YOHAANNISI 5 - Qullaawa Maxaafa

YESUUSI BEETESAYIDAHO MITTO LAANSHAAWA MANCHO HURSI

¹ Hakkunni gedensaanni, Yesuusi Ayihudete ayyaana ayirrisate Yerusaalame ha'ri.

² Yerusaalamete Ge'reewu Waalchi mule, Ibiraawootu afiinni Beetesayida yinanni kofo no. Hatte kofora ontu daasi noose.

³ Batinye dhiwamaano, illiweelootu, naafootunna laanshaawootu kofote mule goxxe no.

⁴ [Mite mite yannara Maganu sokkaasinchi daye hattenne kofo milli assanno. Kofo milli yitanno woyite umo ikke eannohu aye dhibbinnino huranno.]

⁵ Hakkiicho sajjiina sette diro dhiwamanni keeshshino manchi no.

⁶ Yesuusino konne mancho hakkiicho goxe nooha lae, dhiwamanni lowo yanna keeshshinotano afe, «Koo mancho, hura hasi'ratto?» yiisi.

⁷ Manchuno, «Mooticha'ya, wayi milli yaanno woyite kofote giddora eessannoehu dino; ani eate hedeemmo woyite wolu balaxe eanno» yii.

⁸ Yesuusino, «Ka'e daallasakki duqqite ha'ri!» yiisi.

⁹ Manchuno hakkawoyintenni hure daallasasi duqqe ha'ri. Yesuusi konne mancho hursinohu Ayihudete Fooliishsho Barraati.

¹⁰ Kunnira, Ayihudete gashshaano hakkonne mancho, «Techo Fooliishshote Barra daallasa duqqe ha'ra difajjinanni» yitusi.

¹¹ Isi kayinni, «Hursie manchi, ‹Daallasakki duqqite ha'ri!› yeennaeeti» yee dawari.

¹² Insano, «‹Daallasakki duqqite ha'ri!› yiihehu ayeti?» yite xa'mitusi.

¹³ Manchu kayinni mannu bati'rinohuranna Yesuusino hakkiinni ha'rino daafira hursisiha bade diafino.

¹⁴ Gedensaanni Yesuusi hakkonne mancho Qullaawa Mine afe, «Koo mancho, xa kune huroottona, rooru qarri iillannohekki gede xaate kunni ka'a cubbo loossooti!» yiisi.

¹⁵ Manchuno, hursinosihu Yesuusa ikkinota mare Ayihudete gashshaanora kuli.

¹⁶ Hattoo coye Fooliishshote Barra assino daafira, Ayihudete gashshaano Yesuusa qarrissusi.

¹⁷ Yesuusino qole, «Anni'ya techo geeshsha loosanni no; anino loosanni noommo» yii.

¹⁸ Yesuusi hatto yee dawarinohura Ayihudete gashshaano albinni roore shitasira hasidhu. Shaate heddinohu, Fooliishshote barri Seera diigino daafira calla ikkikkinni, «Magano anna'yaati» yee isonoo Maganu ledo taashshino daafiraati.

MAGANU BEETTI ROORRE

¹⁹ Yesuusino, «Halaale kuleemmo'nena, Annu loosanna afinore ikkinnina Beettu umisi roorrenni assannori dino. Annu loosannore Beettuno loosanno.

²⁰ Annu Beetto baxanno; loosannore baalano leellishannosi. Ki'ne dhagge assidhinanni gede, konne roorino coyeno leellishannosi.

²¹ Annu reyitinore kayise heeshsho aannonte gede, Beettuno baxinohura heeshsho aanno.

²² Annu aye aanano yoo diyaanno; ikkollana yoote roorre gudise Beettoho uyino.

²³ Hatto assinohu mannu baalu Anna ayirrisannonte gede, Beettono ayirrisanno gedeeti. Beetto ayirrisannokkihu Beetto soyinoha Annano diayirrisanno.

²⁴ Halaale kuleemmo'nena, qaale'ya macciishshitannoriranna soyinoeha amma'nitannorira hegere heeshsho noonsa. Reyotenni heeshshote widira sa'anno ikkinnina busha yoo diyinanninsa.

²⁵ «Halaale kuleemmo'nena, reyino manni Maganu Beetti qaale macciishshanno yanna dagganno; hatti yannano xaati. Macciishshitannori baalu lubbotenni heedhanno.

²⁶ Annu giddo heeshsho noonte gede, Beettu giddono heeshsho heedhanno gede assino.

²⁷ Beettu, Manchi Beetto ikkino daafira, yoo yaanno gede roorre uyinosi.

²⁸ Kunnira, waammate giddo noori huurosi macciishshitanno yanna daggannona, maala'litinoonte.

²⁹ Dancha loossinori reyotenni ka'e lubbotenni heedhanno; busha loossinori kayinni reyotenni ka'eenna, busha yoo yinanninsa» yii.

YESUUSI DAAFIRA FARCI'NOONNI COYE

³⁰ Lede Yesuusi, «Ani umi'yanni mittoreno asse diafeemmo. Isi yaanna macciishshoommore coyi'reemmo. Ani halchoommore ikkikkinni soyinoehu hedinore wonsheemmo daafira, yoo'ya halaalaanchote.

³¹ Ani aneneere farci'rummoro farci'ra'ya halaalaancho di"ikkitanno.

³² Ikkollana, anere farci'rannohu wolu no. Isi anere farci'rannoti halaale ikkitinota afoommo.

³³ Ki'ne manna Yohaannisiwa sokkinoonni; isi kayinni halaalunnire farci'rino.

³⁴ Konne yeemmohuno ki'ne gattinara ikkinnina mannu farci'ra anera assitanno'eri dino.

³⁵ Yohaannisi buwanni xawanno caabbichooti; ki'neno shiima yannara isi xawaabbinni hagiidhitinara hasidhinanni.

³⁶ Anera kayinni Yohaannisita roortino farci'ra nooe; farci'ra'yano Anni'ya loosammora uyinoe loosooti. Kuni looseemmo loosi, Anni'ya soyinoe gede anere farci'rannoho.

³⁷ Ane soyinohu Anni'ya anere farci'ranno. Ki'ne kayinni isi coyi'ranno qaale dimacciishshitinoonni; danasino diaffinoonni.

³⁸ Ane soyinoha iso amma'na hoogginoonnihura, isi qaali ki'ne wodani giddo dino.

³⁹ Ki'ne Qullaawa Borro la"atenni hegere heeshsho afi'nanniha laweenna'ne, wo'manka woyite ise la'inanni. Hatti Qullaawa Borro kayinni anere farcidhannote.

⁴⁰ Ikkollana, ki'ne heeshsho afidhinara anewa didagginanni.

⁴¹ «Ani mannuwiinni ayirrinye dihasi'reemmo.

⁴² Ki'ne wodani giddo Maganu baxilli nookki gede egennoommo.

⁴³ Ani Anni'ya su'minni dayommo; ane kayinni dihaadhinoonnie. Wolu umisi su'minni dayiro kayinni haadhinanni.

⁴⁴ Ki'ne mimmiti'newiinni ayirrinye hasidhinanniri, mitto calla ikkino Maganiwiinni afi'nanni ayirrinye kayinni hasidhinannikkiri, ane hiitto ikkitine ammantinannie?

⁴⁵ Ani ki'ne Anni'ya albaanni diabbooshshi'reemmo'ne. Ki'ne abbooshshi'rannohu ki'ne hawaqidhine heedhinannihu Museeti.

⁴⁶ Muse amma'nitinoonniha ikkoommero isi borreessinohu anereetina ane amma'nitinanni.

⁴⁷ Muse borreessinoha ammantinannikkiri kayinni ane qaale hiitto assitine ammantinanni?» yii.