UMI TESELONQE 2 - Qullaawa Maxaafa

PHAAWULOOSI TESELONQE GOBBARA LOOSINO LOOSO

¹ Roduuwa'ya! Ki'ne la"ate daanke mullaricho ikkitinokkita ki'nenni egentinoonni.

² Ki'ne affininte gede, kunni albaanni Filiphisiyusi hee'nummo yannara, qarrinsoonninkenna xonnoonninke. Lowo geeshsha gimbinkerono ki'nera Dancha Duduwo kulleemmo'ne gede Maganinke jawaante uyinonke.

³ Eegammoommo'nehu so'rotenni woy bunshetenni woy xagarrotenni di"ikkino.

⁴ Coyi'nanni hee'noommohu, Maganu Dancha Duduwo ninke hexxe eeggo uyi'rinonke daafiraati. Hakkuno wodananke fane la"anno Magano hagiirsiisateeti ikkinnina, manna hagiirsiisate di"ikkino.

⁵ Mitte hingeno afuunni donge woy woxe hasi'ne coyi'noommokkita ki'nenni affinoonni. Maganuno naqaashshenkeeti.

⁶ Ki'neno ikke, wole mannano ikko ayino jajankera dihasi'noommo.

⁷ Kiristoosi soqqamaasine ikkankenni hasiisannonkere ki'newiinni adhineemmohu gatino. Ikkollana oosose seekkite towaxxitanno ama gede, giddo'ne kawajjotenni hee'noommo.

⁸ Lowo geeshsha banxeemmo'ne daafira, Maganunniha Dancha Duduwo kula calla ikkitukkinni, ki'nera lubbonke nafa aate qixxaambe hee'noommo.

⁹ Roduuwa'ya, daafuronkenna mitiimmanke affinoonni. Maganunniha Dancha Duduwo kullummo'ne yannara, mittoho nafa duha ikkineemmo'nekki gede, hashshanna barra loonsanni daafurroommo.

¹⁰ Ki'ne ammanaanote mereero hee'nummo yannara qullaawoota, keeraanonna minshanniri nookkire ikkine hee'rankera ki'nenna Maganu naqaashshete.

¹¹ Annu oososira assanno garinni, ninkeno ki'ne mittu mittunkura assinoommo'nere affinoonni.

¹² Wo'manka woyite jawaachinshanni'nenna sheshifachinshanni'ne, gashshootesinna ayirrinyesi beeqqitinara woshshino'ne Magani hagiidhanno garinni heedhinanni gede xixxiimbeemmo'neta egentinoonni.

¹³ Ki'ne daafira agurrummokkinni Magano galanteemmohu wolu coyino noonke. Hakkuno, ki'ne ammantinoonniri giddo loosannoha Maganu qaale kullummo'ne yannara, mannu qaali gede assitine ikkikkinni, Maganu qaali gede assitine adhitinoonni. Addanko loosannohu Maganu qaaleeti.

¹⁴ Roduuwa'ya! Ki'ne Yihudu gobbara heedhannota Yesuusi Kiristoosinni Maganu beetekiristaane ikkitinota lawishsha assidhinoonni. Insara Ayihude qarra iillishshunsante gede, ki'nerano gobba'ne manni qarra iillishino'ne.

¹⁵ Ayihude, Mooticha Yesuusanna himanaano shite, ninkeno shorrite gobbatenni fushshitinonke. Insa Magano dadillissannoreetinna manna baala gibbannoreeti.

¹⁶ Daga gattanno qaale kulleemmokki gede nafa hooltannonke. Kunni garinni cubbu aana cubbo lexxitanni heedhanno. Kunnira xa goofimarchoho Maganu hanqi dayinonsa.

PHAAWULOOSI TESELONQE MANNA LAYINKIMEESHSHO TOWATATE HALCHI

¹⁷ Ikkollana roduuwa'ya, ayyaanunni ikkikkinni maalunni shiima yanna ki'newiinni baxxinoommohura, ki'ne sinsinnaambe illetenni anfammo'nera lowo geeshsha wo'naalloommo.

¹⁸ Ki'newa daa hasi'noommo. Roorenka ani Phaawuloosi ki'newa daate wo'ma woyite hedoommo; ikkollana Sheexaanu daa diuyinonke.

¹⁹ Mootichinke Yesuusi Kiristoosi daanno yannara albasiinni ayirrineemmoti hexxonke, woy hagiirrinke woy qeellete worraaqqanke diki'neeti?

²⁰ Addintanni ki'ne ayirrinyenkeetinna hagiirrenkeeti.