YOHAANNIS AJUUJA 1 - Qullaawa Maxaafa

¹ Tini Yesuusi Kiristoosi ajuujaati. Muli yanna giddo ikkanno coye soqqamaanosira leellishanno gede Maganu uyinosite. Kiristoosino sokkaasincho soye soqqamaanchisi Yohaannisira kulino.

² Yohaannisino afino coye baala, Maganu qaalenna Yesuusi xawisino halaale farci'rino.

³ Kuni coyi baalu muli yanna giddo ikkanno daafira, konne himanu qaale nabbawannohu ba'raa'rinoho; konne qaale macciishshitannorinna kunni maxaafi giddo borreessinoonniha wonshitannori ba'raadhinoreeti.

ISSIYU GOBBARA NOOTERA LAMALA BEETEKIRISTAANNARA SONKOONNI KEERE

⁴ Yohaannisiwiinni Issiyaho nootera lamalante beetekiristaanera: Noohu, hee'rinohunna daanno Maganiwiinninna ayirradu barcimisira albaanni noo ayyaanna lamalantewiinni,

⁵ reyotenni ka"atenni umiha ikkinohu, ammanamino naqaashshenna uullate mootoolla gashshaancho ikkinohu Yesuusi Kiristoosiwiinni eltonna keeru iillo'ne. Baxannonkehura mundeesinni cubbonke hayishshinonkehura,

⁶ Maganu Annisira soqqammeemmo gede qeesootu gashshoote assinonkehura, Yesuusi Kiristoosira hegere hegerera ayirrinyunna wolqa ikkitosi! Hamii'ni!

⁷ Kuneeti, gomichunni daanni no! Qassusiri nafa gattukkinni, mannu baalu ille la"annosi; baattote aana noo manni baaluno, iso lae hururame wi'lanno. Yinoonnirino ikkanno. Hamii'ni!

⁸ Noohunna hee'rinohu, daannohuno, Wo'manka Dandaanno Magani Kaaliiqi, «Albihunna Gedensihu aneeti» yaanno.

KIRISTOOSI AJUUJATENNI LEELLI

⁹ Ki'ne ledo Yesuusi qarra, gashshootesinna cincasi beeqqeemmohu ani rodii'ne Yohaannisi, Maganu qaaliranna Yesuusi naqaashshimma daafira Fiximo yinanni giddichora noommo.

¹⁰ Mootichu barra Qullaawu Ayyaani aana'ya hee'reenna, badhe'yaanni xurumbu luuli gedeetenni lowo huuronni,

¹¹ «La'anni noottore maxaafaho borreessite, Efesooni, Semirineesi, Phergamooni, Tiyaxiroosi, Serdeesi, Filidelfiyahonna Lodooqiyaho nootera lamalante beetekiristaanera soyi!» yiie.

¹² Coyi'riehu ayetiro afammora badhe hige caaqqi yeemmo woyite, culkunni seekkinoonnire lamala caabbiyye worranni uduunne afummo.

¹³ Hakko uduunni mereero manchi beetto lawannoha afummo. Isi hunda iillitinota seeda uddano uddi're no; gagasoho culku hiito usudhe no.

¹⁴ Umisi dananchi waajjo shaallichaho; illesino giirate buwani gedeete.

¹⁵ Lekkasi giiratenni daashshinihu gedensaanni fiinoonni camo labbanno; huurosino lowo wayi foonchi gedeete.

¹⁶ Qiniiticho angara lamala beeddakko haa're no; afiisinni lamenka wido iibbitino bise fultu; albisino barru taali arrishsho gede xawanno.

¹⁷ Iso laummo woyite, reyino manchi gede ikke lekkasi hunda uwummo. Isi kayinni qiniiticho angasi aana'ya wore, «Waajjitooti; umihunna gedenihu,

¹⁸ heeshshonnihuno aneeti. Kunni albaanni reyommo; xa kayinni kune hegere heeshshoha ikkoommo; reyotenna jeennaatu roorre anga'ya no.

¹⁹ Kunnira, la'anni noottoha, xa noohanna kunni ka'a daara nooha borreessi!.

²⁰ Qiniiticho anga'yara la'anni noottori, lamala beeddakkonna culkunni seekkinoonnihu lamalu caabbiyye worranni uduunni tiro kunninni aante noote: Lamala beeddakko lamalante beetekiristaane sokkaasineeti. Culkunni seekkinoonnihu lamalu caabbiyye worranni uduunni lamala beetekiristaaneeti» yiie.