UMI PHEEXIROOSI 2 - Qullaawa Maxaafa

HEESHSHOTE KINCHONNA QULLAAWA GOSA

¹ Xaate kunni ka'a bunshe baala, xagarro baala, awaawursha, hinaasonna busha hasaawa baala hunne.

² Aggine gatote widira higgine lophate, xa ilamino qaaqquulli gede ayyaanaame qaalu ado halche.

³ Halcha dandiitinannihuno, Maganu shaqqado ikkinota buuxxine affiniha ikkirooti.

⁴ Kunnira heeshshote kincho ikkinohuwa Mootichu Yesuusiwa shiqqe; kuni kinchi mannu mishe agurinoho; Maganu kayinni doorinosihonna ayirrisinosiho.

⁵ Mootichu Yesuusiwa shiqqinannihuno, heeshshote kinna gede ayyaanaamo mine ikkitine minamateeti. Kunni garinni Yesuusi Kiristoosi widoonni tashshi assitannota ayyaanaame kakkalo Maganoho shiqishate qullaawa qeesoota ikke.

⁶ Qullaawa Borro giddo, «Kune dooraminohanna ayirrado dhaawate kincho Tsiyooni woreemmo. Iso ammaninohu disaalfatanno» yine borreessinoonni.

⁷ Kuni kinchi ki'ne ammantinoonnirira ayirrinyeho. Ammantinokkirira kayinni, «Ogeeyye mishshe tugge agurtino kinchi, mineho dhaawate kincho ikkino»

⁸ Qolleno, «Kuneeti gufi'nanni kinchi, mannu gufi're uwannohu jawu kinchi» yinoonni. Insa qaale ammana hoogansanni gufidhino; insa albanni tennera gaamantinoreeti.

⁹ Ki'ne kayinni tunsichunni maala'linanni caabbichiwa woshshino'ne Maganiha dhaggete looso kultinara doorantinoonni ilamaati; mootete qeesootaati; qullaawa mannaati; isira baxxitinoonni gosaati.

¹⁰ Ki'ne alba Maganu manna di"ikkitinoonni; xa kayinni Maganu mannaati. Alba maaro diafidhinoonnireeti; xa kayinni maaro afidhinoonni.

MAGANU SOQQAMAANO

¹¹ Jaalla'ya! Ki'ne tenne gobbara wosinanna manni gobba manna ikkitinoonni daafira, lubbote ledo gaarantanno yorto maalunnitewiinni xeertidhinanni gede huucci'reemmo'ne.

¹² «Bunshe assitannoreeti» yite he'mitu'nerono, Maganu towatankera daanno barra ammantinokkiri dancha looso'ne la'e Magano galattanno gede, insa ledo heedhinanni yannara danchu amanyooti heero'ne.

¹³ Mootichu Yesuusira yitine roorre uyinoonninsarira hajajamme. Aliidi roorricha ikkinohura mooteteno hajajamme.

¹⁴ Gobba gashshitinorira hajajamme. Insa bunshe assitannore qorichishate, dancha assitannore galatate mootetewiinni sonkannireeti.

¹⁵ Danchumma assatenni balala coye coyi'rannoha hawanya manna coyi'ra hooltinanni gede Maganu fajjooti.

¹⁶ Maganu soqqamaano gede fafisidhine heedhe ikkinnina, fafisi'ra'ne kayinni bunshe'ne diphitinannita ikkitoonke.

¹⁷ Manna baala ayirrisse; roduuwa baxxe; Magano waajje; moote ayirrisse!

KIRISTOOSI QARRI LAWISHSHANKEETI

¹⁸ Ki'ne soqqamaano biilla'nera ayirrinyunni hajajamme! Danchuullehonna shaqqaddaho calla ikkikkinni, bushuullehono hajajama hasiissanno'ne.

¹⁹ Mannu galatamannohu beebbatenni qarra adhanni Maganoho yee cincirooti.

²⁰ Bunshe assitineenna qorichinshanna'ne cincitiniro, ma galati noo'ne? Danchumma assitinanni heedhineenna qarru amadeenna'ne cincitiniro kayinni, Maganuwiinni galata afidhinanni.

²¹ Woshshinoonni'nehuno kunniraati. Isi faalere ikkitinanni gede, Kiristoosi qarra adhatenni lawishsha ikkino'ne.

²² Isi mitto cubbono diloosino; afiisinni sao difultino.

²³ Xontannasi qole dixonino; qarra adhanni hee're halaale coyi'ranno Maganira eeggo uyino ikkinnina, qole direewino.

²⁴ Cubbuwiinni baxxine keeraanchimmatenni hee'nammora, cubbonke manninatisinni masiqalu aana duqqino; isi madanni ki'ne hurtinoonni.

²⁵ Ki'ne baino ge'reewi gede ka'anna kawa raataabbinoonni; xa kayinni lubbo'ne allaalaanchiwanna agaraanchiwa higginoonni.