YOHAANNISI 2 - Qullaawa Maxaafa

YESUUSI WAA WOYINETE XAJJERA SOORRI

¹ Sayikki barra Galiilaho Qaana yinanni katamira adhatenna adhamate jili no. Yesuusi amano hakkiicho no.

² Yesuusanna rosaanosino hakko jilira woshshinoonni.

³ Jilaho worroonniti woyinete xajje gooffeenna Yesuusi ama Yesuusira, «Wodhitinoti woyinete xajje gooffinonsawe» yitu.

⁴ Yesuusino, «Ama! Asseemmore ati kulattae? Xaara yanna'ya di"iillitino» yiise.

⁵ Yesuusi ama soqqantanni noore woshshite, «Isi yaanno'nere baala asse!» yitu.

⁶ Ayihudootaho keeraa'mate seeri noonsa daafira, hakkiicho lee kinchu googidda no; mitte mittenti lame woy sase gambayicho amaddannote.

⁷ Yesuusino soqqantannore, «Googiddate waa wonshe!» yii. Insano waa afuu geeshsha wonshitu.

⁸ Yesuusino soqqantannore, «Hinkiiltine jilu murrichira uuyye!» yii. Insano yiinonsa gede assitu.

⁹ Jilu murrichino woyinete xajjera soorramino waa huuwe lai; ikkollana maminni dagginotero diafino; hinkiilte uyituri kayinni affino. Kunnira jilu murrichi seenne adhannoha woshshe,

¹⁰ «Jila ji'lannohu baalu umo asse dancha woyinete xajje shiqishanno. Woshshinoonni manni age duuwihu gedensaanni, anfi gedeeta shiqishanno. Ati kayinni tenne dancha xajje xaa geeshsha mayira gedensiisitto?» yii.

¹¹ Yesuusi tenne umi maalale loosinohu Galiilu gobbara Qaana Katamiraati. Kunni garinni ayirrinyesi leellishi; rosaanosino ammantusi.

¹² Hakkunni gedensaanni Yesuusinna amasi, roduuwisinna rosaanosi mitteenni Qifirinahoomi Katama hadhe, hakko shiima barra keeshshitu.

YESUUSI QULLAAWA MINE DADDA'LITANNORE SHORRI

¹³ Ayihudennihu Agure Sa"ate Ayyaani iillino daafira, Yesuusi Yerusaalame ha'ri.

¹⁴ Hakkiicho Qullaawa Mine lalo, ge'reewonna lemboola hirtannorenna ofolte woxe soorritanni noore afi.

¹⁵ Siiwote liche seekke lalonna ge'reewo baala Qullaawu Mininni fushshi. Soorridhanni nooriha woxensano finci; barcimmansano tuge gombisi.

¹⁶ Lemboola hirtannoreno, «Kore kawiichinni hoolle; anni'ya mine daddalunniha assitinoonte!» yiinsa.

¹⁷ Hatte yannara rosaanosi, «Minikki laala giirate gede ittue» yine borreessinoonniha qaaggu.

¹⁸ Kunnira Ayihudete gashshaano, «Konne assate roorre afi'roottota, ma maalale loosse leellishattonke?» yitu.

¹⁹ Yesuusino, «Konne Qullaawa Mine diiggineenna, ani sasu barri giddo qole mineemmona» yiinsa.

²⁰ Ayihudete gashshaano qolte, «Konne Qullaawa Mine 46 dirinni minne gundoonni. Ati sasu barrinni hiitto assite minatto?» yitu.

²¹ Yesuusi Kayinni Qullaawu Mini gede asse coyi'rinoti mannimmasiiti.

²² Rosaanosi Yesuusi reyotenni kai yannara, balaxe coyi'rinore qaaggino. Hakkunni daafira, Qullaawa Borro giddo borreessinoonnirenna Yesuusi coyi'rino qaale ammantu.

YESUUSI MANNU BAALU WODANITA EGENNINO

²³ Agure Sa"ate Ayyaani yannara Yesuusi Yerusaalamete assino maalale lae lowo manni ammanisi.

²⁴ Yesuusi kayinni mannu baalunku wodanita egennino daafira, diammaninonsa.

²⁵ Isi mannu wodanire baala egennino daafira, mannunnire ayino kulasira dihasiisinosi.