YOHAANNISI 17 - Qullaawa Maxaafa

YESUUSI HUUCCATTO

¹ Yesuusi konne coye coyi'rihu gedensaanni iima hige lae, «Anna'ya, yanna iillitino. Beettikki ayirrisannohe gede, atino Beettokki ayirrisi.

² Ayirrisattosihu, oottosirira baalaho hegere heeshsho aate, mannu baalu aana roorre oottosihuraati.

³ Hegere heeshshono, ati callu halaalaancho Magano ikkoottotanna soottoha Yesuusa Kiristoosa afate.

⁴ Ati oottoe looso guute baattote aana ayirrisoommohe.

⁵ Anna'ya, kalqe kalaqantara albaanni, atewa nooe ayirrinyinni xaano ayirrisie.

⁶ «Tenne gobbanni doorte oottoe mannira ate ewelumma egensiisoommo. Insa atereeti; insa anera oottoehu ateeti. Insano qaalekki wonshitanno.

⁷ Oottoeri baalu atewiinni dayinoha ikkinota insa xa affino.

⁸ Oottoe qaale oommonsa; insano adhitino. Ani atewiinni dayommota seekkite affino. Ati soottoetano ammantino.

⁹ «Ani insa daafira huucceemmo. Kuri oottoeri atere ikkitinohura insa daafira huucceemmo. Ate tenne gobba daafira dihuucceemmo.

¹⁰ Anehu baalu ateho; atehuno aneho. Anino insanni ayirreemmo.

¹¹ Ani kunni ka'a tenne gobbara dihee'reemmo; insa kayinni, tenne gobbara no. Ani Atewa daammoraati. Qullaawa Anna'ya, kuri oottoeri, atenna ane gede mitto ikkitara oottoehu su'mikki wolqanni keerunni agarinsa.

¹² Ledonsa noommo yannara, oottoehu su'mikki wolqanni keerunni agaroommonsa. Borreessinoonnihu Qullaawu Qaali wo'manno gede, baote beetto agurranna insa giddonni mittuno bainohu dino.

¹³ Xa ani atewa daammoraati; tenne gobbara hee're konne coye coyi'reemmohu, giddonsa ane hagiirri wo'ma ikkanno gedeeti.

¹⁴ Ani insara qaalekki kuloommonsa; ani tenne gobbaha ikkoommokkihura insano tenne gobbare di"ikkitino; kunnira tini gobba gibbannonsa.

¹⁵ Ani ate huucci'reemmohu insa bushuwiinni gatisattonsa gedeeti ikkinnina, tenne gobbanni fushshattonsara di"ikkino.

¹⁶ Ani tenne gobbaha ikkoommokkinte gede, insano tenne gobbare di"ikkitino.

¹⁷ Halaalikkinni qullaawoota assinsa; ate qaali halaaleho.

¹⁸ Ati ane tenne gobba soyittoente gede, anino insa tenne gobba soommonsa.

¹⁹ Insa halaalunni qullaawoota ikkitanno gede, anino insa daafira yee anenee qullaawa assoommo.

²⁰ «Ani insa daafira calla ikkikkinni, insa kultino qaalinni ane ammantannori daafirano huucci'reemmohe.

²¹ Huucci'reemmohehu insa baalunku mitto ikkitanno gedeeti. Anna'ya, ati anenni, anino atenni noommonte gede, insano ninkenni heedhanna, tini gobbano soottoeta ammantanno gedeeti.

²² Ninke mitto ikkinoommonte gede, insano mitto ikkitara, anera oottoe ayirrinye oommonsa.

²³ Ani huucci'reemmohehu ani insanni, ati anenni noottonte gede, insano co'onta mitto ikkiteenna, tini gobba soottoetanna insano baxoottonsata affaraati.

²⁴ «Anna'ya, tini gobba kalaqantukkinni baxoottoe daafira, kuri ayirrinye'ya la'ara oottoeri ani noommowa ledo'ya heedhara hasi'reemmo.

²⁵ Keeraancho Anna'ya! Tini gobba diegentinohe; ani kayinni egennoommohe. Kurino ati soottoeta egentino.

²⁶ Ati ane baxootto baxilli insawa hee'raranna anino insawa hee'reemmo. Insano ate egentara assoommo. Egentanno gede assa diagureemmo» yii.