UMI TESELONQE 5 - Qullaawa Maxaafa

MOOTICHU DAA QIXXAABBINE AGADHE

¹ Roduuwa, hatte yannarenna hakko barrire borreessinammo'nera dihasiisanno.

² Mootichu barri, hashshi mooraanchi gede ikke daannota ki'nenni seekkitine egentinoonni.

³ Mannu, «Keereho; qarru dino» yaanna, godowinni noo mancho amaddanno game gede, bao hedeweelcho daggannonsa; gatteno diaffanno.

⁴ Ki'ne kayinni roduuwa, tunsichu giddo heedhinannire di"ikkitinoonni. Kunnira barru hedeweelcho mooraanchimma didaanno'ne.

⁵ Ki'ne baalunku xawaabbunna barri mannaati. Hashshi woy tunsichu manna di"ikkinoommo.

⁶ Kunnira, wolootu gede goxa agurre, xaate baqqi yine jilbunni hee'no.

⁷ Goxannohu hashsha goxanno; dimbitannorino hashsha dimbitanno.

⁸ Ninke kayinni barri manna ikkinoommohura, jilbunni hee'no; ammanannitanna baxillunnita siwiilu uddano uddi'no. Gatote hexxono siwiilu gullee gede assine umoho wodhino.

⁹ Maganu hanqoho ikkikkinni, Mootichinke Yesuusi Kiristoosi widoonni hinge gato afi'nammora woshshinonke.

¹⁰ Isi reyinonkehu, hee'nummorono reyinummorono ledosi hee'neemmo gedeeti.

¹¹ Kunnira xa assitinanni heedhinoonninte gede, mimmito'ne jawaachishshenna dhaabbe.

JEEFOTE DHAANSA

¹² Roduuwa, ki'ne giddo'ne daafurtinore, Mootichunni gashshitino'nerenna seejjitino'nere ayirrissinanninsa gede huucci'neemmo'ne.

¹³ Loossino loosira lowo ayirrinyinna baxillu hee'ro'ne. Mimmiti'ne ledono keere heedhe.

¹⁴ Roduuwa, amaalleemmo'nena cee'maleeyye seejje; waajjaleeyye jawaachishshe; wolqiweeloota kaa'le; manna baala dandee.

¹⁵ Bunshe assinohura ayino bado qoloonke. Hatteentenni wo'manka woyite mimmiti'neranna wolu manni baalaho dancha coye assate jawaatte.

¹⁶ Wo'manka woyite hagiidhe!

¹⁷ Agurtinikkinni huuccidhe!

¹⁸ Baalunku coyira galaxxe! Yesuusi Kiristoosinni afidhinoonni heeshshonni Maganu ki'newiinni hasi'ranno coyi konneeti.

¹⁹ Qullaawu Ayyaani giira xoyissitinoonte;

²⁰ himanano mishshinoonte.

²¹ Baalanka coye fonqoltine la'e; dancha ikkinoha adhe.

²² Bushu coyi baaluwiinni xeertidhe.

²³ Keeru Magani baalunku coyinni qullaawoota asso'ne. Ayyaani'ne, lubbo'ne, mannimma'ne baala, Mootichinke Yesuusi Kiristoosi daanno yannara mishama nookkiha agarante heedho.

²⁴ Woshshino'nehu ammanaminoha ikkino daafira, konne coye assanno.

²⁵ Roduuwa'ya, ninkerano Magano huuccenke!

²⁶ Roduuwa baalanka, qullaawa sunqamanni keere haadhe.

²⁷ Tenne sokka qullaawootu roduuwi baalaho nabbabbinanni gede Mootichu su'minni eegammeemmo'ne.

²⁸ Mootichinke Yesuusi Kiristoosi elto ki'ne ledo heedho!