YOHAANNISI 6 - Qullaawa Maxaafa

YESUUSI ONTE KUME MANNA ITISE DUUSHSHI

¹ Hakkunni gedensaanni Yesuusi Xibiriyadoosi yinanniha Galiilu Baara widoonni fuli.

² Lowo manni Yesuusi dhiwamaasine hursatenni loosino maalale lae hoodesi ha'ri.

³ Yesuusino rosaanosi ledo ilaala fule hakko ofolli.

⁴ Ayihudennihu Agure Sa"ate Ayyaanino gamba yee no.

⁵ Hakka woyite Yesuusi haxo gotti yee la"anno woyite lowo manni isiwa hige daanna afe, Filiphoosi woshshe, «Kageeshshi mannira sagale maminni anfanni?» yii.

⁶ Yesuusi assannore afe no; hatto yiinohu jife la"asira yeeti.

⁷ Filiphoosino, «Mitto mittoho shiima shiima iillishate lamu xibbi birrinni hirroonni timma nafa di"ikkitanno» yee qoli.

⁸ Rosaanosi giddonni mittu Simiooni Pheexiroosi rodii Indiriyaasi,

⁹ «Onte hayixu timmanna lame qulxu'me anga haa're noo beetti konne no; ikkollana kuni kageeshshi mannira ma assanno?» yii.

¹⁰ Yesuusino rosaanosi, «Manna gaamo gaamo assitine daffitino hayisso aana ofollanno gede asse» yee rosaanosi hajaji. Kiiro onte kume ikkanno manni hayissote aana ofolli.

¹¹ Hakkunni gedensaanni tima haa're kayise, Magano galate, ofollino mannira beehi. Qulxu'meno beehinsa. Baalunku hasiisannonsa geeshsha adhitu.

¹² Wo'munku itte duubbuhu gedensaanni Yesuusi rosaanosi, «Shiimuno baikkinni intanna gatino hambaa gamba asse!» yii.

¹³ Insano mannu itanna gantoha hayixu timma hambaa gamba assite tonaa lame soro wo'ma kayissu.

¹⁴ Mannuno Yesuusi loosino dhagge lae, «Halaalintanni kuni tenne gobba daanno himanaanchooti» yii.

¹⁵ Mannu Yesuusa wolqatenni amade moote assasira hedinota afe, callisi fule gaaru widira hige ha'ri.

YESUUSI BAARU AANAANNI HA'RI

¹⁶ Yanna hawarrituta rosaanosi baaru gamira dirritu.

¹⁷ Yowolote ofolte Qifirinahoomi hadhu. Hatte yannara tunse no; Yesuusino insawa dayinokki woyiteeti.

¹⁸ Jawaata bubbe dagge baaru aana dambala kayissu.

¹⁹ Rosaanosi shoolenna onte kume qaafo ikkanno geeshshiwa baaru aana laaqidhanni hadhu. Hakko mereero Yesuusi baaru aana ha'ranni yowolonniwa iilla rahita waajjitu.

²⁰ Isi kayinni, «Aneetina waajjitinoonte!» yii.

²¹ Insano yowolote giddora haadhasira hasidhu. Hakkawoyintenni yowolo hadhanni noo gobba iillitu.

MANNU YESUUSA HASI'RANNI HA'RI

²² Layinki soodo baara widoonni gatino manni, mitte yowolo calla noota afe, Yesuusi rosaano calluwinsa hadhinotanna Yesuusi ledonsa yowolote giddo nookkita buuxi.

²³ Ikkirono, wole yowolla Xibiriyadoosi Kataminni ka'e Yesuusi Magano galate mannaho timma beehiwa martu.

²⁴ Mannuno Yesuusi woy rosaanosi hakko nookkita afe, hatte yowollara ofolle Yesuusa hasi'ranni Qifirinahoomi ha'ri.

YESUUSI HEESHSHOTE SAGALEETI

²⁵ Yesuusa baara widoonni affe, «Rosiisaancho, kawa mamoote dayitto?» yite xa'mitusi.

²⁶ Yesuusi qole, «Halaale yeemmo'nena, hassinanni heedhinoonniehu sagale ittine duubbinoonnihuraati ikkinnina maalale la'inoonni daafira di"ikkino.

²⁷ Ba'anno sagalera loosidhinoonte! Maganu Annu konne coye buuxisate Beettisi aana sumude worino daafira, Maganu Beetti aanno'netera hegere heeshshotera loosidhe» yiinsa.

²⁸ Insano, «Maganu looso loosate ma assino?» yitu.

²⁹ Yesuusino, «Maganu loosi isi soyinoha amma'nate» yiinsa.

³⁰ Insano, «Loosoottore la'ne ate ammanneemmohe gede ma malaate leellishattonke? Ma loosatto?

³¹ ‹Ittanno gede gordunni sagale uyinonsa› yine borreessinoonninte gede, annuwanke halalla mennaho yinanni sagale ittino» yitusi.

³² Hatte yannara Yesuusi, «Halaalaancho sagale gordunni uyino'nehu Anna'yaati ikkinnina, Muse di"ikkino.

³³ Maganu sagale gordunni dirrannohonna mannaho heeshsho aannoho» yii.

³⁴ Insano, «Mootichanke, hattootiro wo'manka woyite hakko gari sagale uyinke» yitu.

³⁵ Yesuusino, «Ani heeshshote sagaleeti; anewa daannohu horonta dihudi'ranno; ane ammanannohu horonta digoo'ranno.

³⁶ Yuummo'nente gede, ane affinoonnie; kayinnilla diammantinoonnie.

³⁷ Anni'ya aannoehu baalu anewa daanno. Anewa daannoha horonta fushshe dihuneemmo.

³⁸ Ani gordunni dayommohu soyinoehu hedinore wonshammoraati ikkinnina, umi'ya hedo wonshate di"ikkino.

³⁹ Soyinoehu hedono, uyinoeha mittono hunummokkinni goofimarchu barra reyotenni kayiseemmo gedeeti.

⁴⁰ Anni'ya hedo, Beettisi widira la"annohunna Beettosi ammanannohu baalu hegere heeshsho afi'ranno gedeeti. Anino goofimarchu barra kayiseemmosi» yii.

⁴¹ Yesuusi, «Gordunni dirroommo sagale aneeti» yiino daafira Ayihude gunguntu.

⁴² Insano qolte, «Kuni Yooseefi beetto Yesuusa di"ikkino? Annasinna amasi dianfoommo? Hiitto ikke ‹Gordunni dirroommo› yaanno?» yitu.

⁴³ Yesuusi, «Ki'ne ki'neneewa gunguma agurre.

⁴⁴ Soyinoehu Anni'ya daanno gede assikkinni anewa daa dandaannohu dino. Anewa daannoha goofimarchu barra reyotenni kayiseemmosi.

⁴⁵ Himanaanote maxaaffa giddo, ‹Mannu baalu Maganuwiinni rosanno› yine borreessinoonni. Kunnira, Anni'yawiinni macciishshe rosinohu baalu anewa daanno.

⁴⁶ Maganuwiinni dayinoha agurranna Anna afinohu ayino dino. Anna afinohu iso callaati.

⁴⁷ Halaale kuleemmo'ne; ammanannohura hegere heeshsho noosi.

⁴⁸ Ani heeshshote sagaleeti.

⁴⁹ Annuwa'ne halalla menna ittino; ikkollana reyitino.

⁵⁰ Gordunni dirritino sagale tenneeti; tenne sagale itannohu horontanni direyanno.

⁵¹ Gordunni dirroommohu heeshshote sagale aneeti. Tenne sagale itannohu baalu hegere geeshsha hee'ranno. Mannaho heeshsho ikkanno gede ani eemmo sagale maala'yaati» yii.

⁵² Hatte yannara Ayihude, «Kuni manchi maalasi intammora hiitto asse aannonke?» yite insa insanaawa xa'mantu.

⁵³ Kunnira Yesuusi, «Halaale kuleemmo'nena, Manchi Beetti maala ita hoogginiro, mundeesino aga hoogginiro heeshsho dino'ne.

⁵⁴ Maala'ya itannohuranna mundee'ya agannohura hegere heeshsho noosi. Anino goofimarchu barra reyotenni kayiseemmosi.

⁵⁵ Maali'ya halaali sagaleeti; mundee'yano halaali agooti.

⁵⁶ Maala'ya itannohunna mundee'ya agannohu baalu anenni hee'ranno; anino isinni hee'reemmo.

⁵⁷ Heeshshonnihu Annu soyinoe garinni, anino isinni heeshshonniha ikkoommonte gede, maala'ya itannohu baalu anenni heeshshonniha ikkanno.

⁵⁸ Kunnira gordunni dirritino sagale tenneeti; tini sagale annuwa'ne ittute gedeeta di"ikkitino. Hatte sagale itturi reyitino. Tenne sagale ittannori kayinni hegerera heedhanno» yii.

⁵⁹ Yesuusi konne coye coyi'rinohu Qifirinahoomi xaadu mine rosiisanniiti.

LOWO ROSAANO YESUUSI HOODE HA'RA AGURTU

⁶⁰ Rosaanosi giddonni haammatu konne coye macciishshite, «Kuni coyi kaajjadoho; ayi dandee macciishshanno?» yitu.

⁶¹ Yesuusi rosaanosi kunni coyira gunguntinota afe, «Kuni coyi gufidhinanni gede assanno'nehoni?

⁶² Manchi Beetti alba hee'rannowa ha'ranna affinanni yannara ma yitinaraatiyya?

⁶³ Heeshsho aannohu Ayyaanaho; mannu wolqa mittoreno dikaa'litanno. Ani kuloommo'ne qaali ayyaanaho; qoleno heeshshote.

⁶⁴ Ki'ne giddo kayinni mitu mitu amma'nitinokkiri no» yii. Yesuusi konne coyi'rinohu amma'nitinokkiri ayeootironna iso reyote sayise aannohu ayetiro balaxe afino daafiraati.

⁶⁵ Yesuusi lede, «Anni'ya fajjinoha agurranna anewa daa dandaannohu dino yoommohu kunniraati» yii.

⁶⁶ Kunni daafira rosaanosi giddonni batinyu badhera higgu. Hatte yannanni kayisse Yesuusi hoode dihadhino.

⁶⁷ Kunnira Yesuusi tonaa lamenka rosaanosi, «Ki'neno ha'ra hasidhinannini?» yiinsa.

⁶⁸ Simiooni Pheexiroosi, «Mooticha'ya, ayenkewa ha'neemmo? Atera hegere heeshsho qaali noohe.

⁶⁹ Ninkeno ati Qullaawu Magani Beetto ikkoottota anfoommo; ammannoommo» yii.

⁷⁰ Yesuusino, «Ani ki'ne ditonaa lame doorummo'ne? Ki'ne giddonni kayinni mittu Daawuloosiiti» yiinsa.

⁷¹ Konne coyi'rinohuno, Asiqorootichu Simiooni beetti Yihudire kulateeti. Yihudu tonaa lamu ledoha ikkirono, Yesuusa reyote sayise aannohu iso ikkino daafiraati.