? Isi ledo olama dandaannohu ayeti?» yaanni magansi'ri.

⁵ Moyichoho boo'natenna Magano xonate qaale coyi'ranno gede, qoleno shoyilliina lame agana gashshanno roorre uyinisi.

⁶ Maganonna Maganu su'ma, Maganu hee'rannowanna gordoho heedhannore xonate afoo fa'ni.

⁷ Maganu manna qasannonna qeelanno roorre uyinisi. Gosate, ga'retenna addi addi afiinni coyi'ranno manni baalu aana roorre uyinisi.

⁸ Kalqe kalaqantara albaanni, gorramino Ge'rechi maxaafi heeshshonnihu giddo su'mansa borreessinoonnikkiri, baattote aana heedhannori baalu moyicho magansidhanno.

⁹ Macca noohu macciishsho!

¹⁰ Qafadamanno gede hendoonnihu qafadamanno; bagadunni reyanno gede hendoonnihu bagadunni reyanno. Hatto yaa, Maganu manni cincanna amma'na hasiissannosi yaate.

¹¹ Layinki moyicho baattote giddonni fulanna afummo. Ge'reewunnita labbannoti lame buudda noosi. Isino dhudhuufu gede coyi'ranno.

¹² Umi moyichi roorrenni isira albaanni hee're loosanno. Kuni moyichi baattonna baattote aana heedhannori baalu, umi moyicho magansidhanno gede assanno. Hakku umi moyichi reyote iillishshanno mada hurtusiho.

¹³ Kuni layinki moyichi, mannu baalu albaanni giira nafa gordunni dirrisanni jajjabba malaatta leellishi.

¹⁴ Umi moyichira albaanni leellishara fajjinoonnisi malaatinni kainohunni, baattote aana hee'ranno manna so'risiisanno. Bagadu madiisseenna gatino moyichi dani misile seekkitanno gede baattote aana noo manna hajajanno.

¹⁵ Layinki moyichi, umi moyichi misilera lubbotenni hee'rate foole woranno gede wolqa uyinisi. Hatto assinoonnihu misile coyi'ra dandiitanno gedenna, iso magansidhannokkire baala shinanni gede assateeti.

¹⁶ Jajjabbuno shiimmaadduno, dureeyyeno buxaneno, mootoolluno faantootu baalu, qiniiticho angara woy albaho malaate wodhitanno gede giddeessi.

¹⁷ Kunni garinni, moyichu su'ma ikkino malaati woy su'misi kiiro noosikki manchi ayino hirano hidhano didandaanno.

¹⁸ Hayyo hasiissannohu xa tenne aanaati. Wodancha afi'rinohu, moyichu kiiro buuxo; kiiro mannu su'ma afidhinote. Iseno 666 kiirooti.