YOHAANNISI 12 - Qullaawa Maxaafa

YESUUSIRA SHITTO BUURTU MANCHO

¹ Ayihudennihu Agure Sa"ate Ayyaani eara leyu barri gate hee'reenna, Yesuusi Biitaaniya ha'ri. Biitaaniyu, Yesuusi reyotenni kayisi manchi Aliaazaari hee'ranno qachaati.

² Hakkiicho hashshi hurbaate qixxeessinisi; Maartano soqqamatenni kaa'litunsa. Yesuusi ledo hurbaate itara shiqino manni ledo Aliaazaarino no.

³ Hatte yannara Maariyaami lowo woxinni hirrannita litirete darate ikkitanno shitto haadhe Yesuusi lekkara duntu; dananchisennino fiitu. Su'niilluno mine wo'mi.

⁴ Yesuusi rosaano giddonni mittu iso hirihu Asiqorootu Yihudi,

⁵ «Tenne shitto 300 birrira hirre woxe buxanete diuyinanni?» yii.

⁶ Hatto yiinohu buxane marare ikkikkinni, mooraancho ikkinohuraati; woxe amadannohu iso ikkino daafira, aaninni kayise adha rosinohuraati.

⁷ Yesuusi kayinni, «Tenne shitto waamma'ya barrira qixxeessitinona, agurrese!

⁸ Buxane wo'manka woyite ki'ne ledo no. Ane kayinni, wo'manka woyite diaffinannie» yii.

⁹ Hatte yannara lowo Ayihudooti Yesuusi Biitaaniyaho noota affe daggu. Dagginohu Yesuusa calla la'ara ikkikkinni, Yesuusi reyotenni kayisiha Aliaazaarino la'ara yiteeti.

¹⁰ Qeesootu roorrooti Aliaazaarino shitara ma'litu.

¹¹ Isono shitara ma'litinohu, isinni kainohunni lowo Ayihude insa agurte hadhe Yesuusa ammantinohuraati.

YESUUSI AYIRRINYUNNI YERUSAALAME EI

¹² Layinki soodo Agure Sa"ate Ayyaana ayirrisate dayinohu kiiro batinyu manni Yesuusi Yerusaalame daannota macciishshi.

¹³ Kunnira saattu daro haa're Yesuusa haa'rara fule, «Galata Maganoho; Mootichu su'minni daannohu Israeelete Moote maassaminoho» yaanni qeexaa'li.

^14-15 Yesuusi harrichote ilmatticho afi're gulufi. Kunino, «Tsiyooni Katama, waajjitooti! Kuneeti mootekki harrichote ilmatticho gulufe daanno» yinoonni himani wo'manno gedeeti.

¹⁶ Rosaanosira kuni coyi umo dileellinonsa. Ikkollana, Yesuusi ayirrinyunniwa ei yannara konne coye isi daafira borreessinoonnitanna konneno isira yine assinoonnita qaaggu.

¹⁷ Yesuusi Aliaazaari waammate giddonni woshshi woyitenna reyotenni kayisi yannara ledosi noo manni baalu afinore duduwi.

¹⁸ Lowo manni haa'rasira fulinohuno assino maalale macciishshinohuraati.

¹⁹ Farisootu kayinni insa insanaawa, «Kune gobba baala isi hoode hadhanni no. Ninke mittoreno assa hoongoommowe!» yitu.

SHIIMU GIRIIKOOTI YESUUSA HASIDHU

²⁰ Ayyaana ayirrisate Yerusaalame dagginori giddo shiimu Giriikete manni ledo no.

²¹ Insa Galiilaho Beetesayidu manchiwa Filiphoosiwa shiqqe, «Mooticha, Yesuusa la'nammora hasi'noommo» yitu.

²² Filiphoosino mare Indiriyaasira kuli. Lamunku mitteenni marte Yesuusira kultu.

²³ Yesuusino, «Manchi Beetti ayirrinyunniwa eanno yanna iillitino.

²⁴ Halaale kuleemmo'nena, qamadete gumi uulla uwe reya hoogiro callisi gatanno; reyiro kayinni, batinye guma laalanno.

²⁵ Lubbosi baxannohu hu'nanno; tenne gobbara lubbosi giwannohu hegere heeshshora wodhanno.

²⁶ Anera soqqama hasi'rannohu hoode'ya dayo; soqqamaanchi'ya ani noommowa hee'ranno. Anera soqqamannoha Anni'ya ayirrisannosi» yii.

YESUUSI IILLANNOSI QARRIRENNA REYOSIRE KULI

²⁷ Xaano Yesuusi, «Kune lubbo'ya shettinona, hanni hiikko! Anna'ya, tenne shettonni gatisie! Hatto yeemmokki gede, dayommohu konne qarra adhammoraatina, giddoonni hige sa"a hasiissannoe.

²⁸ Anna'ya, su'makki ayirrisi!» yii. Hakkunni gedensaanni, «Su'ma'ya ayirrisoommo; ledeno ayirriseemmo» yitanno huuro gordunni daggu.

²⁹ Hakkiicho uurre noo manni konne coye macciishshi yannara, «Kuni beleqoho» yii. Gamu qole, «Isi ledo sokkaasinchu hasaawanni no» yii.

³⁰ Yesuusi qole, «Tini huuro dagginohu dianeraatina, ki'neraati.

³¹ Tenne gobbara yoo yinanni yanna iillitino; tenne gobba gashshaancho fushshine tungannihu xaati.

³² Ani sutameemmo yannara baalanka anewa gamba asseemmo» yii.

³³ Yesuusi hatto yiinohu ma garinni reyannoro kula hasi'reeti.

³⁴ Hatto yiita mannu, «Seeru giddo, ‹Kiristoosi hegere geeshsha hee'ranno› yine borreessinoonni. Ati kayinni, ‹Manchi Beetti sutama hasiissannosi› mayira yiitto? Kuni Manchi Beettino ayeti?» yii.

³⁵ Yesuusi daware, «Shiima yanna geeshsha xawaabbu hee'ranno'ne. Tunsichu amadanno'nekki gede xawaabbu hee'reenna alba higgine hadhe. Tunsichunni ha'rannohu mamira ha'ranni nooro diafino.

³⁶ Xawaabbu ooso ikkitinanni gede, xawaabbu hee'reenna'ne xawaabba ammanne!» yiinsa. Yesuusi konne coye coyi're kae insawiinni go'li.

AYIHUDENNITA AMMA'NA HOOGANSA

³⁷ Yesuusi tenne maalale baala albansaanni loosanni hee'reenna nafa, Ayihudootu diammantinosi.

³⁸ Kuni ikkinohuno himanaanchu Isayaasi, «Mooticha, ninke coyi'neemmore ayi ammanino? Kaaliiqi wolqa ayera leeltino?» yiino qaali wo'manno gedeeti.

³⁹ Kunnira ammana didandiitino; hakkuno himanaanchu Isayaasi wolewa,

⁴⁰ «Illensanni la'e affannokki gedenna, wodaninsanni wodanchitannokki gede, higgannokki gedenna hursannonsakki gede, Maganu illensa ballisino; wodanansano dilleessino» yiino coyi wo'maraati.

⁴¹ Isayaasi togo yiinohu Kiristoosi ayirrinye afino daafira, isire coyi'ranniiti.

⁴² Ikkirono Ayihudete roorrooti giddonni nafa batinyu Yesuusa amma'nitino. Ikkollana, «Farisootu xaadu mininni fushshite huntannonke» yite waajjitino daafira konne coye xawoho dihasaabbino.

⁴³ Tenne gibbinohu, Maganunkunni roore mannu jajansara hasidhinohuraati.

YESUUSI YAANNO YOO

⁴⁴ Yesuusi qoonqosi naggi asse, «Ane amma'nannohu, diane callana soyinoehano amma'nanno.

⁴⁵ Ane la"annohu, ane soyinohano la"anno.

⁴⁶ Ane amma'nannohu baalu tunsichoho hee'rannokki gede, ani tenne gobba xawaabba ikke dayommo.

⁴⁷ Qaale'ya macciishshe agadhannokkihura yoo yeemmohu ane di"ikkoommo. Ani tenne gobba manna gatisate ikkinnina insa aana yoo yaammora didayommo.

⁴⁸ Ane hasi'rannokkihunna qaale'ya giwannohu aana yoo yaannohu no. Kuni ani kuleemmo qaali goofimarchu barra isi aana yoo yaannosi.

⁴⁹ Ani umi'ya roorrenni dicoyi'roommo. Coyi'reemmorenna coyi'reemmo gara hajajinoehu soyinoe Annaati.

⁵⁰ Isi hajajo hegere heeshsho ikkitinota egennoommo. Kunnira ani Anni'ya kulinoere coyi'reemmo» yii.