YOHAANNIS AJUUJA 12 - Qullaawa Maxaafa

MEYAA MANCHONNA DHUDHUUFA

¹ Hakkunni gedensaanni jawunna dhaggete malaati gordu iima leelli: Arrishsho uddidhinoti, lekkatenni agana kaxxitinoti, 12 beeddahe ba'lattote gede umoho wodhitinoti mitte mancho leeltu.

² Ise godowinni no; ilate game amaddeennase qarrante raartanni no.

³ Wolu malaatino gordu iima leelli: Lamalu uminna tonnu buudi noosihu duumu lowo dhudhuufi leelli. Mittu mittunku umira shiimu mootete worraaqi no.

⁴ Farrisinni beeddahete giddonni sayikki anga gordunni uulla qole waxaaxisi. Mancho iltanno woyite dhudhuufu ilamanno qaaqqo egemmara yee, manchonniwa mare albaseenni uurri.

⁵ Manchono daga baala siwiilu siqqonni gashshannoha labbaa beetto iltu. Qaaqqose kayinni hawulukki assine Maganunniwanna ayirradu barcimiwa massini.

⁶ Manchono halalli gobba xooqqu; hakkiicho 1,260 barra qawaaxxinse towantannise darga Maganu qixxeessinose.

⁷ Hakkunni gedensaanni gordoho iima olu kai; Mikaaeelinna sokkaasinesi dhudhuufunna sokkaasinesi ledo olantu.

⁸ Dhudhuufunna sokkaasinesi kayinni qeelantu. Hakkunni gedensaanni gordoho darga diafidhino.

⁹ Lowo dhudhuufi woro hige tugami; isi Daawuloosiiti woy Sheexaaneho yinannihu kalqe baala so'risiisannohu bi're albi hamashshooti. Iso uullara tungi; sokkaasinesino isi ledo tugantu.

¹⁰ Hakkunni gedensaanni «Kune gato, wolqanna gashshootu, Maganinkeha ikkino! Mootimmano Kiristoosita ikkitino! Maganinke albaanni hashshanna barra, roduuwanke bushiishannohu tugami.

¹¹ Insa Ge'rechu mundeenninna, coyidhinohu farci'ransa qaalinni iso qeeltu. Lubbonsa marartukkinni umonsa reyote sayisse uyitino.

¹² Kunnira gorduwanna giddonsa heedhinanniri baalu hagiidhe! Sheexaanu shiima yanna calla gattinosita afe, lowo hanqinni ki'newa dirrinona, baattonna baara kayinni ki'nera aanne!» yitannota lowo huuro gordunni macciishshummo.

¹³ Dhudhuufu uullate aanira tugaminota afi yannara, labbaa beetto iltino mancho shorrise.

¹⁴ Mancho halalla qixxeessinoonnise dargira buubbe hadhanno gede lowo allamurchita lame qoolla uyinise. Hakkiicho hamashshuwiinni faffe sase dironna darate dancha gede towantannase heedhu.

¹⁵ Hakkunni gedensaanni hamashshu mancho lolahu adhe ha'ranno gede badheseenni qole lolahanno waa afiisinni tufi.

¹⁶ Ikkollana baatto mancho kaa'lituse; afoose fante dhudhuufu tufino waa egemmitu.

¹⁷ Dhudhuufu manchote hanqe sirchise giddonni gattinori ledo olamara ha'ri. Insa Maganu hajajo agadhitannoreetinna Yesuusira ammanamatenni farcidhannoreeti.

¹⁸ Dhudhuufu baaru gama noo shaafi aana uurri.