UMI MOOTOOLLA 22 - Qullaawa Maxaafa

HIMANAANCHU MIKIYAASI AKIAABI QOROPHISIISI

¹ Lamu diri aleenni Sooriyunna Israeelete mereero olu uurreenna keere heedhu.

² Ikkollana sayikki diro Yihudu moote Iyosaafiixi Israeelete moote Akiaabi la"ara ha'ri.

³ Akiaabi balaxe ledosi gashshaanora, «Geleaadi noohu Raamooti Katami dininkeho? Sooriyu moote anganni mayira adha hoongummo?» yiino.

⁴ Akiaabi Iyosaafiixi, «Raamooti Geleaadi Katama qasa kaa'lattoeni» yee xa'mi'ri. Iyosaafiixino, «Atilla qixxaawittoro ani ledokki noommo. Olanto'yanna faradi'yano ate anga no.

⁵ Ikkollana, hanni balanxe Kaaliiqi yaannore anfo ikka?» yii.

⁶ Akiaabino 400 himanaano woshshe, «Mare Raamooti Katama qasonso aguro?» yee xa'minsa. Insano, «Kaaliiqi qeelle aannohena, marte qasi» yitusi.

⁷ Iyosaafiixi kayinni, «Kaaliiqi yaannore kulannonkehu wolu himanaanchi dinoni?» yee xa'mi.

⁸ Akiaabino, «Mittu Yimila beetti Mikaya yinannihu noona, isi anera bushare ikkinnina danchare himanannokki daafira iso dibaxeemmo» yii. Iyosaafiixi qole, «Hatto yitooti!» yiisi.

⁹ Hakkunni gedensaanni Akiaabi ledosi gashshaano giddonni mitticho woshshe, «Rakke Yimila beetto Mikaya hasse abbie» yii.

¹⁰ Hatte yannara lamenti mootoolla mootimmate imaana uddidhe, Samaariyu huxxi waalchi mule ayirrado barcimmara ofolte heedheenna, himanaano baalanti albansaanni dagge himana coyidhanni no.

¹¹ Insa giddonni mittichu Kenaina beetti Sedeqiyaasi siwiilunni seekkinoonni buudda haa're Akiaabira, «Kaaliiqi, ‹Tenne buuddanni Sooriyoota qasse qeelle angara adhatto› yaannohe» yiisi.

¹² Wolootu himanaanono ledde, «Qeelattona, Raamooti Geleaadira gaadi. Kaaliiqino qeelle aannohe» yitusi.

¹³ Hakko mereero woshshara marino sokkaanchi Mikaya, «Kuneeti wole himanaano baalanti mittu afiinni Akiaabi qeelannota kultanni no. Atino insa yitinota yiittoro woyyate» yiisi.

¹⁴ Mikaya qole, «Kaaliiqi halaaleeti. Kaaliiqi kulannoere calla coyi'reemmo» yee dawarisi.

¹⁵ Mikaya dayenna Akiaabi, «Mikaya! Moote Iyosaafiixinna ani ha'ne Raamooti qansonso agurro?» yee xa'misi. Mikaya daware, «Ee, Kaaliiqi qeelle aannohena, marte qasi!» yiisi.

¹⁶ Akiaabi kayinni, «Me"e hige kuleemmohe? Kaaliiqi su'minni coyi'ratto woyite halaalaancho himana kuliewe yoommohe!» yii.

¹⁷ Mikaya daware, «Israeelete olanto baala allaalaanchu nookki ge'reewi gede ikkite ilaallate aana billaallitanna afoommo. Kaaliiqino, ‹Kuni manni gashshannoha diafi'rino. Kunnira rahe keerunni qae higo› yiino» yiisi.

¹⁸ Akiaabi Iyosaafiixira, «Isi anere bushare ikkinnina danchare horonta dicoyi'ranno diyuummohe?» yii.

¹⁹ Mikayano lede, «Xa kune Kaaliiqi yaannore macciishshi! Sokkaasinesi baala qiniiteenninna guraanni uurrite heedheenna, Kaaliiqi gordoho ayirradu barcimisira ofolle nooha afoommo.

²⁰ Isino, ‹Akiaabi ha're Raamooti reyanno gede ayi mare so'risiisa ikka?› yiino. Sokkaasinete giddonnino mitu mitte hedo, woluno qole wole hedo shiqishino.

²¹ Gedensaanni mittu ayyaani Kaaliiqiwa shiqe, ‹Ani so'risiisa dandeemmo› yiino.

²² «Kaaliiqino, ‹Hiitto assite so'risiisatto?› yee xa'mi. «Hakku ayyaanino, ‹Mare Akiaabi himanaano baala kapho himantanno gede asseemmo› yiino. «Kaaliiqino, ‹Maahoyyena marte so'risiisi. Yootto coyi ikkannohena› yiino» yiisi.

²³ Mikaya lede, «Kuni ikkanni noo coyino isooti. Himanaanokki kapho kultannohe gede assinohu Kaaliiqaati. Bao daggannohe gedeno Kaaliiqi coyi're kaino» yee hasaawasi gudi.

²⁴ Coyi're gudihu gedensaanni, Sedeqiyaasi daye Mikaya qawaade, «Kaaliiqi Ayyaani anewiinni sae atera mamoote coyi'rihe?» yiisi.

²⁵ Mikayano, «Mineho holgeenni sa'e maaxamatto woyite afattona» yee dawarisi.

²⁶ Hatte yannara Akiaabi mitto mancho, «Mikaya amadde katamu gashshaanchiwa Amooniwanna mootete beettiwa Iyoaasiwa haadhe massite,

²⁷ ani oluwiinni keere higammo geeshsha usuru minira eessite moola timanna waa calla uyitannosi gede kulinsa» yii.

²⁸ Mikayano, «Ati keere higittoro, Kaaliiqi anera dicoyi'rinoe yaate» yiisi. Qole qoonqosi naggi asse, «Konne heedhinoonni manni baalu, coyi'rummore habbinoonte!» yii.

AKIAABI REYO

²⁹ Hakkunni gedensaanni Israeelete moote Akiaabinna Yihudu moote Iyosaafiixi Raamooti Katama qassara Geleaadira hadhu.

³⁰ Akiaabi Iyosaafiixira, «Olaho fulleemmo woyite ani wolu manchi gede ikkeemmona, ati kayinni mootimmate imaanakki uddi'ri» yiisi. Kunnira Akiaabi uddano soorri're wole lawe gaadi.

³¹ Sooriyu moote, 32 faradi gaarete hajajaano, «Israeelete moote agurranna wole mitto manchono kissinoonte» yee soyino.

³² Insano Iyosaafiixi affe Israeelete moote laweennansa shitara doyissitanno woyite, Iyosaafiixi raareenna,

³³ Israeelete moote ikkinokkita buuxxe, shaa agurtusi.

³⁴ Mittu Sooriyu gaaddichi olino maxxi kayinni hedeweelcho Akiaabira qodho xaaddinowa qasi. Akiaabino faradi gaare gananni nooha, «Madi'roommona olu giddonni badhe qolte fushshie!» yii.

³⁵ Olu bati'ranni ha'ri geeshsha Akiaabi Sooriyootaho alba hige faradi gaare irki're no. Madate giddonni fultanno mundee faradi gaare shanshitu. Isino hatte hawarronni reyi.

³⁶ Arrishsho e'ara rakkuta Israeelete gaadaannuwa, «Olu uurrinona, mannu baalunku gobba gobbasinna qae qaesi higo!» yitu.

³⁷ Akiaabino kunni garinni reenna, reeshshasi massine Samaariyaho madaarri.

³⁸ Faradi gaaresino fooru meenti biso hayishshi'rinotera Samaariyu kofamera hayishshini. Alba Kaaliiqi coyi'rinonte gede mundeesi woshshu laci.

³⁹ Akiaabi assinori wolu coyi baalu, mootimmasi mine daaniichu hinkonni asse biifisino garinna mi'nino katamma baalanniri Israeelete mootoolla dhagge amadino maxaafira borreessame no.

⁴⁰ Akiaabi annuwasinte gede reenna, beettisi Akaaziyaasi isi darga moohi.

YIHUDU MOOTE IYOSAAFIIXI

⁴¹ Akiaabi Israeelete moohihunni shoolki diro, Aasa beetti Iyosaafiixi Yihudaho moohi.

⁴² Isino 35 dirisinni moohe, Yerusaalame teesso assi're 25 diro gashshino. Azuuba yinanniti amasi Shilihi beettooti.

⁴³ Iyosaafiixi annisi Aasa gede Kaaliiqi baxanno coye assino; ka'anna kawa dihigino. Ikkollana kaphu maganna magansi'rate gaarrate aana seekkinoonni darguwa didiigino. Kunnira mannu hakkiicho kakkalanna hixaana giira diagurino.

⁴⁴ Iyosaafiixi Israeelete moote ledo namoome hee'rino.

⁴⁵ Iyosaafiixi assinohu wolu coyinna olu bareendesi baala Yihudu mootoolla dhagge amadino maxaafira borreessante no.

⁴⁶ Annisi Aasa gashshooti kawa dagate maganna magansi'nanniwa noore mimmitu ledo fooranno meentonna labballo baala gudino.

⁴⁷ Hatte yannara Edoomi gobbara moote dino. Kunnira Yihudu moote lekkasi asse worinohu gashshino.

⁴⁸ Moote Iyosaafiixi baara tayisse Ofeeri culka abbitannosi markabba seekkisiisi'rino. Ikkollana markabba Etsiyoonigabiiri yinanni malkara hiiqqantino daafira ha'ra didandiitino.

⁴⁹ Hakkunni gedensaanni Israeelete moote Akaaziyaasi markabbasi amaddannori Iyosaafiixiri ledo loossanno gede mala shiqisheenna Iyosaafiixi giwino.

⁵⁰ Iyosaafiixino annuwasinte gede reenna, Daawiti Katamira annuwasi waammawa madaarroonnisi. Beettisi Iyoraami isi darga moohi.

ISRAEELETE MOOTE AKAAZIYAASI

⁵¹ Iyosaafiixi Yihudaho moohihunni tonaa lamalki diro, Akiaabi beetti Akaaziyaasi Israeelete moohi. Samaariya teesso assi're Israeele 2 diro gashshino.

⁵² Isino amasi Elzaabeeli, annisi Akiaabinna Israeele cubbu giddora eessihu moote Iyorbiaami gede Kaaliiqi giwanno coye assino.

⁵³ Ba"aali magansi'ranninna isira soqqamanni, annisinte gede Israeelete Magano Kaaliiqa hanqisino.