UMI SAAMUEELI 10 - Qullaawa Maxaafa

¹ Hakkunni gedensaanni Saamueeli buudaho noo zayite haa're, Saaooli umira duni. Saaoolino sunqe, «Mannasi gashshatto gede Kaaliiqi buuranni noohe.

² Techo anewiinni baxxite ha'ratto woyite, Biiniyaami dannira Tselitsahi yinanniwa Raaheeli moogiwa lamu manninni xaadatto. Insano, ‹Hasatto harre leeltino; annikkino harrennire agure: Beetti'ya daafira hanni ma"asso?› yaanni yaadanni no yitannohe» yiisi.

³ «Atino hakkiinni sa'e lowo haqqicho Taaboorite geeshsha ha'ratto. Hakkono, sasu manni: Mittu meu wilii'le, mittu 3 tima, mittu qole gogu ogorira wonshinoonnita woyinete xajje haadhe Maganoho kakkalo shiqishshara Beeteli hadhanna xaadatto.

⁴ Insano keere haadhuhe gedensaanni 2 tima uyitannohe; atino uyitinoha adha gibbooti.

⁵ «Hakkunni gedensaanni Filisxeemete olamaano noowa Maganu Ilaaliwa Gibia maratto. Katama iillitanni heedheennanni himanaano maasinqo, dibbe, suusullenna bagana anga adhitinori albaanni hadhanni Maganu Gaari aaninni dirritanna xaadatto. Insano kukkubbitanni himana coyidhanno.

⁶ Hatte yannara Kaaliiqi Ayyaani dirre wolqa wonshanno. Atino kukkubbitanni insa ledo himana coyi'ratto; soorrante wole mancho ikkatto.

⁷ Kuni malaati baalu ikkanno yannara Kaaliiqi ledokki noona, seyanno yaattore baala assi.

⁸ «Ani gudinse shilqinshannitanna mittimmate kakkalo shiqishate Galgala dayemmona ati balaxxe sa'e agarie. Ani daye assattore kulammohe geeshsha 7 barra hakko agari» yiisi.

SAAOOLI MOOHA EGENNANTU

⁹ Saaooli Saamueeliwiinni baxxe ha'rara kai yannara, Maganu soorre haaro mancho assisi. Saamueeli kuli malaati baalunku hakko barranni wo'mi.

¹⁰ Saaooli soqqamaanchu ledo Gibia iilli yannara, himanaano dagge isinni xaaddu. Maganu Ayyaanino dirre wolqa wonshisi; isino hagiirrunni kukkubbanni ledonsa himana coyi'ri.

¹¹ Alba egentinosiri himanaanote ledo himana coy'ranna affe, «Qiisi beetti maikki? Saaoolino himanaanote widihoni?» yite mimmito xa'mitu.

¹² Hakkiicho hee'rannohu mittu manchi, «Tini himanaano ayete?» yee xa'mi. «Saaoolino himanaanote ledohoni?» yine maammaankannihu kunniraati.

¹³ Saaooli hagiirrunni kukkubbanni himana coyi'rihu gedensaanni, kakkalo shiqinshanniwa Maganu gaariwa ha'ri.

¹⁴ Wosiilisi isinna soqqamaanchunni xaade, «Hiikko ba'ini?» yee xa'minsa. Saaoolino daware, «Harre hansammora ha'noommo; hanse hoongummoti Saamueeliwa marroommo» yii.

¹⁵ Saaooli wosiilino, «Hanni Saamueeli yii'nere kulle"e» yii.

¹⁶ Saaooli daware, «Harre leeltinota kulinonke» yii. Saamueeli moohatto yiinosita kayinni wosiilisira dikulino.

¹⁷ Saamueeli Israeelete manna Mitsiphara Kaaliiqi xaadira woshshe,

¹⁸ «Israeelete Magani Kaaliiqi, ‹Ki'ne Gibitsetenni fushshoommo'ne. Gibitsootunna wolootu gadadissanno'neri anganni gatisoommo'ne.

¹⁹ Techo kayinni qarri'nenna shetto'ne baalantenni gatiseemmo'neha ane Magano'ne mishshine: Dee'ni, ninke moote hasi'noommo yitinoonni. Kunnira, ga're ga're'nenninna boosaalli boosaalli'nenni Kaaliiqi albira shiqqe› yiino'ne» yiinsa.

²⁰ Saamueeli Israeelete ga're baalanta shiqisheenna, Kaaliiqi Biiniyaami ga're doori.

²¹ Hakkunni gedensaanni Biiniyaami ga're boosaalli boosaallinsanni shiqisheenna, Maaxiiri boosaallo doorri. Hakkiinni aanche Qiisi beetto Saaooli doorri. Iso kayinni hanse hoongi.

²² Mannuno, «Hanni xa isi dayinoyya?» yee Kaaliiqa xa'mi. Kaaliiqino daware, «Daa dayinona, uduunnu giddo maaxame no» yii.

²³ Insano doddanni marte maaxaminowiinni haadhe abbitu. Mannu albaanni uurrinsita wole manna gujjo rooreho.

²⁴ Saamueelino manna wo'manka, «Kaaliiqi doorino manchi konneeti. Ninke giddo isi geeshshihu dino» yii. Hatte yannara mannu, «Moote hegerera moohi» yii.

²⁵ Saamueelino mootimmate hasiissanno wodhonna woga mannaho kulihu gedensaanni maxaafu aana borreesse Kaaliiqi albaanni Gondooru Taabooti mule wori. Hakkunni gedensaanni Saamueeli manna baalanka qae qaesi ha'ranno gede assi.

²⁶ Saaoolino qaera Gibia ha'ri. Maganu kakkayisino wolqaataammino ledosi hadhu.

²⁷ Mitu mitu garimalooti kayinni, «Kuni manchi hiitto asse gatisannonke?» yite mishshinosi daafira afanshano diuyitinosi. Saaooli kayinni cuqqi diyiino.