UMI SAAMUEELI 5 - Qullaawa Maxaafa

GONDOORU TAABOOTI FILISXEEMETE GOBBARA

¹ Filisxeeme Maganu Taaboota qafadduhu gedensaanni, Abeeniezeerinni kayisse Ashidoodi Katama haadhe hadhu.

² Maganinsa Daagooni minira eessite mulesi wortu.

³ Ashidoodi manni soodo gute kae la"anno woyite, Daagooni Kaaliiqi Taabootira albaanni, baattote aana gombisame nooha affu. Hakkunni gedensaanni kayisse dargasi wortu.

⁴ Layinki soodono ka'e la'anno woyite, Daagooni Kaaliiqi Taabootira albaanni, baattote aana gombisame no; angasinna umisi hiiqqaqqante xullote ubbeenna gatino widi callu dargaho no.

⁵ Daagooni qeeseno ikkito, Ashidoodi Daagooni minira daannohu baalu techo geeshsha e'nanni waalcho kadikkinni qaafe sa"anno.

⁶ Kaaliiqi Ashidoodinna qooxeessinsara noo manna baala lowo geeshsha shettote giddo tuge masisino. Darshete dhibbinnino gawajjinonsa.

⁷ Ashidoodi manni konne coye afe, «Israeelete Magani ninkenna maganonke Daagooni gawajjanni noona, Gondooru Taabooti ninkewa keeshsha dihasiissannosi» yii.

⁸ Hakkunni gedensaanni Filisxeemete manni gashshaanonsa baala woshshe, «Israeelete Magani Taaboota hiissino?» yee xa'mi. Insano, «Israeelete Magani Taaboota haadhine Gaati yinanniwa masse» yitunsa. Mannuno Taaboota yitinowa haa're ha'ri.

⁹ Taaboota haadhe massitu katamano Kaaliiqi qorichishi. Mannano shettote giddo tugi; aja akkala yiikkinni baalanka darshete dhibbinni gawajji.

¹⁰ Hakkunni gedensaannino Maganu Taaboota Eqirooni Katama haa'ne ha'nanni gede assitu. Maganu Taabooti massinoonni katamira noo manni, «Israeelete Magani Taaboota kawiira abbitinohu ninke gudisiissaraati» yee raari.

¹¹ Maganu lowo geeshsha shetisinonsahuranna reyono masissinonsa daafira mannu Filisxeemete gashshaano woshshe, «Israeelete Magani Taaboota kawiinni hooltine dayino dargira qolle. Hakkuyi ka'a kayinni goonfanni hee'noommo» yii.

¹² Reyikkinni gatino manni darshe shetissinonsa daafira, iima gordo hige raari.