YOHAANNISI 4 - Qullaawa Maxaafa

YESUUSANNA SAMAARITTE MANCHO

¹ Hatte yannara Farisootu, Yohaannisinni roore Yesuusi lowo manna rosaano assinotanna cuuinota macciishshitu.

² Ikkollana, rosaanosilla cuu'ino ikkinnina Yesuusi dicuuino.

³ Yesuusi Farisootu yitinore macciishshe, Yihuda agure galagale Galiila ha'ri.

⁴ Hakka ha'ri woyite Samaariyu widoonni hige sa"a hasiissinosi.

⁵ Ha'ranni, Samaariyaho Yaiqoobi beettisi Yooseefira uyino gobba mule noo katama Siikaari yinanniwa dayi.

⁶ Hakkiicho Yaiqoobi buicho no. Yesuusino seeda doogo ha'rinohura daafure buete mule ofolli; yannano barru taalooteeti.

⁷ Hatte yannara, mitte Samaaritte mancho waa dirridhara hatte buewa daggu. Yesuusino, «Ageemmo waa uue» yiise.

⁸ Hakka woyite rosaanosi sagale hidhitara katama hadhe no.

⁹ Samaaritte Yesuusa, «Ati Ayihudicha ikkite heedhe, ane Samaaritte, ‹Ageemmo waa uyie› hiitto yaatto?» yitu. Hatto yitinohu Ayihudenna Samaarootu xaado afidhinokki daafiraati.

¹⁰ Yesuusi qole, «Maganu eltonna, ‹Ageemmo waa uue› yaannohehu ayetiro afoottaha ikkoommero, iso huucci'ratta; isino atera heeshshote waa aannohehu baino» yiise.

¹¹ Manchono, «Mooticha'ya, dirri'nanni uduunnichi dinohe; buichono giddo diimete; heeshshote waa hiikkiinni afi'ratto?

¹² Ati tenne buicho uyinonkeha annanke Yaiqoobi roorattoni? Isi, oososinna saadasi tenne buicho aggino» yitusi.

¹³ Yesuusi qole, «Tenne buicho waa agannohu baalu galagale goo'ranno.

¹⁴ Ani eemmo waa agannohu kayinni hegere geeshsha digoo'ranno; ani eemmo waa agannohu, hegere heeshsho uyitanno buicho giddosinni fultannoha ikkanno» yii.

¹⁵ Manchono, «Mooticha'ya, goo'reemmakki gedenna dirri'rammara layinkita kawa dayemmakki gede, hakkonne waa uue» yitu.

¹⁶ Yesuusino, «Marte ayiddaannakki woshshite amo!» yiise.

¹⁷ Manchono, «Ayiddaanni dinoe» yite qoltu. Hakka woyite Yesuusi, «‹Ayiddaanni dinoe› yaakki danaho.

¹⁸ Ontu ayiddaanni noohe; xa ledokki noohu kayinni ayiddaannakki di"ikkino; kunnira halaale coyi'rootta» yiise.

¹⁹ Manchono, «Mooticha'ya, ati himanaancho ikkoottota xaalla afumma.

²⁰ Annuwanke kunni ilaali aana magansidhino; ki'ne kayinni, ‹Magano magansi'ra hasiisanno dargi Yerusaalamete› yitinanni» yitu.

²¹ Yesuusi qole, «Tee mancho, Magano Anna kunni ilaali aana woy Yerusaalamete magansidhinannikki yanna daggannota ammanie.

²² Ki'ne affinoonnikki magano magansidhinanni; ninke kayinni gato Yihudunni fultanno daafira, anfoommo Magano magansi'neemmo.

²³ Magano Anna ayyaanunninna halaalunni magansidhannorira yanna dagganni no; kune xaanni dagge no; Maganu Annu hasi'rannorino hattoonni magansidhannoreeti.

²⁴ Maganu Ayyaanaho; magansidhannosirino Ayyaanunninna halaalunni magansidhasira hasiisanno» yiise.

²⁵ Manchono, «Kiristoosa yinannihu buuraminohu daannota afoomma; isi dayiro, duuchankare kulannonke» yitu.

²⁶ Yesuusino, «Ani xa ate ledo hasaawanni noommonku isooti» yiise.

²⁷ Hakko mereero, Yesuusi rosaano hadhinowiinni daggu. Yesuusi meyate ledo hasaawanna affe lowo geeshsha dhaggeeffattu. Ikkollana, «Ma hasi'rootto?» woy, «Ise ledo mayira hasaawatto?» yiinosihu dino.

²⁸ Hakkunni gedensaanni mancho gambayichose hakko agurte katama hadhe,

²⁹ «Loosoommare baala kulinoe mancho la'inannina amme! Isi Kiristoosa ikka ikka?» yitu.

³⁰ Mannuno katamunni kae Yesuusiwa mari.

³¹ Konne mereero rosaano Yesuusa, «Rosiisaancho, mitore afooho wodhi!» yitusi.

³² Isi kayinni, «Ani iteemmoti ki'ne affinoonnikki sagale nooe» yii.

³³ Kunnira rosaanosi, «Sagale abbinosihu no ikka?» yite mimmitonsa xa'mitu.

³⁴ Yesuusi qole, «Ane sagale soyinoehu haja wonshatenna loososi guutate.

³⁵ Ki'ne kayinni, ‹Shoolu agani gedensaanni gide gamba assi'nanni yanna iillitanno› diyitinanni? Ani kuleemmo'nena ille'nenni la'e! Gidu laalino; gamba assateno iillino.

³⁶ Gide mixxannohu hunkiisi guma gudhanno; hegere heeshshora ikkanno laalcho gamba assi'ranno. Wixi'rannohunna mixxannohu mitteenni hagiidhanno.

³⁷ Kunnira, ‹Mitu wixanno; mitu midanno› yinanni maammaashshi halaaleho.

³⁸ Anino daafurtinoonnikkiha middinara soommo'ne; wolootu daafurte loossino; ki'ne kayinni insa daafurinni laalcho afidhinoonni» yiinsa.

³⁹ Mancho, «Loosoommare baala kulinoe» yite coyidhino qaalire Samaariyu manni baalu ammani.

⁴⁰ Samaariyu manni Yesuusiwa mari yannara, insa ledo keeshshanno gede huuccidhusi. Isino insa ledo lame barra keeshshi.

⁴¹ Qaalesi macciishshe lowo manni lexxe ammanisi.

⁴² Manchoteno, «Xa ninke iso amma'ninoommohu, ati kuloottankehura ikkikkinni, ninke uminke macciishshinoommo daafiranna isi addinta alamete gatisaancho ikkinota buunxoommo daafiraati» yitu.

YESUUSI GASHSHAANCHU BEETTO HURSI

⁴³ Yesuusi Samaariyaho lame barra hosihu gedensaanni Galiila ha'ri.

⁴⁴ Isi umisinni alba balaxe, «Himanaanchu umisi gobbara diayirranno» yee coyi'rino.

⁴⁵ Ikkirono, Galiila ha'ri yannara Galiilu manni danchu albinni haa'rinosi. Hatto assitinohu, Agure Sa"ate Ayyaana ayirrisate Yerusaalame martinowa assinore affino daafiraati.

⁴⁶ Hakkunni gedensaanni, Yesuusi waa woyinete xajjera soorriwa Galiila Qaana mari. Hatte yannara Qifirinahoomi mittu gashshaanchira beettu dhiwame no.

⁴⁷ Isino Yesuusi Yihudu gobbanni Galiila dayinota macciishshe kae Yesuusiwa dayi. Hakku manchi Yesuusi Qifirinahoomi mare foolu fulara rahe nooha beettosi hursannosi gede huucci'ri.

⁴⁸ Yesuusi qole, «Ki'ne malaatenna maalale la'inikkinni diammanitinanni» yiisi.

⁴⁹ Beettu anni Yesuusa, «Mooticha'ya ballo, beetti'ya reyikkinni rakke iillie» yii.

⁵⁰ Yesuusi qole, «Beettikki hurinona ha'ri!» yiisi.

⁵¹ Manchu minira ha'ranni hee'reenna soqqamaanosi doogo xaadde, «Beettikki hurino» yitusi.

⁵² Manchuno beettisira woyya ikkinohu ma yannaatiro xa'mi. Insano, «Iibbabbo higginosihu be'ro lamala saatenniiti» yitu.

⁵³ Beettu annino hatti yanna Yesuusi, «Beettikki hurino!» yiisita ikkitinota qaagi. Kunnira hatte yannanni kayisse isinna minisi manni baalu Yesuusa ammani.

⁵⁴ Tini maalale Yesuusi Yihudunni Galiila daye layinkimeeshsho loosinote.