UMI MOOTOOLLA 21 - Qullaawa Maxaafa

NAABUTETA WOYINETE KAASHSHI GOBBA

¹ Iyiziraeeli Katamira noohuwa Akiaabi mootimma mini mule woyinete kaashshi darga afi'rinohu mittu Naabute yinanni manchi no.

² Mitto barra Akiaabi Naabute, «Woyinete kaashshiti gobbakki mootimma'ya minira mule noo daafira, shaanu gedeere kaasi'reemmona uyie. Atera hakkiinni woyyitanno baatto eemmohe. Hira hasi'rittorono dancha gede baateemmohe» yiisi.

³ Naabute kayinni, «Kuni dargi akaakka'yawiinni ragi'roommoho. Kunnira, atera aatenni Kaaliiqi agaroe» yee dawarisi.

⁴ Naabute, «Akaakka'yawiinni ragi'roommota atera dieemmo» yiino daafira Akiaabi giirame hifatamanninna hanqanni minira ha'ri. Sagaleno itannokkiha daallasisira sae alba xarrate widira hige goxi.

⁵ Galtesi Elzaabeeli shiqqi yite, «Togo giire sagale ita hoolinoheri maati?» yite xa'mitusi.

⁶ Isino, «Ane giirtinoeti Naabute qolinoe dawarooti. Ani, ‹Woyinete kaashshita baattokki hirie; giwittoro kayinni wole baattonni soorrie› yoommo. Isi kayinni, ‹Dieemmohe› yiino» yee kulise.

⁷ Iseno, «Ati Israeelete moote di"ikkoo? Naabuteta woyinete kaashshi baatto ani haa'reemmahena, xa ka'e hisatte sagalekki iti!» yitusi.

⁸ Hakkunni gedensaanni Akiaabi su'minni borrote sokka borreessite maatamasino aanaho gante Naabute hee'rannowa Iyiziraeeli noo gashshaanoranna geerraho sokku.

⁹ Borrote sokkano, «Mannu mitto barra qatume hosanno gede kultine gamba assitine, Naabutera ayirrado darga la'ine uuyye.

¹⁰ Hakkunni gedensaanni, ‹Maganonna moote shollishootto› yitannore 2 yawaawuloota qixxeesse. Isono katamaho gobbaanni fushshitine kinnatenni gantine shiiyye» yitannote.

¹¹ Iyiziraeeli noo gashshaanonna geerru Elzaabeeli yitino gede,

¹² mitto barra qatume honsanni gede kulte manna mittowa gamba assitu. Naabuterano ayirrado darga la'e uyitusi.

¹³ Lamunku yawaawulootu naqaashshe Naabute mule ofoltu. Mannu baalunku albaanni ka'e, «Naabute Maganonna moote shollishino» yitu. Hakkunni gedensaanni Naabute katamaho gobbaanni fushshite kinnatenni gante shitusi.

¹⁴ Elzaabeelirano, «Naabute kinnatenni ganne shinoommo» yite sokkaancho sokkuse.

¹⁵ Elzaabeelino tini sokka iillitanni heedheennasenni rakke ka'e mootenniwa marte, «Xa kune Naabute reyinona, hira giwihe baatto marte adhi» yitusi.

¹⁶ Akiaabino konne coye macciishshanni hee'renni, Naabuteta woyinete kaashshi baatto adhara kae ha'ri.

¹⁷ Hakkunni gedensaanni Kaaliiqi himanaanchu Eeliyaasira,

¹⁸ «Ka'e Samaariyu mootewa Akiaabiwa mari. Naabuteta woyinete kaashshi baatto adhanni hee'reenna iillatto.

¹⁹ Marte ka'e Ani Kaaliiqi, ‹Naabute shoottoti ajjeennahe baattosino adhattoraatini? Woshshu Naabute mundee laci basera, ate mundeeno hatto asse lacanno› yiinohe yite kulisi» yii.

²⁰ Akiaabi Eeliyaasi afiti, «Baarigaara'ya afi'rittoeni?» yii. Eeliyaasino, «Kaaliiqi giwanno coye assate umokki sayisse hirootto daafira, eewanni afi'roommohe.

²¹ Kunnira Kaaliiqi, ‹Kuneeti qoomama soyanni noommohe. Ate albi'yanni hooleemmohe. Minekki nooha labbaaha baala mine ilaminohunna hirre abbinoonnihuno gatikkinni gudeemmo.

²² Israeele cubbu giddora eessite ane hanqisoottoe daafira, minekki Naabaaxi beetti Iyorbiaaminna Akiya beetti Baasha mini gede asseemmo.

²³ Elzaabeeli reeshshano, Iyiziraeeli Katami huxxi mule woshshu itanno.

²⁴ Ate ayidde ikkinoha katamaho reyannoha baala woshshu itanno. Katamu gobbaanni reyannoha doowiru itanno› yiino» yiisi.

²⁵ (Galtesi Elzaabeeli yitinota adhanni, Kaaliiqi giwanno coye assate umosi cubboho sayise hirinohu Akiaabi gedee manchi dino.

²⁶ Akiaabi loosinohu danni cubbi, Israeele gobbansa e'u waro Kaaliiqi albinsanni shorre hunino gosaha Amooraawootu maganna magansi'rasiiti.)

²⁷ Eeliyaasi coyi're gudanni hee'reennanni, Akiaabi uddanosi dare hune xiddu uddano uddi'ri. Sagaleno ita giwi. Xiddu uddano uddi'rino gedeenni goxanno. Yaaddote batinyinni umo heeshshi yee ha'ranno.

²⁸ Kaaliiqi Eeliyaasira,

²⁹ «Akiaabi ane albaanni umosi shollishino gara laittoni? Togo ikkinota afanni hee're, isi lubbotenni hee'reenna konne qoomama diabbeemmo. Minisi manni daafira yoommo coye beettisi yannara asseemmo» yii.