YOHAANNISI 18 - Qullaawa Maxaafa

YESUUSI AMADAMA

¹ Yesuusi huuccatto gudihu gedensaanni, rosaanosi ledo Qedirooni Lagichira widoonni fuli. Hakkiicho, rosaanosi ledo kaansoonni haqqe caali giddora ei.

² Yesuusinna rosaanosi wo'ma woyite hakko xaaddanno daafira, Yesuusa sayise uyihu Yihudino hakkonne darga egennino.

³ Kunnira Yihudi gamisa gaaddonna qeesootu roorrootinna Farisootu sokkino olanto hoodete adhe hakkiichira dayi. Insa caabbiyye, faanoosenna bagado anga adhite no.

⁴ Yesuusi aanasi daara noore baala afino daafira insawa shiqqi yee, «Aye hasidhinanni?» yiinsa.

⁵ Insano, «Naaziretete Yesuusa hasi'neemmo» yitu. Isino, «Aneetiwe» yiinsa. Hatte yannara, sayise uyisihu Yihudi ledonsa uurre no.

⁶ Yesuusi, «Aneetiwe» yiinsata, badhe higge gugatte gatantarte ubbu.

⁷ Yesuusi lede, «Aye hasidhinanni?» yee xa'minsa. Insano, «Naaziretete Yesuusa hasi'neemmo» yitu.

⁸ Isino, «Aneeti yoommo'newe. Ane hasidhinanniha ikkiro, kore hadhona agurrensa!» yii.

⁹ Hatto yiinohuno, «Anna'ya, oottoeri giddonni mitto nafa dihunoommo» yiino qaali wo'manno gedeeti.

¹⁰ Simiooni Pheexiroosi suxxe noo bise fushshe qeesootu qari soqqamaancho gane macca tayisi. Macca tai manchi su'mi Malkoosiiti.

¹¹ Yesuusi kayinni, «Bisekki kou giddora qoli. Anni'ya uyinoehunni qarru finiinchinni ageemmokkiha lawinohe?» yii.

YESUUSA QEESOOTU ROORRICHIWA SHIQINSHISI

¹² Hakkunni gedensaanni olantonna olantote hajajaano Ayihudete roorrooti ledo Yesuusa amadde usurtu.

¹³ Umo assite Hannawa massitusi. Qeyaafara ballo ikkinohu Hanna, hakko diro qeesootu roorrichaati.

¹⁴ Qeyaafa, «Mittu manchi mannu daafira reyiro woyyate» yee Ayihudete roorrootira mala uyino manchooti.

PHEEXIROOSI YESUUSA KAADI

¹⁵ Simiooni Pheexiroosinna mittu wolu rosaanchi Yesuusi faana hadhu. Hakku wolu rosaanchi qeesootu qari egenninosiha ikkino daafira, Yesuusi ledo hoowesi giddora ei.

¹⁶ Pheexiroosi kayinni hoowete gobbaanni bitimaho uurre no. Qeesootu roorrichi egenninosi rosaanchi bitima agarte noo beettora coyi're, Pheexiroosi hoowete giddoonni eanno gede assi.

¹⁷ Hoowete bitima agartanno beetto Pheexiroosi, «Ati hakko manchi rosaano ledoha di"ikkootto?» yitusi. Pheexiroosi qole, «Di"ikkoommo!» yee moromi.

¹⁸ Hatti yanna qiida ikkitino daafira, soqqamaanonna roorrootu uurrite giira giwaadhanni no. Pheexiroosino insa ledo uurre giira giwaa'ranni no.

QEESOOTU ROORRICHI YESUUSA XA'MINO XA'MO

¹⁹ Hatte yannara qeesootu qari Yesuusa, rosaanosirenna rosiisanno rosire xa'misi.

²⁰ Yesuusino, «Ani manna baalaho xawoho coyi'roommo; Ayihude baala gamba yitannowa xaadu minenna Qullaawa Mine wo'ma woyite rosiisoommo; maaxe coyi'roommori mitturino dino.

²¹ Ane mayira xa'mattoeyya? Coyi'rannansa macciishshitinore xa'mi; ani coyi'roommore insa affino» yee qoli.

²² Yesuusi hatto yiita, hakko noori giddonni mittu, «Qeesootu roorrichiraati togoo tumo qolattohu?» yee qawaadisi.

²³ Yesuusi qole, «Sayise coyi'roommori nooro, so'ro'ya mannaho kuli. Coyi'roommo coyi kayinni garahoro, mayira qawaadittoe?» yiisi.

²⁴ Hakkunni gedensaanni Hanna Yesuusa usurame noo gedeenni Qeyaafawa soyi.

PHEEXIROOSI YESUUSA LAYINKIMEESHSHO KAADI

²⁵ Hatte yannara Simiooni Pheexiroosi uurre giira giwaa'ranni hee'reenna, hakko noori wolootu, «Ati Yesuusi rosaano giddoha di"ikkootto?» yite xa'mitusi. Pheexiroosi daware, «Dee'ni, di"ikkoommo» yee kaadi.

²⁶ Pheexiroosi macca gane tayisi manchira fiixa ikkannohu qeesootu qari soqqamaano giddonni mittu, «Kaansoonni haqqe giddo isi ledo noottoha diafoommohe?» yiisi.

²⁷ Pheexiroosi xaano kaadi; hakkawoyintenni lukkichu gani.

YESUUSA PHILAAXOOSIWA HAADHE MASSITU

²⁸ Hakkunni gedensaanni Ayihude Yesuusa Qeyaafa qaenni haadhe gashshaanchu hoowe massitusi. Yannano soodo gutooti. Lagaabbe Agure Sa"ate Ayyaani jila ita hooggannokki gede, gashshaanchu hoowe giddora die'ino.

²⁹ Philaaxoosino insawa shiqqi yee, «Kunni manchi aana ku'litinanni coyi maati?» yee xa'minsa.

³⁰ Insano, «Kuni manchi busha assa hoogoommero, atera sayinse diuyineemmo» yite qoltu.

³¹ Philaaxoosino, «Seeri'ne garinni, massitine ki'ne umi'ne yoo yiidhe!» yiinsa. Insano qolte, «Ninkera manna shaate roorre diuyinoonninke» yitu.

³² Kuni coyi ikkinohu, Yesuusi ma garinni reyannoro coyi'rino qaali wo'manno gedeeti.

³³ Philaaxoosi galagale hoowesi giddora e"e Yesuusa woshshe, «Ati Ayihudete mooteeti?» yee xa'misi.

³⁴ Yesuusi, «Ati konne coye xa'mattoehu umikki hedonniitinso, anere mannu kulinohe garinniiti?» yii.

³⁵ Philaaxoosi qole, «Ani Ayihudichahoni? Ate anera sayisse uyituri gosakkiitinna qeesootu roorrootaati. Ati ma assootto?» yii.

³⁶ Yesuusi, «Ane gashshooti tenne gobbaha di"ikkino. Gashshooti'ya tenne gobbaha ikkoommero, olanto'ya gaarante Ayihudete anganni gatissannoe. Gashshooti'ya kayinni tenne gobbaha di"ikkino» yee qoli.

³⁷ Philaaxoosino, «Hakka woyiteetiro, ati mootete yaate?» yee xa'misi. Yesuusino, «Ani moote ikkoommota, atinni diyiitto! Ani ilamoommohunna tenne gobba dayommohu halaale farci'rammoraati. Halaalu widoonni uurrinohu qaale'ya macciishshanno» yee qoli.

³⁸ Philaaxoosino, «Halaalu maati?» yee xa'mi. Hattenne giddo hee're Ayihudootunniwa mare, «Kuni manchi assino so'ro ani diafoommo.

³⁹ Ikkollana, bashshonni budi'ne garinni Agure Sa"ate Ayyaanira mitto usuranya tireemmo'ne. Kunni daafira, Ayihudete moote tiro'neni?» yiinsa.

⁴⁰ Insa kayinni, «Barbaani ikkinnina iso tirtootinke!» yitanni cancitu. Barbaani kayinni manna mulqi'rannoho.