UMI YOHAANNISI 5 - Qullaawa Maxaafa

AMMANA TENNE GOBBA QEELTANNO

¹ Yesuusi, Buuramino Moote ikkinota ammanannohu baalu, Maganu ilaati; anna baxannohu baalu beettono baxanno.

² Maganu ooso banxeemmota anfannihu, Magano baxatenniitinna hajajosi agadhatenniiti.

³ Magano baxate yaa hajajosi agadhate; hajajosino kaajjado di"ikkitino.

⁴ Maganu ila ikkinohu baalu tenne gobba qeelanno. Tenne gobba qeeltannotino ammanankeeti.

⁵ Yesuusi Maganu Beetto ikkinota ammanannoha agurranna, tenne gobba qeelannohu ayeti?

KIRISTOOSIRE FARCI'RA

⁶ Cuuamasire kulanno waanna reyosire kultanno mundee haa're dayinohu Yesuusa Kiristoosaati. Isi waa calla ikkikkinni waanna mundee haa're dayino. Kuni coyi halaale ikkinota Qullaawu Ayyaani farci'ranno.

⁷ Farcidhannori sasu no;

⁸ insano Ayyaanaho, waahonna mundeete. Sasunku sumuu yitanno.

⁹ Mannu farci'ranno coye ammanneemmo; Maganu farci'ra kayinni wo'manka roorete; Maganu Beettisire farci'rino coyino konneeti.

¹⁰ Maganu Beetto ammanannohura farci'ro noosi. Magano ammanannokkiha, Maganu Beettire farci'noonni coye ammana hoogasi kaphaancho assitinosi.

¹¹ Tini farci'rono, Maganu hegere heeshsho uyinonketanna tini heeshshono Beettisinni ikkitinota kultannote.

¹² Maganu Beetti noosihura heeshsho noosi. Maganu Beetti noosikkihura heeshsho dinosi.

HEGERE HEESHSHO

¹³ Maganu Beetto ammantinoonnirira hegere heeshsho noo'neta egentinanni gede tenne sokka borreessoommo'ne.

¹⁴ Isiwa noonkehu hawaqi'neemmo coyi konneeti; isi hedino garinni huucci'neemmore baala macciishshannonke.

¹⁵ Huucci'nummore macciishshannonketa anfummoro, iso huucci'neemmore baala adhineemmota egenninoommo.

¹⁶ Ayino rodiisi reyote iillishannokki cubbo loosanna afiro, huuccatto assosina; cubbisi reyote iillishannoha ikka hoogiro, Maganu heeshsho aannosi. Reyote iillishanno cubbino no; hakkunnira, «Huuccona» diyeemmo.

¹⁷ Bushu loosi baalu cubboho; ikkollana reyote iillishannokki cubbi no.

¹⁸ Maganu ila ikkinohu baalu cubbo diloosanno; Maganu Beetti agarannosi daafira, bushuno digawajjannosi.

¹⁹ Ninke Maganunnire ikkinoommotanna tini gobba gudisante bushunni amadantinota egenninoommo.

²⁰ Maganu Beetti dayinotanna halaale anfeemmo gede wodancha uyinonketa egenninoommo. Beettisi Yesuusi Kiristoosi widoonni halaalaanchu Magani ledo mittimma afi'noommo. Yesuusi Kiristoosino halaalaancho Maganootinna hegere heeshshoho.

²¹ Ooso! Kaphu magannawiinni umo'ne agadhe!