UMI XIMOOTEWOOSI 2 - Qullaawa Maxaafa

MAGANO MAGANSI'NANNI GARA

¹ Magano magansi'ratenninna kawajjaame heeshshonni mannu baalu daafira huuccatto, eeggonna galata shiqinshanni gede amaaleemmo.

² Magano waajjatenninna danchu amanyootinni, keerunnitanna ga'labbitte heeshsho hee'neemmo gede, mootoollatenna gashshaano baalate Magano huuccensa.

³ Kuni coyi, Gatisaanchinke Maganu albaanni danchahonna hagiirsiisannoho.

⁴ Maganu halcho, mannu baalunku gatannonna halaale afanno gedeeti.

⁵ Maganu mittoho; mereeroho hee're Maganonna manna araarsannohuno mittoho. Isino, manna ikkinohu Yesuusa Kiristoosaati.

⁶ Manna baala cubbuwiinni gatisate, umosi wodote sayise uyinohu isooti. Kuni coyi ikkinohu, agarroonni yanna iillitanno woyite, Maganunniha gatisate looso leellishate naqaashshete.

⁷ Anino ammananna halaale lallawate soqqamaasinchonna rosiisaancho ikke daganniwa soqqame dayommohu kunniraati. Halaale coyi'reemmo ikkinnina dikapheemmo.

⁸ Kunnira, addi addi darga noo labballi hanqonna gibbo agurte, qullaawa angansa iima qolte kayisse huuccitanno gede hasi'reemmo.

⁹ Meentuno umo biifisi're, culka woy irra woy lowo woxinni hirranni imaana uddi'ratenni seesa agure, arshimmatenninna kawajjotenni seesona.

¹⁰ Magano magansi'neemmo yaanno meenti dancha looso loosatenni seesona.

¹¹ Meyati ga'labbi yite hajajantanni rossona.

¹² Meyati ga'labbi yito; rosiissara woy labbaahu aana mookkara difajjeemmo.

¹³ Balaxe Addaami kalaqamino; Heewani gedensaanni kalaqantino.

¹⁴ Dogantinotinna Maganu hajajo diigginotino meyate; dogaminohu Addaami di"ikkino.

¹⁵ Ikkollana meyati ammanatenni, baxillunninna qullaawa ikkatenni kaajjite heedhuro ooso ilatenni gattanno.